LEVÍTICO 1 - Dios Rimashca Shimicunami

Taita Diosman tucuita cushpa tucui rupachinami

¹ Mandaj Diosca Moisesta cayashpami, paihuan tupana carpa huasimanta cashna nirca:

² Israelcunataca cashna nishpa mandai: Cancunapuramanta maijancuna Mandaj Diosman cuna cashcata cungapaj animalcunamanta apamucushpaca, huagrata cashpa, ovejata cashpami apamuna canguichij.

³ Maijanpish Mandaj Diosman cushpa tucui rupachingapaj malta huagrata cushpaca, ima mana tucushca c'ari huagrata cuchun. Chaita Mandaj Dios chasquichunca, Mandaj Dioshuan tupana carpa huasi pungupi cuchun.

⁴ Chai cucujca Mandaj Diosman cushpa tucui rupachina animalpaj uma jahuapi paipaj maquita churachun. Chaimi, juchamanta cushca cashcamanta chasquinga.

⁵ Chai huagrataca Mandaj Diospaj ñaupajpi cungata p'itichun. Yahuartaca Aaronpaj churi curacuna, Mandaj Dioshuan tupana carpa huasi pungupi caj altar ladocunapi Diosman cushpa tsirapachun.

⁶ Chai tucui rupachina animaltaca p'itishpa mirga mirgata rurachun.

⁷ Aarón curapaj churicunaca, altar jahuapi ninata japichishpa, chai nina jahuapica yantata allichishpa churachuncuna.

⁸ Chai q'uipaca chai p'itishca aichacunataca umandij, chunllullicunandij huiracunandij altar jahuapi nina rupacunpi Aaronpaj churi curacuna allichishpa churachuncuna.

⁹ Chai huagrata cujllataj chunllullicunatapish, changa aichatapish yacuhuan maillachun. Chaitaca altar jahuapi cura tucuita rupachichun. Chashna tucui cushpa tucui rupachishcami, Mandaj Diospajca sumaj mishquijllata ashnacuj canga.

¹⁰ Oveja canllamanta cashpa, chivo canllamanta cashpa Diosman tucuita cushpa tucui rupachingapaj apamucushpaca, ima mana tucushca shuj c'ari animalta apamuchun.

¹¹ Chai animaltaca altar janaj ladoman Mandaj Diospaj ñaupajpi cungata p'itichun. Yahuartaca Aaronpaj churi curacuna altar muyundijta tsirapachun.

¹² Aichataca mirga mirgata p'itishpa umandij, chunllullicunandij, huiracunandij altar jahuapi yanta rupacunpi curacuna allichishpa churachuncuna.

¹³ Chunllullicunatapish, changa aichatapish chai cucujllataj yacuhuan maillachun. Curaca altar jahuapi tucuita cushpa rupachichun. Chaimi tucui cushpa tucui rupachishcaca, Mandaj Diospajca sumaj mishquijllata ashnacuj canga.

¹⁴ Mandaj Diosman tucuita cushpa tucui rupachingapaj, alasyuj animalta cucushpaca urpita cashpa, palomata cashpa apamuchun.

¹⁵ Chaitaca cura japishpa Diosman cushpa altar jahuapi cungata p'itishpa, yahuartaca altar shuj ladopi tucui shutuchichun. Aichataca altar jahuapi rupachichun.

¹⁶ Plumacunata pelashpa, bucheta anchuchishpa, chaicunataca altarmanta inti llujshin ladoman caj ushpa shitanapi shitachun.

¹⁷ Chai animaltaca ishqui alascunapi japishpa cucujllataj chaupichun. P'itirijtaca ama chaupichun. Curaca altarpi yanta rupacun jahuapi rupachichun. Chaimi tucui cushpa tucui rupachishcaca, Mandaj Diospajca sumaj mishquijllata ashnacuj canga.