LAMENTACIONES 4 - Dios Rimashca Shimicunami

Siónta llaquichinataca ñami tucuchin nishcamanta

¹ ¡Aij, curilla, yanayashcamari! ¡Aij, sumaj curica ña mana achij nicunca! Diospaj huasi rumicunapish tucui ñan esquinacunapimari shitashca siricun.

² Siónpi causajcunaca, imahuan mana chagru curitapish yalli munashca c'uyashcamari carca. Cunanca, mangata ruraj rurashca allpa mangata shinallamari yangata ruran.

³ Chacalcunapish, paicunapaj huahuacunamanca chuchuchinmi. Ashtahuanpish ñuca aillupura huarmicunaca, shitashca pambapi causaj avestruz shina huahuacunata mana llaquijcunamari.

⁴ Chuchucuj huahuacunaca yacunaihuan c'allu chaquishpami, jahua lado shimi ucupi llutarirca. Uchilla huahuacuna micunata mañajpipish, imata pi mana cui tucurcacunachu.

⁵ Sumaj alli micunallata micushpa causajcunapish, callecunapimi yaricaihuan huañurcacuna. Ashtahuan alli sumaj churanallata churashpa huiñajcunapish, mapata shitanacunapimi sirirircacuna.

⁶ Ñuca aillupuracunallatajmari, Sodoma pueblopi causajcunapaj juchata yalli, millaita rurarcacuna. Chai puebloca, macanacunaman manapish pi shayarijpi ñapish chingarircallami.

⁷ Paita mandajcunaca, imahuan mana mapayashca rasu shinamari carca. Lechetapish yalli yurajcuna, coraltapish yalli pucacunami carca. Jatunmanpish zafirota yalli sumajmari ricurijcuna carca.

⁸ Cunanca tutatapish yalli yanacunamari, callepi puricujta ricushpapish pi cashcata mana rijsincunachu. Paicunapaj aichaca tulluman llutarishpa, caspi shinami chaquishca.

⁹ Allpapi p'ucuj ima grano illashcamantami, yaricaihuan allimanta chaquishpa huañurcacuna. Espadapi huañujcunarajmi, mana paicuna shina llaquita aparcacuna.

¹⁰ Ñuca aillupura alli shunguyuj huarmicunamari, paicunapaj huahuacunallatataj, quiquin maquihuan yanurcacuna. Jatunta llaquichi punllapica, quiquin huahuacunatamari micurcacuna.

¹¹ Mandaj Diosca p'iñarishpa, imata rurasha nicushcataca pajtachircamari. Jatunta p'iñarishcatamari tallirca. Sionpica ninata japichishpamari, callari rumicunacama rupachirca.

¹² P'iñashpa mana ricunachijcunamari Jerusalén pungucunata yaicurcacuna. Chashna tucunataca tucui cai pacha jatun mandajcunapish, tucui cai pachapi causajcunapish manataj yuyarcacunachu.

¹³ Jerusalenpica paicunapaj huillajcuna, curacunamari yallitaj juchata rurarcacuna. Paicunamari cashcata rurajcunataca, cai pueblo chaupipi huañuchishpa yahuarta jicharcacuna. Chaimantamari chashna llaqui tucurcacuna.

¹⁴ Callecunapica, ñahui mana ricujcuna shinami purircacuna. Yahuarhuanmi c'ahuirircacuna. Chaimantami paicunapaj churanacunapish, maita mana tuparipaj carca.

¹⁵ Paicunataca: “¡Mapa runacunami, anchurichij anchurichij, ama tuparichijchu!” nishpami caparircacuna. Llujshishpa caita chaita rircacunami. Shujtaj llajta runacunaca: “Caipica ña mana ashtahuan causangacunachu” nircacunami.

¹⁶ Mandaj Diosmari p'iñarishpa anchuchirca, paica ña manataj ricungachu. Curacunatapish mana pingarcacunachu, yuyajcunatapish mana llaquircacunachu.

¹⁷ Ñucanchijta ayudanaman shamuchunca, yangallamari ñahuicuna shaicujta chaparcanchij. Manapish ayudai tucuipaj llajtallatamari shunguta churashpa yanga shuyashcanchij.

¹⁸ Ñucanchij pueblo ñancunata ama ashtahuan purichunmi, ñucanchijtaca japingacamataj chapashpa catircacuna. Ñucanchijca chaicamalla causana cashcamantami, ñucanchij tucurina punlla pajtashca carca.

¹⁹ Ñucanchijta japingapaj catijcunaca, huairata purij aguilacunatapish yalli utca callpajcunami carca. Urcucunata catishpami japircacuna, shitashca pambapipish muyundijta jarcashpami japircacuna.

²⁰ Ñucanchij causaita huaquichicujca, Mandaj Dios agllashca jatun mandajmari carca. “Ñucanchijca shujtaj llajtacunapaj chaupipica paimantamari causacunchij” nijmari carcanchij. Cunanca paitamari prezu apancuna.

²¹ Uz llajtapi causaj Edom runacunalla, cunanca cushicushpa asicuichijlla. Q'uipa punllaca, cancunapajpish copamanta ubyanaca chayangami. Cancunapish machashpa shungu tigranguichijmi.

²² Sión pueblopi causajcunalla, cancuna llaquita apanaca ña tucurinmi. Cunanmantaca ña manataj prezu cachangachu. Edom llajtapi causajcunalla, cancuna millaita rurashcatapish ricuchingami, chai juchata ricuchishpami llaquichinga.