LAMENTACIONES 3 - Dios Rimashca Shimicunami

Mandaj Diosllataj llaquishpa quishpichingami

¹ Ñucaca, ñuca aichapi jatun llaquita apashca runami cani. Mandaj Diosmari jatunta p'iñarishpa anguhuan macahuarca.

² Ñucataca achij luzman pushanapaj randica, amsamanmi pushahuarca.

³ Tucui punllamari cutin cutin tigrashpa macahuarca.

⁴ Chashnamari utcapi ñuca aichata chaquichishpa yuyajyachirca, ñuca tullucunatapish p'aquircami.

⁵ Ñuca muyundijpi baluartecunata shayachishpami, caparirishpa huacana jatun llaquita rurarca.

⁶ Ña uni huañushcacunata shinami amsapi saquirca.

⁷ Ñuca tucui muyundijta chapashpami, llujshichunca mana saquirca. Jatun llashaj cadenacunahuanpishmi huatarca.

⁸ Caparishpa ñuca mañajpipish, ama uyangapaj rinrinta taparircami.

⁹ Miticunaman ricujpipish, labrashca jatun rumicunahuanmi ñanta jarcarca. Chashna rurashpami, shujtaj ñanta pusharca.

¹⁰ Paica oso shinami chaparca, pacallapi león shuyacuj shinami japirca.

¹¹ Shujtaj ñanta cachashpamari japishpaca, mirga mirgata rurashpa ñuturca. Chashnatamari shitashcata saquihuarca.

¹² Paipaj arcota chutashpami puntajlla caspicunahuanca ñucata ricurashpa shitarca.

¹³ Pai aparina carapi charicushca puntajlla caspicunataca, tucui caspicunatamari ñuca huijsapi shitarca.

¹⁴ Ñuca llajtapi causajpuracunaca, punllantamari chanzata rurashpa asircacuna.

¹⁵ Cai tucui llaquicunahuanmi ñacachihuarca. Ajenjota ubyachishpamari machachihuarca.

¹⁶ Rumicunapi urisinga urmachishpami, ñuca quirucunatapish p'aquirca. Ñuca jahuapica, ushpatami shitarca.

¹⁷ Sumaj causai tiyashcataca ña cungarinimi, cushicui tiyashcataca mana yuyarinillapishchu.

¹⁸ Chaimantami ñucaca: “Imata rurana yuyaitapish mana charinichu. Mandaj Diospi shunguta churana yuyaipish mana tiyanchu” yuyarcanimi.

¹⁹ Jatun llaquihuan ñuca shungu p'aquirishcatapish, ajenjota, hielta ubyashcatapish yuyarihuayari.

²⁰ Ñucapi tiyaj almapish, chai tucui llaquihuanca manataj casijlla cai tucunchu, chaitaca ñucapish manataj cungari tucushachu.

²¹ Ñucaca caita yuyaipi charishpamari, Diospi shunguta churasha nini.

²² Mandaj Dios llaquijllapimari, ñucanchijca mana tucuicuna chingarishcanchij. Ñucanchijta llaquinataca manataj saquishcachu.

²³ Cambaj c'uyaica cada tutamanta mushujllatajmi, ñucanchijtaca manataj saquinguichu.

²⁴ Ñuca tucui almahuanmi: “Ñuca charinaca Mandaj Diosmari” nishpaca, paillata shuyani.

²⁵ Mandaj Diosca paipi shunguta churashpa, tucui almahuan paita mashcajhuanca allimari.

²⁶ Mandaj Dios quishpichichun casijlla shuyanaca allimari.

²⁷ Huambramantapacha yugota apanaca, pipajpish allimari.

²⁸ Mandaj Diosllataj apachishcamantaca, upajlla quiquinlla tiyarichunlla.

²⁹ Llaquirishpa pambaman cumurichunlla. Chashna llaquirijpica, Mandaj Diosca quishpichipajpishmi.

³⁰ Maijan macajpipish quijadusta ricuchichunlla, mashnata c'amijpipish upalla uyachunlla.

³¹ Jatun Diosca mana huiñaita shitashpa saquinchu.

³² Ashtahuanpish llaquichishpapish, jatunta c'uyaj cashcamantaca paillataj llaquinmi.

³³ Paica runacunata yanga llaquichinata, huacachinataca manataj munanchu.

³⁴ Llajtapuracunata prezu churashpa, sarushpa tucui ñutuchun,

³⁵ jahua pachapi causaj Dios ricucujpi, millaicunataraj allicunapaj randi allipi churachun,

³⁶ manapish llaquichina runata mandajcuna llaquichichunpish, Jatun Diosca manataj ricunachinchu.

³⁷ Jatun Dios manapish mandajllapitaj imapish tucunllami nishpaca, ¿pitaj ni tucungari?

³⁸ Jahua pachapi causaj Diostaj paipaj shimihuan mandashcamantami, llaquipish, allipish tiyan.

³⁹ Runaca cai pachapica, ima shujtajmanta llaquilla canapaj randica, juchayuj cashcamanta caparishpa huacachun.

⁴⁰ Ñucanchij ima shina causacushcataca callarishpa, alli yuyarishunchij. Chashna yuyarishpa, Mandaj Diosman cutirishunchij.

⁴¹ Jahua pachapi caj Diostaca ñucanchij shungutataj cushpa, maquicunatapish huichi chutashpa mañashunchij.

⁴² Ñucanchijmari cantaca yallitaj mana cazushcanchij. Ñucanchijmari canmanta anchurishcanchij. Chaimantamari ñucanchijca llaquita apanataj tucushcanchij.

⁴³ Jatunta p'iñarishpamari ñucanchijtaca catishpa llaquichircangui. Pita mana llaquishpamari huañuchircangui.

⁴⁴ Ñucanchij mañashcata ama uyangapajpish, jatun amsa p'uyu chaupipimi miticurcangui.

⁴⁵ Shujtaj runacunapaj chaupipimari, ñucanchijtaca millashpa c'aminata rurashcangui.

⁴⁶ Ñucanchijta p'iñajcunaca, tucuicunamari millpunamira shimita pascarcacuna.

⁴⁷ Mancharina jatun llaqui, trampapi urmana, tucuicuna huañushpa tucurinallami ñucanchijtaca japirca.

⁴⁸ Ñuca llajtapi causajpuracuna jatun llaqui tucushcamantami, ñuca ñahuicunamantaca jatun yacuta shina huiquita jichani.

⁴⁹ Manataj ashallatapish samarina tiyanchu. Chaimantami huacanataca, manataj upallashpa huacani.

⁵⁰ Mandaj Dios jahua pachamanta urilla ricungacama huacacushallami.

⁵¹ Ñuca causacun pueblopi causaj huarmicunamantaca ñahuicuna nanajta, alma shaicujtami huacani.

⁵² Ñucata p'iñajcunaca, yangamantamari pajarocunata shina catishpa japircacuna.

⁵³ Ñucataca huañuchunmari jatun jutcupi churarcacuna. Chaipi churashpaca, jatun rumihuanmi taparcacuna.

⁵⁴ Umacama yacupi huashicushpami: “Cunantajca huañugrinimi” yuyarcani.

⁵⁵ Mandaj Dioslla, chai jutcu ucupi prezu cashpaca, cantamari cayarcani.

⁵⁶ Ñuca mañashcataca uyarcanguimari. Shungu llujshishpa ñuca caparicujtaca, ama cambaj rinrinta tapashpa mana uyaichu.

⁵⁷ Ñuca canta mañai punllamari ñucapajman c'uchuyashpaca: “Ama manchaichu” nihuarcangui.

⁵⁸ Jatun Dioslla, mana llujshi tucuipaj llaquipi cajpica, canmari ñucamanta shayarircangui. Canmari ña huañugricujpi quishpichihuarcangui.

⁵⁹ Mandaj Dioslla, ñucata yangamanta llaquichicujtaca canllataj ricunguimi, mitsahuayari.

⁶⁰ Ñucata ima shinalla llaquichisha nicujta, ñuca ima tucuchun yuyacujtaca canllataj ricunguimi.

⁶¹ Mandaj Dioslla, ñucata c'amishcata, ñucata tucuchingapaj ima shinalla yuyarinacujtapish uyarcanguimi.

⁶² Ñucata llaquichingapaj jatarishpa imallata parlanacujta, tucui punlla imallata yuyarinacujta uyanguimi.

⁶³ Paicuna tiyarijta, jatarijtapish ricuyari. Ñucaca, paicuna cantashpa asinamari cani.

⁶⁴ Mandaj Dioslla, paicunapaj maquihuan rurashcamantaca, japina cashca shinataj cuiyari.

⁶⁵ Paicunapaj shungu sinchiyachun saquilla. Can cachasha nishca llaquitaca paicunapaj jahuapi cacharitagari.

⁶⁶ Mandaj Dioslla, jatunta p'iñarishpa llaquichiyari. Cai pachamanta chingachiyari.