LAMENTACIONES 1 - Dios Rimashca Shimicunami

Sionmanta prezu apashcacunamanta huacashca shimicunami

¹ ¡Aij, achcacuna causacushca puebloca shitashcamari saquirishca! Tucui llajtacuna rijsishca jatun pueblomari carca. Cunanca cusa huañujpi viuda saquirishca huarmi shinamari. Tauca llajtacunata mandana pueblomari carca. Cunanca impuestota pagajmari tucushca.

² Tutacunaca jatunta caparirishpamari huacan. Quijados uritaca huiqui manataj chaquinchu. Paita c'uyajcunaca pi mana cushichinaman shamunchu. Paihuan apanacunata saquishpamari, cunanca paita p'iñajcuna tucushca.

³ Judaca sinchi ruranacunata rurashpa, llaquinayajtami causarca. Shujtaj llajtacunapaj chaupipi causashpapish, mana sumajta causai tucurcachu. Cunanca shujtaj llajtaman prezumari rishca. Paita llaquichijcunaca tucuicuna quichquipi jarcashpamari japircacuna.

⁴ Sionmanta purina jatun ñancunaca llaquillamari siricun, jatun tandanacuicunata ruranaman pi mana shamunchu. Pueblo pungucunapish pambapi shitashcamari siricun. Paipaj curacunapish aij nincunamari, solteracunapish llaquinayajtamari huacacun. Sióntaca jatun llaquimari japirca.

⁵ Paita p'iñajcunamari mandajcuna tucurca, paita mana ricunachijcunamari misharca. Paillataj yallitaj millaita rurashcamantami, Mandaj Diosllataj chashna llaquichirca. Chaimantamari paipaj huahuacunataca paicunata p'iñaj ñaupachishpa prezu aparca.

⁶ Siónpi causajcuna sumaj cashcaca tucui chingarinca. Mandajcunapish q'uihuata mashcacuj taruga shinamari callparcacuna. Paicunata llaquichicujcuna catijpica, shaicushpa mana puri tucurcacunachu.

⁷ Jerusalenpi causajcunaca paicunata p'iñajpaj maquipimari japi tucurca. Chaipica pi mana ayudanaman shamurcachu. P'iñajcuna chaita ricushpaca, cushicushpami asircacuna. Chaimantami paica ñaupa huatacuna achcata charij cashcamanta sumaj cashca cajpipish, paillataj mana cazuj cashcamanta Dios llaquichishcata yuyarirca.

⁸ Jerusalenca jatun juchatamari rurarca. Chaimantamari pai tiyacushcamantaca aisashpa shitarcacuna. Ñaupaman paita alli nijcunaca, lluchullata ricushpami tucuicuna millanachincuna. Chaimantami pingaihuan shungu llujshishpalla tiyacun.

⁹ Millaita rurashpami paipaj churanatapish mapayachirca. Cai jatun llaqui japinataca mana yuyarcallapishchu. Chaimantamari cashna jatun mancharina tucushca. Cunanca pi mana cushichinaman shamunchu. Mandaj Dioslla, jatun llaquipimari cani, ricuhuayari. P'iñajcunaca jatun tucuncunamari.

¹⁰ Paita p'iñajca ima sumaj charinacunatacatucuitamariquichushpa aparca. Pai ricucujpimari Diospaj huasimanca shujtaj llajta runacuna yaicurca. Can Diosca chaicunataca cambajllacuna tandanacushcapica, ama yaicuchun nishcamari carcangui.

¹¹ Jerusalenpi causajcunaca, tucuicunami micunata mashcashpa huacaihuan purircacuna. Yaricaihuan ama huañungapajllamari paicuna ima sumajcunata charishcataca asha micunamanta tucui curcacuna. Mandaj Dioslla, ñuca cashna llaquinayaj tiyacujtaca ricuhuayari.

¹² Ñanta ricujcuna, shayarishpa ricuichigari. Ñucata japishca jatun nanai shinaca, ¿pita japishcachu imatagari? ¿Cashnata ricushpaca manachu cancunataca llaquinayan imatagari? Mandaj Dios jatunta p'iñarishpa llaquichina punllamari ñucapajca chayamushca.

¹³ Paica jahuamantamari ninata shitarca. Chai ninamari rupachishpa ñuca tullucama tucuchicun. Ñuca ñanpi trampata churashpamari ñucataca huashaman tigrachirca. Punllanta jatun nanaihuan cachun shitashpamari, ñucallata saquirca.

¹⁴ Ñuca mana cazushcamantamari llashaj yugota paipaj maquihuan huatashpa apachihuarca. Cunanca fuerza illajmari cani. Jatun Diosmari ñuca mana c'ariyai tucuipaj, sinchi runapaj maquipi churahuarca.

¹⁵ Jatun Diosmari ashtahuan c'ari c'ari ñuca soldadocunataca ñuca chaupillapitaj tucuicunata sarurca. Paillataj cayashpa, achcacunata tandachimushpamari, chairaj c'aricunataca tucui huañuchichirca. Jatun Diosca Judapi causajcunataca, c'arihuan manaraj chayarinacushca huarmi shina cajpipish, uvata shinamari sarurca.

¹⁶ Ñucata ayudashpa, ñuca almata samachijca ñucamanta caruyashcamari. Ñuca huahuacunatapish p'iñajcuna shamushpa, tucuicunata huañuchincunaca. Chaimantamari huacani, ñuca ñahuicunamantaca huiquica yacu shina llujshicunllamari.

¹⁷ Sionca maquicunata chutashpami cayan, shina cajpipish pi mana cushichinaman shamunchu. Mandaj Diosmari Jacobpaj muyundijpi causajcunataca paita p'iñachun mandashca. Chaimantamari Jerusalentaca tucui paicuna millarca.

¹⁸ Mandaj Diosca cashcata rurajmi, ñucamari pai mandashcataca mana cazurcani. Tucui cai pachapi causajcuna, uyaichigari. Cunanca ñuca cashna jatun llaquihuan cajta ricuichigari. Ñuca huahuacunataca mosocunatapish, solteracunatapishmari prezu aparcacuna.

¹⁹ Ñucata ayudachun ñucata c'uyajcunata cayajpipish, paicunaca umarcacunallami. Ñuca curacunapish, ñucata cunaj yuyajcunapish yaricaihuan ama huañungapajmi, micunata mashcarcacuna. Chashna mashcacushpallatajmi pueblollapitaj huañurcacuna.

²⁰ Mandaj Dioslla, caitaj jatun llaquihuan canica, ricuhuayari. Canta yallitaj mana cazushcata yuyarishpamari, shunguhuantaj yallitaj llaquirini. Ñuca shungu chaupirishpami nanarini. Canllapipish espadamari tucuchicun. Cai ucupipish huañushpa tucurincunaca.

²¹ Aij nishpa ñuca huacajta uyashpapish, ñucata ayudanaman pi mana shamunchu. Ñucata p'iñajcunaca tucuicunami cashna llaquihuan cajtaca yachancuna. Ñucata can llaquichishcamantaca cushicuncunami. Paicunapajpish cachasha nishca llaquita can cachai punllaca, paicunapish ñuca shinallatajmi tucungacuna.

²² Paicuna imalla millaita rurashcataca, shujllatapish ama cungaringui. Paicunatapish canta yallitaj mana cazushcamanta ñucata llaquichishca shinallataj llaquichingui. Ñucaca yallitajmi huacashpa shungu llujshini, ñuca shungupish nanaihuan chaupiricunmi.