JUECES 9 - Dios Rimashca Shimicunami

Abimelec mandaj tucushcami

¹ Jerobaal nishca Gedeonpaj churi Abimelecca, paipaj mamapaj turicunapajman Siquem puebloman rishpami, paicunatapish, paipaj mamapaj, yayapaj tucui familiacunatapish cashna nirca:

² –Ñucaca cancunataca Siquem pueblopi tucui causajcunataca: ¿Cancunapaj yuyaipica, Jerobaalpaj tucui canchis chunga churicunataj mandanachu alli, mana cashpaca shujlla mandaj tiyanachu alli? nishpa tapuchunmi rogani. Ñucaca cancunapaj quiquin tullu, quiquin aicha cashcata yuyarichigari– nircami.

³ Chaimi paipaj mamapaj turicunaca Siquem pueblopi tucui causajcunamanca, pai nishca shinallataj: “Abimelecca ñucanchij quiquin aichallatajmari” nishpa yuyaita cugrircacuna. Paica ñucanchij huauquimi nijpimi, tucui chaipi causajcuna paimi alli canga nircacuna.

⁴ Chaita yuyarinacushpami, Siquem pueblopi causajcunaca, Baal-berit diospaj huasipi tiyacuj canchis chunga siclo cullquita surcushpa Abimelecmanca curcacuna. Chai cullquihuanca paica imata ruranata mana munaj, puricujlla huañuchij runacunatami pushashpa rirca.

⁵ Abimelecca, Ofra pueblopi caj paipaj yayapaj huasiman shamushpami, canchis chunga paipaj huauquicunata shuj rumi jahuapi tucuicunata huañuchirca. Chaipica Jerobaalpaj churicunaca q'uipa churi Jotamllami miticushpa quishpirirca.

⁶ Siquempi causajcunaca Milopi causajcunandij tandanacushpami, Siquem pueblo c'uchullapitaj shuj jatun pilar tiyan pambapi tandanacurcacuna. Abimelectaca, paicunata jatun mandaj cachunmi churarcacuna.

⁷ Jotamman chaita huillajpica, paica Gerizim urcu jahuaman huichiyashpami, sinchita caparishpa cashna nirca: “¡Siquem pueblo runacuna, ñuca nishcata uyaichij! ¡Ñuca nishcata uyajpica, Diospish cancunata uyangami!

⁸ Shuj cutinmari yuracunaca paicunata mandajta agllanaman rishpaca, olivo yurataca: Canca ñucanchijta jatun mandaj tucuiyari nircacuna.

⁹ Ashtahuanpish olivo yuraca: ¿Diostapish, runacunatapish cushichina aceiteta cuj canata saquishpachu, yuracunata jatun mandaj tucusha? nircami.

¹⁰ Yuracunapish higo yurataca: Shinashpaca can ñucanchij jatun mandaj caiyari nircacunami.

¹¹ Higo yurapish: Yuracunata jatun mandaj tucunga raicullachu mishquijlla higota p'ucuj canata saquisha nircami.

¹² Chai q'uipaca yuracunaca uva yuratami: Ñucanchijta jatun mandaj caiyari nircacuna.

¹³ Uva yurapish yuracunataca: Diostapish, runacunatapish cushichij llullu vinota cuj canata saquishpaca ¿maitataj yuracunata jatun mandaj tucushari? nircami.

¹⁴ Tucui chai yuracunaca zarza casha yuratami: Shinashpaca can ñucanchijta jatun mandaj tucui nircacuna.

¹⁵ Zarza cashaca yuracunataca: Ñucata tucui cancunata jatun mandaj cachuntaj agllashpaca, ñuca llandu ucupi llandurij shamuichij. Mana chashna rurajpica, zarza cashamanta ninami llujshinga. Libanopi tiyaj cedro yuracunatami tucuchinga nircami.

¹⁶ ¿Cunan cancunaca Abimelectaca mana nij tucushpalla tucui shunguhuantajchu jatun mandaj cachun churanguichij? Chashna rurashpaca ¿Jerobaal cancunapaj allita rurashcamanta paipaj huasi ucupurapajpish allita rurashcatachu ricuchicunguichij?

¹⁷ (Ñuca yayami madianitacunapaj maquimanta cancunata llujshichingapajca, huañushpapish huañushatajchari nishpa paicunahuan macanacurca.

¹⁸ Cunanca cancunaca ñuca yayapaj huasi familiata p'iñashpa jatarishpami, paipaj canchis chunga churicunataca shuj rumi jahuallapi tucuicunata huañuchishcanguichij. Ashtahuanpish ñuca yaya paipajta ruraj huarmihuan charishca churi Abimelectaca Siquempi causaj cancunapura cashcallamantamari, jatun mandaj cachun churashcanguichij.

¹⁹ Cancuna chashna rurashcaca Jerobaalpajpish, paipaj huasi familiapajpish alli cajpica, Abimelecca cancunahuan cushicuchun, cancunapish paihuan cushicunguichij ninimi).

²⁰ Mana chashna cashca cajpica, Siquempi causajcunatapish Milopi causajcunatapish Abimelecmanta nina llujshishpa, tucuchishca cachun. Siquempi causajcunamantapish, Milopi causajcunamantapish nina llujshishpa Abimelectapish tucuchishca cachun” nircami.

²¹ Chaimantaca Jotamca, paipaj huauqui Abimelecta manchashpami, Beer pueblopi miticushpa causagrirca.

²² Abimelec israelcunata quimsa huatata pai munashca shina ña mandacujpimi,

²³ Diosca Abimelechuan Siquempi causajcunahuan chaupiman millai espirituta cacharca. Siquempi causajcunaca p'iñarishpami Abimelecta c'ariyarcacuna.

²⁴ Jerobaalpaj canchis chunga churicunata huañuchishca yahuarca Abimelecpaj jahuapi urmachunmi chashna jatarirca. Siquempi causajcunapish huañuchishpa ayudashcamantami chashna llaquita chasquirca.

²⁵ Siquempi causajcunaca, urcu jahuapimi ñancunata rijcunata chapashpa shuhuajcunata churarca. Chaitami Abimelecmanca huillarcacuna.

²⁶ Ebedpaj churi Gaalca, paipaj huauquicunandijmi Siquemman chayarcacuna. Siquempi causajcunaca, Gaalpimi shunguta churarcacuna.

²⁷ Paicunaca chaipi causajcunahuan uva chagracunaman llujshishpa uvata tandashpa sarushpa capishpami, jatun micuita rurashpa paicunapaj dioscunapaj huasipi micushpa ubyashpa cushicurcacuna. Abimelectaca llaqui tucushca alli canman nircacunami.

²⁸ Ebedpaj churi Gaalca cashnami nirca: “¿Abimelecca pitagari? Siquempi causaj ñucanchijpish paipajta rurashpa causacungapajllaca ¿pitaj canchigari? ¿Manachu paica Jerobaalpaj churilla? Paita ayudajpish ¿manachu Zebul runalla? Abimelecpajta rurashpa causacunapaj randica Siquempaj yaya Hamorpaj huahua huahuacunapajta rurashpa causashunchij.

²⁹ Ñucachu cai pueblota mandacuiman Abimelectaca llujshichishpami cachaiman. Abimelectaca: Cambaj soldadocunata tandachi, macanacunaman llujshimui nimanmi” nircami.

³⁰ Ebedpaj churi Gaal chashna nishpa puricujta, chai pueblota mandaj Zebul runa yachaj chayashpaca, nina sindirij shina p'iñarishpami,

³¹ cashna nishpa Abimelecman huillachun huillajcunata pacalla cacharca: “Ebedpaj churi Gaalmi paipaj huauquicunandij Siquemman shamushca. Paicunami cai pueblopi causajcunataca canta mana cazushpa canhuan macanacuna yuyaita cucun.

³² Jatari, cunan tutataj canpish canhuan cajcunandij, pueblo c'uchulla pambapi pacalla chapajcunata churai.

³³ Cayandij tutamantapaj manaraj inti llujshijpi tucui chai pueblo muyundijpi canguichij. Gaalpish paihuan cajcunapish canhuan macanacunaman llujshijpica, cambaj yuyaipi ima ashtahuan alli cashcata rurangui” nishpa huillachunmi cacharca.

³⁴ Chaimi Abimelecca, chai tutallataj jatarishpa tucui paihuan cajcunandij chuscupi chaupirishpa Siquem pueblo muyundijpi pacalla chapacurcacuna.

³⁵ Ebedpaj churi Gaalca llujshimushpami puebloman yaicuna punguman tucurca. Chaita ricushpami Abimelecca paihuan cajcunandij pacalla chapacushcamanta llujshircacuna.

³⁶ Chaita ricushpami Gaalca Zebultaca: –¡Riquiyari, urcumantaca achca runacunamari uriyamucun!– nijpi Zebulca: –Mana runacunachu, urcu llandullamari cambaj ñahuipica runacunatajlla ricuricunga– nirca.

³⁷ Ashtahuanpish Gaalca cutinllatajmi: –¡Riquiyari, uchilla loma uritapishmari achcacuna uriyamucun! ¡Shinallataj adivinocunapaj encina yura uri ñantapishmari achcacuna uriyamucun!– nircami.

³⁸ Chaimi Zebulca Gaaltaca: –¡Abimelecca pi cajpitaj ñucanchijca paipajta rurashpalla causacushunri nircanguica! ¿Manachu cai gentecunata yangapi churarcangui? Cunanca llujshishpa paihuan macanacugriyari– nircami.

³⁹ Chashna nijpi Gaalca, Siquempi causajcunata ñaupashpa llujshishpami, Abimelechuan macanacurca.

⁴⁰ Ashtahuanpish Abimelec mishashpa huañuchinaman catijpimi, Gaalca miticunaman callparca. Achcacunami puebloman yaicuna pungucama huañushca siricurcacuna.

⁴¹ Abimelecca, Aruma pueblopimi saquirirca. Gaaltaca, paipaj huauquicunandijmi Zebulca chaimanta llujshichishpa cacharca. Siquempi ama causachunmi llujshichishpa cacharca.

⁴² Chai cayandij punllaca Siquempi causajcunaca, chagracunaman llujshijta ricushpami, Abimelecmanca huillarcacuna.

⁴³ Chaimi paica paipaj gentecunata quimsapi ch'icanchishpa, pueblomanta canllapi pacalla chapacurcacuna. Siquempi causajcuna pueblomanta llujshijta ricushpami, Abimelecca paipaj soldadocunandij miticushpa tiyacushcamanta llujshishpa paicunata llaquichingapaj rirca.

⁴⁴ Abimelecca paihuan caj soldadocunandij callpashpami, chai pueblo pungupi shayarigrircacuna. Ishquipi ch'icanchishca caishuj soldadocunaca chagracunapi puricujcunatami, tucuicunata huañuchircacuna.

⁴⁵ Abimelecca chaipi causajcunahuan tucui punlla macanacushpami misharca. Chai pueblopi causajcunata huañuchishpaca, pueblotapish tucui chingachishpami chaipica cachita tarpurca.

⁴⁶ Siquem pueblopi caj torrepi cajcuna chaita uyashpaca, Berit diospaj sinchi pirca huasipimi miticugrircacuna.

⁴⁷ Siquem pueblo torrepi cajcunaca Berit diospaj huasipi tandanacushca cashcataca Abimelecmanca ñami huillarcacuna.

⁴⁸ Chaimantami Abimelecca tucui paihuan cajcunandij Salmón urcuman huichiyashpa, shuj hachata japishpa yurapaj shuj ramata p'itishpa rigra jahuarca. Paihuan cajcunataca: “Ñuca imata rurajtaca cancunallataj ricunguichijmi, chai shinallataj cancunapish utca ruraichij” nircami.

⁴⁹ Chaipimi tucuicuna yura ramacunata p'itishpa Abimelecta catishpa rircacuna. Chai ramacunataca Berit diospaj huasi sinchi pirca muyundijpi churashpa ninata japichijpimi, Siquem pueblo torrepi cajcunaca shuj huaranga shina c'aricunapish huarmicunapish huañurcacuna.

⁵⁰ Chai q'uipaca Abimelecca, Tebes puebloman rishpami, chai pueblo muyundijta shayarishpa chai pueblotaca japirca.

⁵¹ Chai pueblo chaupipica sinchi pirca torremi tiyarca. Chai pueblopi causajcunaca c'aricunapish, huarmicunapish, mandajcunapish, tucuicuna chaipi miticungapaj yaicushpami, pungutapish alli huichcashpa torre jahuaman huichiyarcacuna.

⁵² Abimelecca torrecama shamushpami, ninata japichishpa llaquichingapaj torre punguman c'uchuyarca.

⁵³ Chaipimi shuj huarmica molino rumi chaupirishca rumita shitajpi Abimelecpaj umapi urmashpa paipaj uma tulluta p'aquirca.

⁵⁴ Chaimi Abimelecca paipaj escudota apaj runata utca cayashpaca: “Abimelectaca shuj huarmimi huañuchishca nishpa ama nichun, cambaj espadata surcushpa ñucata huañuchi” nijpimi paipaj escudota apaj runaca espadahuan satijpi Abimelecca huañurca.

⁵⁵ Israelcunaca Abimelec huañushcata ricushpaca, paicunapaj huasiman tigrarcallacunami.

⁵⁶ Abimelec paipaj canchis chunga huauquicunata huañuchishpa, paipaj yayata llaquichishcamantaca, Diosca paitapish chashnallatajmi llaquichirca.

⁵⁷ Siquempi causajcuna tucui mana allita rurashcamantaca, Diosca paicunatapish chai shinallatajmi llaquichirca. Jerobaalpaj churi Jotam paicunata llaqui tucushca canman nishcaca pajtarcami.