JUECES 7 - Dios Rimashca Shimicunami

Madianitacunata Gedeón mishashcami

¹ Jerobaal nishca Gedeonca, tucui paihuan cajcunandij tutamanta utcata jatarishpa rishpaca, Harod yacu pugyu c'uchupi carpa huasicunata shayachishpami tiyarircacuna. Madianitacunapaj carpa huasicunaca More loma janaj ladoman caj pugru pambapimi carca.

² Mandaj Diosca Gedeontaca: “Madianitacunata cambaj maquipi ñuca churangapajca, canhuan caj israelcunaca yallitaj achcacunamari. Chashna cajpi cambaj maquipi churajpica: Ñucanchij maquihuantaj macanacushpami quishpirinchij” nishpami, israelcunaca ñucata yanganchishpa jatun tucungacuna.

³ Chaimanta cunanca cashna rurai: Maijanpish manchashpaca, cai Galaad urcumanta utca huasiman tigraichijlla nishpa, caparishpa huillashpa tucuicunaman yachaj chayachi nircami. Gedeón chashna huillajpica, chaipi cajcunaca, 22.000 runacunami tigrashpa rircacuna. Paihuanca, 10.000 runacunallami saquirircacuna.

⁴ Mandaj Diosca Gedeontaca: “Yalli achca gentecunarajmari saquirin. Cunanca yacuman pushai. Chaipimi maijanlla rinata ricusha. Maijantami ñuca, caimi canhuan ringa nijpica, paimi canhuan ringa. Maijantami caica mana canhuan ringachu nijpica, paica mana canhuan ringachu” nircami.

⁵ Paicunata yacuman ña chayachijpimi, Mandaj Diosca Gedeontaca: “Yacuta allcu shina lambishpa ubyajcunataca, paicunallata ch'icanchi. Chashnallataj cungurishpa yacuta ubyacujcunatapish paicunallata ch'icanchi” nirca.

⁶ Yacuta maquihuan japishpa ubyajcunaca, 300 runacunallami carca. Caishujcunaca tucuicunami cungurishpa ubyarcacuna.

⁷ Chai q'uipami Mandaj Diosca, Gedeontaca: “Yacuta maquihuan apashpa ubyaj cai 300 runacunahuanmi madianitacunataca cambaj maquipi churashpa, tucui cancunata quishpichigrini. Caishujcunataca tucuicunata huasiman tigrachishpa cachailla” nirca.

⁸ Gedeonca paicuna charicushcacunatapish, trompetacunatapish saquirijcunapaj saquichishpami, tucui caishujcunataca paicunapaj carpa huasiman tigrachishpa cacharca. Chashna rurashpaca chai agllashca, 300 runacunallahuanmi chaipica saquirirca. Madianitacunapaj carpa huasicunaca chai uranijlla pugru pambapimi carca.

⁹ Chai tutallatajmi Mandaj Diosca, Gedeontaca: “Jatari, madianitacunapaj carpa huasicunaman uriyai. Paicunataca ñami cambaj maquipi churarcani.

¹⁰ Paicunapajman uriyanata manchacushpaca, cambajta ruraj Fura runahuanraj paicunapaj carpa huasicunaman uriyai.

¹¹ Chaipica paicunapura imata parlanacucujtami uyangui. Chaita uyashpami cambaj maquicunaca sinchi tucujpi macanacungapaj paicunapaj carpa huasicunaman uriyangui” nircami. Chaimi Gedeonca, paipajta ruraj Fura shuti runahuan uriyashpaca, macanacungapaj allichirishcacuna tiyacun carpa huasi c'uchuman rircacuna.

¹² Chaipica madianitacunapish, amalecitacunapish, inti llujshin llajta runacunapish langosta c'urucuna shina chai pugru pambataca tucui tapashcami carca. Paicunapaj camellocunapish mama cucha uripi tiyaj t'iyu allpa shina yallitaj achca pi mana yupaipajmi carca.

¹³ Gedeón ña chayashpaca, shuj runa pai muscushcata paihuan caj caishuj runaman parlacujtami uyarca: –Chai runaca ñucaca shuj muscuitami muscurcani. Shuj cebada tanda singumushpaca, cai ñucanchij madianitacunapaj carpa huasicamami singumurca. Carpa huasipi huajtarishpa, tucuita urmachishpa pambaman shitajpica, carpa huasica tucui urmashca saquirijtami muscurcani– nircami.

¹⁴ Chaimi paihuan caj caishuj runaca: –Chaica ima shujtajta mana nisha ningachu, israelcunapura Joaspaj churi Gedeonpaj espadatamari nisha ninga. Mandaj Diosca ñucanchij cai madianitacunatami tucui carpa huasicunandij Gedeonpaj maquipi churagringa– nircami.

¹⁵ Imata muscushcatapish, chai muscui imata nisha nishcatapish parlanacujta uyashpa, Diosta adorashpami, Gedeonca israelcunapaj carpa huasicunaman tigrashpaca: –Jatarichij, Mandaj Diosca madianitacunataca, paicunapaj carpa huasicunandijmari cancunapaj maquipi churashca– nirca.

¹⁶ Chaipica paihuan caj 300 runacunata quimsapi ch'icanchishpaca, tucuicunamanmi trompetacunata paicunapaj maquipi curca. Chushaj puñucunatapish curcami. Chai puñucuna ucupica nina sindicunami rupacurca.

¹⁷ Chai q'uipaca cashnami nirca: –Ñucata ricushpa ñuca ima shina rurashca shinallataj ruranguichij. Madianitacunapaj carpa huasicunaman chayashpa ima shina ñuca rurajpica chai shinallataj cancunapish ruranguichij.

¹⁸ Ñucapish, ñucahuan rijcunapish trompetapi tocajpica, cancunapish chai runacuna tiyacun muyundijpi trompetacunapi tocashpaca: Mandaj Diosmantapish, Gedeonmantapishmi macanacugrinchij ninguichij– nircami.

¹⁹ Chaupi tuta cuidaj soldadocunapaj cuidana horas chayajpi, paicuna cuidai callaricujpimi, Gedeonca paihuan rij patsaj runacunandij paicuna maipi tiyacunman c'uchuyarcacuna. Chaipimi trompetacunapi tocashpa, paicunapaj maquipi charicun puñucunatapish p'aquircacuna.

²⁰ Quimsapi ch'icanchishca runacunaca tucuicuna trompetacunapi tocashpa, puñucunataca p'aquishpami nina sindicunataca lluqui maquihuan japircacuna. Trompetacunata alli maquihuan japishpami: “Mandaj Diospaj, Gedeonpaj espadamantami macanacugrinchij” nishpa caparircacuna.

²¹ Madianitacunapaj carpa huasicuna muyundijtami israelcunaca paicuna maipi shayacushcallapitaj, mana cuyurishpa sinchita shayacurcacuna. Chaimantami madianitacunapaj soldadocunaca caparinacushpa miticushpa callparcacuna.

²² 300 israelcunaca trompetacunapi tocacujpi Mandaj Dios mandianitacunataca tucuicunata paicunapurallatataj caishujhuan chaishujhuan macanacuchijpimi, paicunapurallataj macanacurcacuna. Chaimantami madianitacunapaj tucui soldadocunaca Zerera pueblo ch'imbanij Bet-sita pueblocama, Tabatpi caj Abel-mehola pueblopaj lindecama callpashpa miticugrircacuna.

²³ Gedeonpish israelcunataca Neftalipaj, Aserpaj, Manasespaj tucui aillucunata tandachishpami, madianitacunata catishpa rircacuna.

²⁴ Gedeonca Efraín aillupaj tucui urcucunapipish huillachunmi huillajcunata cacharca: “Cancunaca madianitacunata tupangapaj uri richij. Jordanpaj, Bet-barapaj jatun yacucunata maillata ch'imbanallacunaman rishpa paicuna manaraj chayajpi chaipi ña shayacugrichij” nichunmi cacharca. Chaimi Efrainpaj ailluca tucuicuna tandanacushpa Jordanpaj, Bet-barapaj jatun yacucunata maillata ch'imbanallacunaman rishpa shayarinaman rircacuna.

²⁵ Madianitacunataca ishqui mandajcunatami prezu japircacuna paicunaca Oreb, Zeeb shuti jatun mandajcunami carca. Orebtaca jatun c'acapimi huañuchircacuna. Chai c'acataca Orebpaj c'aca nincunami. Zeebtaca, uvata capinapimi huañuchircacuna. Chaipi caj uvasta capina jutcutaca Zeebpaj uvata capina jutcu nincunami. Madianitacunata catishca q'uipaca, Orebpaj Zeebpaj umacunata apashcami, Jordán yacu ch'imba ladopi Gedeón cajpi chaiman shamurcacuna.