JUECES 4 - Dios Rimashca Shimicunami

Deborapish, Baracpish Sisarata mishashcami

¹ Aod huañushca q'uipaca israelcunaca, cutinllatajmi Mandaj Diospaj ñaupajpi millaita rurai callarircacuna.

² Chaimantami Mandaj Diosca, Canaán llajtata jatun mandaj Jabinpaj maquipi churarca. Pai mandashpa tiyanaca Hazor pueblopimi carca. Paipaj soldadocunata mandajca Sísara runami carca. Paica Haroset-goim pueblopimi causarca.

³ Jabín shuti mandajca, 900 fierro carrocunatami charirca. Paica israelcunataca, ishqui chunga huatacunatami jatunta llaquichishpa causarca. Chaimi israelcunaca Mandaj Diostaca caparishpa mañarcacuna.

⁴ Chai huatacunapica israelcunataca, Débora profeta huarmimi mandacurca. Paica Lapidot runapaj huarmimi carca.

⁵ Débora huarmica Deborapaj palmera yura nishca ucupimi tiyaj carca. Israelcunaca paicunapura p'iñacushcata Débora huarmi allichichunca chaimanmi rijcuna carca. Chaica Efrainpaj urcucunapi caj Ramá, Bet-el pueblocuna chaupipimi carca.

⁶ Chai Débora huarmimi, Cedespi causaj Neftalí aillupuramanta caj Abinoampaj churi Baracta cayanaman cachashpa cashna nirca: –Israelcunata Mandaj Diosca cantaca ¿manachu cashna mandarca?: Tabor urcuman rishpa cambaj gentecunata tandachi. Paicunataca Neftalipaj, Zabulonpaj aillucunamanta, 10.000 gentecunata canhuan cachun tandachi.

⁷ Ñucaca jatun mandaj Jabinpaj soldadocunata mandaj Sisaratami Cisón jatun yacuman paipaj carrocunandij, soldadocunandij cambajman shamuchun yuyaita cugrini. Chaipimi paicunataca cambaj maquipimi churasha nishpa Mandaj Diosca ¿manachu nirca?– nircami.

⁸ Chaimi Baracpish: –Can ñucahuan rijpica, ñucapish rishami. Can mana ñucahuan rijpica, ñucapish mana rishachu– nirca.

⁹ Shina nijpi Débora huarmica: –Shinashpaca, ñucapish canhuan risha. Cai macanacuipica, Sisarataca shuj huarmipaj maquipimi Mandaj Diosca churanga. Chaimanta chai macanacuita mishashcamantaca mana canchu alli nishca saquiringui– nijpimi, Débora huarmica jatarishcahuan Barac runahuan Cedesman rirca.

¹⁰ Barac runaca Cedespi Zabulonpaj, Neftalipaj aillucunamanta, 10.000 runacunata tandachishpami, macanacuiman huichiyarca. Débora huarmipish paihuanmi huichiyarca.

¹¹ Moisespaj suegro Hobab runapaj churi Heberca ceneocunapuramantami carca. Paica paicunapuramanta ch'icanyashpami, Cedes pueblo c'uchullapi caj Zaanaim pambapi tiyaj jatun yura c'uchullapi carpa huasita shayachishpa causacurca.

¹² Abinoampaj churi Barac runa macanacungapaj Tabor urcuman llujshishcatami, Sisaraman huillanaman chayamurca.

¹³ Chaimantami Sísara runaca tucui paipaj carrocunata tandachirca. Paica 900 fierro carrocunandij, tucui paipaj soldadocunandijmi tandachirca. Chashna tandachishpami Haroset-goimmantaca Cisón jatun yacucama rirca.

¹⁴ Débora huarmica Baractaca: –Jatari, cai punllami Mandaj Diosca Sisarataca, cambaj maquipi churashca. Mandaj Diosca cambaj soldadocunata ñaupashcami rigrin– nijpimi Baracca, pai tandachishca 10.000 soldadocunata ñaupashca Tabor urcumanta uriyarca.

¹⁵ Ña macanacungapaj shayarijpica, carropi caj soldadocunatapish, caishuj soldadocunatapishmi Baracpaj espadata manchana yuyaita Mandaj Diosca curca. Chaimi Sísara runaca paipaj carromanta uriyashcahuan chaquillahuan miticunaman callparca.

¹⁶ Barac runaca, Sisarapaj soldadocunataca, carrocunandij, soldadocunandijmi, Haroset-goimcama catishpa tucuchirca. Chai punllaca Sisarapaj soldadocunaca shujllapish mana saquirishpami espadapi tucuicuna huañurcacuna.

¹⁷ Sísara runaca chaquillahuan miticushpa rishpaca, ceneopuramanta caj Heberpaj huarmi Jaelpaj carpa huasipimi miticugrirca. Hazor pueblota jatun mandaj Jabinhuan ceneopuramanta caj Heber runapaj huasi ucupurahuanca mana p'iñanacushcacunachu carca. Chaimantami chaipi miticugrirca.

¹⁸ Jael huarmi Sisarata tupanaman llujshishpaca: –Ñuca amito, ama manchashpa ñuca huasiman shamupailla– nircami. Paipaj carpa huasiman yaicujpica, Jael huarmica shuj jatun linsohuanmi pilluchishpa churarca.

¹⁹ Chaipimi Sísara runaca: –Ñucami yacunaihuan cani, asha yacuta ubyachihuai– nishpa rogajpi, Jael huarmica lechehuan caj capachuta pascashpa ubyachun curca. Ña ubyajpica cutinllataj linsohuan pilluchircallami.

²⁰ Chaipimi Sísara runaca, Jael huarmitaca: –Carpa huasi pungullapi shuyai. Maijan shamushpa: Pi caipichu nishpa canta tapujpica: Mana pi caipichu ningui– nirca.

²¹ Sísara runaca shaicushca yallitaj dorminaihuan cashpami huañuita dormirca. Chaimi Heberpaj huarmi Jaelca carpa huasita charichina ishtacatapish, tacana mazotapish japishpa, Sisarapajman upajlla c'uchuyashpaca, rinrin jahuanijllapi sinchita tacashpa chai ishtacataca pambacama yaicuchirca. Chashnami Sísara runaca huañurca.

²² Sísara runata Barac catishpa ricujpimi, Jael huarmi tupanaman llujshishpaca: –Can mashcacushca runata shamui ricuchisha– nirca. Barac runa chai huarmipaj huasiman yaicushpaca Sisarataca, rinrin jahuanijpi ishtacata satishca, huañushca siricujtami ricurca.

²³ Chashnami Mandaj Diosca Canaanta jatun mandaj Jabintaca israelcunapaj ñaupajpi jatunta llaquichishpa cumurichirca.

²⁴ Chai punllamantapachami israelcunaca ashtahuan ashtahuan yallitaj c'ari c'ari tucushpa, Canaanta jatun mandaj Jabintaca tucui chingachingacama llaquichirca.