JUECES 20 - Dios Rimashca Shimicunami

Benjamín aillumanta parlanacungapaj tandanacushcami

¹ Ña alli yuyarinacushpaca tucui israelcunami, Mandaj Diospaj ñaupajpi tandanacurcacuna. Tucuicuna shuj yuyaillami Mizpapi tandanacurcacuna. Danpi causajcunamanta callarishpaca, Beersebapi causajcunacama Galaad llajtapi causajcunandijmi tandanacurcacuna.

² Tucui israelcunata pushajcunapish, tucui Israel aillucunapishmi chaipica tandanacurcacuna. Chai tandanacuipica tucui Dios agllashcacunami chaipi carcacuna. Chaquillahuan purij 400.000 soldadocunapishmi tandanacurcacuna.

³ Benjaminpaj ailluca israelcuna Mizpa pueblopi tandanacunaman huichiyashcataca ñami yacharcacuna. Israelcunaca levita runataca: –¿Ima shinataj cai shina millaitaca rurarcacunari?– nishpa tapujpimi,

⁴ huañushca huarmipaj cusa levita runaca: –Ñucaca Benjamín aillupaj Gabaa puebloman chayashpami, ñuca caishuj huarmindij chaipi pacaringapaj chaiman chayarcani.

⁵ Ashtahuanpish Gabaapi causajcunaca ñucata huañuchingapaj jatarishpami ñuca tiyacun huasi muyundijta shayarircacuna. Chaipimi ñuca caishuj huarmica yallitaj millaita rurajpi huañurca.

⁶ Chaita japishpami mirga mirgata p'itishpaca israelcuna causan tucui llajtacunaman cacharcani. Chashna huañuchishpa Israelpi yallitaj millaita rurashcamantami chashna cacharcani.

⁷ Tucui cancunami israelcuna canguichij. Chaimanta imata ruranatapish yuyarinami canchij– nircami.

⁸ Shina nijpica, tucuicuna shuj yuyailla jatarishpami: –Caipi caj tucui ñucanchijpuracunaca carpa huasimanpish mana rinachu, ñucanchij huasimanpish mana tigranachu canchij.

⁹ Gabaapi causajcunahuan macanacugringapaj maijanlla aillucuna rina cashcata sorteashpami huichiyana canchij.

¹⁰ Tucui Israel aillucunamantaca micunata apamugrichun 100 runacunamantaca 10 runacunata, 1.000mantaca 100 runacunata, 10.000mantaca, 1.000 runacunata cachashunchij. Caishujcunaca Gabaapi causaj Benjamín aillu paicuna ima shina yallitaj millaita rurashca shinallataj llaquichinaman richun. Paicunaca ñucanchij israelpurapica yallitaj millaitami rurashca– nircacunami.

¹¹ Chaipica tucui israelcuna shuj shinalla tucushpami, Gabaapi causajcunahuan macanacugrina tucurcacuna.

¹² Chaimantami tucui Israel aillucunaca Benjaminpaj aillu causan tucui llajtacunapi cashna nichun cacharcacuna: “Cancunapurapica ¿ima shinalla millaitataj rurashcanguichijchu imamí?.

¹³ Cunanca cai Gabaapi causaj millaita rurajcunata huañuchishpa israelpuramanta millaita anchuchingapaj chai millaita rurajcunataca ñucanchijman cuichij” nichunmi cacharcacuna. Paicunapaj huauqui israelcuna chashna nijpipish, Benjaminpaj ailluca mana uyasha nircachu.

¹⁴ Ashtahuanpish Benjaminpaj ailluca, caishuj israelcunahuan macanacunaman llujshingapajmi Gabaapi tandanacurcacuna.

¹⁵ Benjaminpaj aillupaj macanacuj runacunaca 26.000 soldadocunami carca. Gabaa pueblopi causaj 700 alli macanacunata yachaj runacunata mana yupashcami chaica carca.

¹⁶ Benjaminpaj aillu tucui chai runacunapica, lluqui maquillahuan imatapish ruraj, 700 runacunami agllashcacuna tiyarca. Tucui chai runacunaca huaracahuan shuj ajchapi rumita shitashpapish, manataj panda shitajcunami carca.

¹⁷ Israelcunaca Benjamín ailluta mana yupashcami, 400.000 soldadocuna espadacunahuan carca. Tucui chaicunaca macanacunata alli yachaj runacunami carca.

Tucui Israel aillucuna Benjamín ailluhuan macanacushcami

¹⁸ Chai q'uipami israelcunaca tucuicuna jatarishpa Diospaj huasiman huichiyashpa: “¿Benjaminpaj ailluhuanca, maijan aillutaj punta macanacugrina canchij?” nishpa Taita Diosta tapujpi paica: “Judapaj ailluraj macanacugrichun” nirca.

¹⁹ Chaimi israelcunaca cayandij tutamantaca Gabaapi causajcunahuan macanacugringapaj utca jatarircacuna.

²⁰ Chashnami israelcunaca Benjamín ailluhuan macanacungapaj llujshishpa rishpaca, Gabaa pueblo c'uchullaman chayashpa chaipi macanacunalla shayarircacuna.

²¹ Benjaminpaj aillu Gabaamanta israelcunahuan macanacungapaj llujshishpaca, paicunatarajmi chai punllalla 22.000ta huañuchircacuna.

²² Chashna cajpipish israelcunaca cutinllataj fuerzata japishpami, punta punlla macanacushcallapitaj macanacugringapaj yuyarircacuna.

²³ Chaimantaca israelcunaca Mandaj Diospaj ñaupajpi tutayangacama huacashpami Mandaj Diostaca: “¿Benjaminpaj aillu ñucanchij huauquicunahuanca cutin macanacugrishunchu?” nishpa tapujpi, Mandaj Diosca: “Ari, macanacunaman huichiyaichijlla” nirca.

²⁴ Chaimantami israelcunaca Benjaminpaj ailluhuanca caihuanca ishqui cutin macanacugrircacuna.

²⁵ Benjaminpaj aillu Gabaa pueblomanta cutinllataj israelcunahuan macanacungapaj llujshishpaca, 18.000 soldadocunatami huañuchircacuna. Chai israelcunaca tucuicunami espadahuan alli macanacunata yachajcuna carca.

²⁶ Chaimi tucui israelcunapish, tucui soldadocunapish, Taita Diospaj huasiman huichiyarcacuna. Mandaj Diospaj ñaupajpi tiyarishpami chai punllaca tutayangacama mana micushpa huacarcacuna. Mandaj Diosman cuna cashcatapish cushpami tucui rupachishpa curcacuna. Taita Dioshuan alli cangapajpish curcacunami.

²⁷ Mandaj Dioshuan ari ninacushca quillcata huaquichina arcaca, chai punllacunaca chaipi cajpimi israelcunaca Mandaj Diostaca tapurcacuna.

²⁸ Chai punllacunaca Eleazarpaj churi Finees Aaronpaj nietomi Mandaj Dioshuan ari ninacushca quillcata huaquichina arca ñaupajpica Taita Diospajta ruracurca. Chaipimi israelcunaca Mandaj Diostaca: “Benjaminpaj aillu ñucanchij huauquicunahuanca ¿cutinllataj macanacugrinachu canchij, mana cashpaca saquinallachu canchij?” nijpi, Mandaj Diosca: “Macanacunaman huichiyaichijlla, cayaca ñucami paicunataca cancunapaj maquipi churasha” nirca.

²⁹ Chaimi israelcunaca Gabaa pueblo muyundijpi pacalla chapajcunata churarca.

³⁰ Quimsa punllapica israelcunaca Benjaminpaj ailluhuan macanacungapajmi huichiyarcacuna. Paicunaca ñaupaman shinallatajmi Gabaa pueblo c'uchupi macanacunalla shayarircacuna.

³¹ Benjaminpaj ailluca cutinllataj israelcunahuan macanacungapaj tupanaman llujshishpa, chai pueblomanta caruyashpami, ñaupaman shinallataj israelcunataca ñancunapi huañuchishun nishpa catircacuna. Maijan israelcunaca Bet-elman rina ñanta, maijancunaca Gabaaman rina ñanta rijpimi, chai ñan pambacunapi quimsa chunga israelcunata huañuchircacuna.

³² Benjaminpaj ailluca: “Cunanpish sarun shinallatajmari ñucanchijllataj mishacunchij” ninacucurcacunami. Ashtahuanpish israelcunaca: “Pueblomanta ñancunacama paicunata caruyachingapaj ashtahuan miticushpa callpashunchij” nircacunami.

³³ Ña paicuna caruyajpimi, caishuj israelcunaca paicuna maipi cashcamanta jatarishpa Baal-tamar pueblo c'uchupi macanacunalla shayarircacuna. Gabaa pueblo c'uchulla q'uihua pambacunapi miticushpa tiyacuj israelcunapish paicuna pacatushcamanta llujshishpa shamushpami,

³⁴ Gabaapi causajcunahuan macanacurcacuna. Paicunaca israelcunapuramanta agllashca, ashtahuan alli macanacunata yachaj 10.000 runacuna cashpami ña macanacushpaca ashtahuan mishashpa catirca. Benjaminpaj ailluca israelcuna paicunata mishajpi ña llaqui tucugrishcataca mana yacharcacunachu.

³⁵ Israelcunaca Mandaj Dios mishachijpimi, chai punllallataj Benjaminpaj aillutaca, espadahuan alli macanacunata yachaj 25.100ta huañuchircacuna.

³⁶ Chaimi Benjaminpaj ailluca ña paicunataca mishashca cashcata ricurcacuna. Caishuj israelcunaca, Gabaa pueblo muyundijpi miticushpa tiyacuj runacuna chaipi macanacushpa mishana cana cashcatataj yuyashpami miticushpa callpacuj shina tucurcacuna.

³⁷ Gabaa pueblo muyundijpi miticushpa tiyacuj runacunaca chai pueblopi causajcunataca, utca rishpami cungaimanta tucuicunata espadahuan huañuchircacuna.

³⁸ Chai pueblo muyundijpi miticushpa tiyacuj israelcunahuan caishuj israelcunahuanca: “Gabaa pueblomanta achca cushni llujshicujpica, ñucanchijca chai puebloman yaicushpa ña mishacushcata yachanguichij” nishpami, parlanacushca carca.

³⁹ Chai macanacuipica Israel runacunaca cutinllataj manchaj shina callpashpa rijpimi, Benjaminpaj ailluca catishpa rishpa, quimsa chunga israelcunata huañuchishpaca: “Cunanpish paicunaca punta macanacuipi shinallatajmari ñucanchij maquipi urman” ninacucurcacuna.

⁴⁰ Ashtahuanpish Benjaminpaj ailluca chai pueblomanta cushni llujshi callaricujpi tigralla ricushpaca, chai pueblomantaca jahua pachacama achca cushni llujshicujtami ricurcacuna.

⁴¹ Chaipimi israelcunaca paicunahuan macanacungapaj tigrarijpi, Benjaminpaj aillupica yallitaj manchai jundarca. Paicunataca yallitaj llaqui ña llapishcata ricushpami chashna tucurcacuna.

⁴² Chaimantami paicunaca tigrashpa israelcunata ñaupashca shitashca pamba ñanta callparcacuna. Ashtahuanpish mishacuj israelcunaca ashtahuanmi catirca. Pueblocunamanta llujshijcunapish ñanpi tupashpami, jarcashpa paicunataca huañuchircacuna.

⁴³ Israelcunaca Benjaminpaj aillutaca tucuita muyunchishpami, Menúha pueblomantaca inti llujshin lado ch'imbapurapi caj Gabaa pueblocama callpachishpa tucuicunata ñuturcacuna.

⁴⁴ Benjaminpaj ailluca, 18.000 runacunami israelcunapaj maquipi urmarcacuna. Paicunaca tucuicunami macanacunata alli yachajcuna carca.

⁴⁵ Puchushcacunaca Rimón peñapi miticungapajmi shitashca pambata tigrashpa callparcacuna. Israelcuna ñancunapi cati japijpica, 5.000 runacunami paicunapaj maquipi urmashpa huañurcacuna. Israelcunaca Gidom pueblocama catishpami 2.000 runacunahuanpish huañuchircacuna.

⁴⁶ Chai punllaca Benjaminpaj aillu runacunaca 25.000 alli macanacunata yachajcunami huañurcacuna. Paicunaca tucuicunami macanacunata alli yachajcuna carca.

⁴⁷ Benjaminpaj aillu runacunaca, 600 runacunallami shitashca pambaman callpashpa, Rimón peñapi miticushpa mana huañurcacuna. Paicunaca chai Rimón peñapimi chuscu quillata causarcacuna.

⁴⁸ Israelcunaca cutin tigrashpami, Benjaminpaj aillupura manaraj huañuchishcacunataca tucui pueblocunapi tucuicunata animalcunandij, paicunapi ricurijcunataca tucuicunata espadahuan huañuchircacuna. Pueblocunatapish paicunapi ricurijtaca tucuitami rupachircacuna.