Juan 9 - Dios Rimashca Shimicunami

Mana ricuj huacharishca runata Jesús alliyachishcami

¹ Jesús chaimanta rishpaca, mana ricuj huacharishca shuj runatami ricurca.

² Paipaj yachacujcunaca: –Yachachij, cai runa chashna huacharichunca ¿paillatajchu, mana cashpaca paipaj yaya mamachu juchallishca canga?– nircacunami.

³ Shina nijpi Jesusca: –Paipish, paipaj yaya mamapish mana juchallircachu. Ashtahuanpish Taita Diosca pai rurai tucushca cai runapi ricurichunmi chashnaca huacharirca.

⁴ Ñucata cachaj Yaya imallata rurai nishcataca punllaraj cajpimi, rurana cani. Ña tutayajpica pi mana imata rurai tucunchu.

⁵ Ñuca cai pachapi cashparajca, cai pachapi causajcunata achijyachij luzmi cani– nircami.

⁶ Chashna nishpaca, allpata ch'ucahuan chapushpami mana ricujpaj ñahuita llihuishpa,

⁷ cashna nirca: –Ri, Siloé tanque yacupi maillarigri– nircami. Siloé shimica: “Cachashca” nisha ninmi. Pai maillarigrishpaca, ricucujmi tigrarca.

⁸ Alliyashcata ricushpami c'uchullapi causajcunapish, mana ricuj cashcata ñaupaman ricujcunapish: –Caica ¿manachu caridadta mañashpa tiyacuj runa?– nircacuna.

⁹ Shujcunaca: “Paitajmari” nircacunami. Cutin caishujcunaca: “Paitajmari yuyachin” nircacunami. Chaimi paica: “Ñucatajmari cani” nijpi,

¹⁰ –¿Ima shinataj cambaj ñahuica ricucuj tucurcari?– nircacuna.

¹¹ Chaimi paica: –Jesús shuti runamari allpata ch'ucahuan chapushpa, ñuca ñahuipi llihuishpaca: “Ri, Siloé tanque yacupi maillarigri” nijpi, rishpa maillarishpaca, ñapish ricurcanillami– nircami.

¹² Shina nijpica: –¿Maipitaj chai runaca?– nijpi chai runaca: –Imatajshiyari. Mana yachanichu– nirca.

Ñahuita alliyachishca runata fariseocuna tapushcami

¹³ Mana ricuj cashca runataca, fariseocunapajmanmi pusharcacuna.

¹⁴ Ch'ucahuan allpata chapushpa ñahuipi llihuishpa Jesús alliyachi punllaca, samana punllami carca.

¹⁵ Chaimantami fariseocunapish ima shina ñahui ricuj tucushcata tapurcacuna. Chaimi paica: –Allpata ch'ucahuan chapushpa ñuca ñahuipi llihuijpi maillarigrishpaca ñapish ricurcanillami– nijpimi,

¹⁶ maijan fariseocunaca: –Samana punllata mana huaquichij runaca, maitataj Taita Dios cachashca cangari– nircacuna. Maijancunaca: –Chai runaca juchayuj cashpaca ¿ima shinataj pi mana rurai tucuipajtaca rurangari?– nircacunami. Chashnami paicunapurallataj caita chaita yuyashpa ch'ican ch'ican yuyai tucurcacuna.

¹⁷ Chaimi mana ricuj cashca runataca: –Cambaj ñahuita alliyachij runataca ¿ima cashcatataj yuyangui?– nishpa cutin tapujpica: –Ñucaca paitaca Taita Dios huillachijpi huillaj cashcatami yuyani– nirca.

¹⁸ Ashtahuanpish judiocunaca, chai runa mana ricuj cashcata alliyachishca cashcataca mana crircacunachu. Chaimantami chai runapaj yaya mamata cayashpa,

¹⁹ cashna tapurcacuna: –¿Caica ñahui mana ricuj huacharishca nicushca cancunapaj churichu? ¿Ima shinataj cunanca ricuj tucurca?– nircacunami.

²⁰ Chaimi paipaj yaya mamaca: –Caica mana ricuj huacharishca ñucanchij churitajmari.

²¹ Ima shina ricuj tucushcataca mana yachanchijchu. Pi paipaj ñahuita alliyachishcatapish mana yachanchijchu. Paica juilluyujmi, paillatataj tapuichij huillangallami– nircacuna.

²² “Judiocunaca ñaupamanmi Jesusca Mesiasmi nishpa maijanpish huillajpica, sinagogamanta llujshichishpa shitashcami canga” nishpa yuyarinacushca carca. Chaita manchashcamantami chai yaya mamaca chashna nircacuna.

²³ Chaimantami chai yaya mamaca: “Juilluyujmi, paillatataj tapuichij” nircacuna.

²⁴ Shina nijpimi mana ricuj cashca runata cutin cayashpaca: –¡Taita Dios ricucunmi ama llullashpa ñucanchijman huillai! Ñucanchijca chai runataca juchayuj cashcatami yachanchij– nircacuna.

²⁵ Chashna nijpica: –Paica juchayujchu, manachu juchayuj mana yachanichu. Ñucaca mana ricuj cashca cashpapish cunanca ricuj cashcallatami yachani– nircami.

²⁶ Shina nijpipish cutinmi: –¿Imatataj cantaca rurarca? ¿Ima shinataj cambaj ñahuitaca alliyachirca?– nircacuna.

²⁷ Chaimi paica: –Ñataj shina huillani. Manamari uyashcanguichijchu. ¿Ima nishpataj cutin huillachun ninguichij? ¿Cancunapishchu paipaj yachacujcuna tucushun ninguichij?– nirca.

²⁸ Chashna nijpica p'iñarishpami cashna nircacuna: –Canmari paipaj yachacuj cangui. Ñucanchijca, Moisespaj yachacujcunami canchij.

²⁹ Ñucanchijca Moiseshuan Taita Dios rimashcatami yachanchij. Ashtahuanpish chai runataca, maimanta cashcatapish mana yachanchijchu– nircacunami.

³⁰ Chaimi chai runaca: –Ñuca ñahuita alliyachijtaca cancunaca maimanta cashcata mana yachajpica chaica mancharinami.

³¹ Taita Diosca juchayujcunataca mana uyaj cashcataca yachanchijmi. Pipish Taita Diosta manchaj, Taita Diospaj munaita rurajllatami uyan.

³² Mana ricuj huacharishcata pi alliyachin nijtaca, manataj uyashcanchijchu.

³³ Taita Dios mana cachashca cashpaca, paica imata mana rurai tucunmanchu– nircami.

³⁴ Chashna nijpica: –Canca juchapimi huacharishcangui. ¿Ñucanchijtachu yachachisha ningui?– nishpaca, caipica ña mana ashtahuan tandanacui tucunguichu nishpami llujshichishpa cacharcacuna.

Taita Diospajta entendinapajca yuyaicuna huichcashcami canguichij nishcami

³⁵ Chai runataca sinagogamanta llujshichishpa cachashca cashcata Jesús yachashpami paihuan cutin tupashpaca: –Canca ¿Taita Diospaj Churitaca cringuichu?– nijpi,

³⁶ chai runaca: –Amito ¿pitaj paica, ñuca paita cringapaj?– nirca.

³⁷ Chaimi Jesusca: –Paitaca ricucunguillatajca, canhuan rimacujca paitajmari– nijpimi,

³⁸ –Amito, crinimi– nishpa paipaj ñaupajpi cungurishpa adorarca.

³⁹ Chaipimi Jesusca: –Ñucaca cai pachamanca cai pachapi causajcuna imalla rurashcata ricuchingapajmi shamurcani. Mana ricucujcunataca ricujta rurangapaj, ricucujcunataca mana ricujta rurangapajmi shamurcani– nircami.

⁴⁰ Shina nijpi paihuan caj fariseocunaca: –Shinashpaca ¿ñucanchijpish mana ricujcunachari canchigari?– nircacunami.

⁴¹ Chaimi Jesusca: –Mana ricujcuna cashpaca, jucha illajcunami canguichijman. Ashtahuanpish cunanca: “Ricujcunami canchij” nishcamantaca juchayujcunallatajmi saquiringuichij.