Juan 8 - Dios Rimashca Shimicunami

Huainayashpa causaj huarmita Jesuspajman pushashcami

¹ Chai q'uipami Jesusca, Olivocuna tiyan urcuman rirca.

² Cayandij tutamantaca Jesusca Taita Diospaj huasimanmi tigramurca. Chaipica tucuicuna paipajman shamujpimi tiyarishpa paicunata yachachirca.

³ Chaimanmi mandashcacunata quillcajcuna, fariseocunapish huainayacujta japishca huarmita pushamushpaca tucui chaipi cajcunapaj chaupipi churashpa,

⁴ cashna nircacuna: –Yachachij, cai huarmitaca huainayacujtamari japimushcacuna.

⁵ Moisés Mandashcapica, chashna huarmicunataca, rumicunahuan shitashpa huañuchichun ninmi. Canca caitaca ¿imatataj ningui?– nircacunami.

⁶ Jesús ima nijta uyashpa juchachinga raicullami chashna nircacuna. Ashtahuanpish Jesusca cumurishpami, pambapi maquihuan quillcacurca.

⁷ Paicuna cutin cutin tapucujllapimi, Jesusca: –Cancunamanta maijan jucha illaj cashpaca, pairaj cai huarmita rumihuan shitachun– nirca.

⁸ Shina nishpaca pambaman cutin cumurishpami, dedohuan pambapi ashtahuan quillcacurcalla.

⁹ Chashna nijta uyashpaca, paicunapaj yuyaillapitaj mana alli cashcata yuyarishpami yuyajcunamanta callarishpa q'uipa huiñaicunacama shuj shujlla rircacuna. Jesusca, chai huarmindijllami saquirirca.

¹⁰ Jesús shayarishpa pita mana ricushpaca, chai huarmitaca: –¿Maipitaj canta juchachicujcunaca? ¿Manachu maijan cantaca huañunami cangui nirca?– nijpimi,

¹¹ chai huarmica: –Amito, pi mana imata nincunachu– nijpi Jesusca: –Ñucapish imata mana ninichu. Rilla, pajta cutin juchallinguiman– nirca.

Jesusca cai pachapaj luzmi

¹² Jesús cutin yachachi callarishpaca: –Ñucaca cai pachapi causajcunapaj luzmi cani. Maijanpish ñucata catijca, mana amsapi puringachu. Ashtahuanpish causaita cuj luztami charinga– nijpimi,

¹³ fariseocunaca: –Canca, canllataj alli ricuringa raicullami huillacungui. Canllataj huillarishcaca yangallami– nircacuna.

¹⁴ Chaimi Jesusca: –Ñucallamantataj huillashpapish, ñucaca ima shina cashcatatajmi huillani. Ñucaca maimanta shamushcata, maiman rina cashcatapish yachanimi. Cancunaca ñuca maimanta shamushcata, maiman rigrishcatapish mana yachanguichijchu.

¹⁵ Cancunaca cai pachapi causajcuna ruraj cashca shinallatajmi ñahuita ricushpalla juchachinguichij. Ñucaca pita mana chashnaca juchachinichu.

¹⁶ Pitapish imalla rurashcata ñuca ricuchishpaca ima shina cashcatatajmi ricuchini. Chashna rurangapajca mana ñucallachu cani, ñucata cachaj Yayahuanmi cani.

¹⁷ Cancunapaj mandashcapica: “Ishqui huillajtaj chai shinallataj huillajpica, mana yangachu” nishpami quillcashca tiyacun.

¹⁸ Shina cajpica ñucapish ñucallamantataj huillajmi cani. Ñucata cachaj Yayapish ñucallamantataj huillajmi– nircami.

¹⁹ Chaimi paicunaca: –¿Maipitaj cambaj Yayaca?– nircacuna. Shina nijpi Jesusca: –Ñucatapish, ñuca Yayatapish mana rijsinguichijchu. Ñucata rijsishpaca, ñuca Yayatapish rijsinguichijmanmi– nirca.

²⁰ Jesusca, Taita Diospaj huasipi yachachicushpami, ofrendata cushpa churana c'uchupi cashpa chashnaca nirca. Chaipica paita japina horas manaraj pajtajpimi, mana pi japircacuna.

Ñuca ricunmanca cancunaca mana ri tucunguichijchu nishcami

²¹ Jesusca cutinmi paicunataca: –Ñucaca rigrinimi. Ñucataca mashcanguichijmi. Ashtahuanpish juchapi huañushca cashcamanta ñuca maipi canmanca cancunaca mana ri tucunguichijchu– nijpimi,

²² judiocunaca: –¿Paillataj huañuchirinata yuyashpachu: “Ñuca ricunmanca, cancunaca mana ri tucunguichijchu” nin imashi?– nircacuna.

²³ Chaimi Jesusca: –Cancunaca cai jucha pachamantami canguichij, ñucaca jahua pachamantami cani. Cancunaca cai pachamantami canguichij, ñucaca mana cai pachamantachu cani.

²⁴ Chaimi cancunataca cancunapaj juchallapitajmi huañunguichij nircani. Chashna nishca shinallatajmi ñuca pi cashcata mana crishpaca cancunapaj juchallapitaj huañunguichij– nirca.

²⁵ Chashna nijpimi: –Canca ¿pitaj cangui?– nijpi Jesusca: –Ñuca pi cashcataca callarimantami cancunamanca ña huillarcani.

²⁶ Cancunataca achcata ninatami charini. Cancuna ima shina cashcataca chaitataj ricuchishpami rimana cani. Ñucata cachaj Yayaca ima shina cashcatataj rimajmi. Ñucaca pai ima shina rimangui nishca shinallatajmi cancunataca rimani– nircami.

²⁷ Chaita uyajcunaca Yaya Diosmanta Jesús chashna rimacushcataca mana entendircacunachu.

²⁸ Chaimi Jesusca cashna nirca: –Runa Aichayuj ñucataca jahuaman huarcushpami, ñuca pi cashcataca rijsinguichij. Imatapish ñuca quiquinllamantatajca mana ruranichu. Ñuca Yaya yachachishcallatami rimani.

²⁹ Ñucata cachaj Yayaca ñucahuanmi. Ñucaca pai munashcallatami rurani. Chaimantami ñucallataca mana saquin– nircami.

³⁰ Jesús chashna rimajpica, achcacunami paita crircacuna.

Mana llullami huatashca shinamantaca cacharichin

³¹ Jesusca, paita crij judiocunataca cashnami nirca: –Ñuca yachachishcacunata catirashpaca, ñuca yachacujcunatajmi canguichij.

³² Chashna cashpami, mana llullataca rijsinguichij. Chai mana llullami huatashca shinamanta cacharichinga– nijpimi,

³³ paicunaca: –Abrahampaj huahua huahuacunamari canchij. Pipaj huatashca mana canchijchu. ¿Ima nishpataj canca: “Cacharichishcami canguichij” ninguiyari?– nircacuna.

³⁴ Chaimi Jesusca: –Pipish juchata rurana yuyailla rurashpa causajca, huatashca shinami juchapi causan. Chaica chashnatajmi.

³⁵ Amopajta rurajca amopaj huasipica mana causacungallachu. Churimi causacungalla.

³⁶ Chashna cajpica cancunata huatashcamanta Taita Diospaj Churi cacharichijpica ña cacharichishcatajmi canguichij.

³⁷ Abrahampaj huahua huahuacuna cajtaca yachanitajmari. Shina cashpapish, ñuca yachachishcacunaca mana cancuna munashca cajpi mana chasquishpami, ñucataca ima shinapish huañuchishun nicunguichij.

³⁸ Ñucaca Yayapaj c'uchupi cashpami paimanta imata ricushcata huillani. Cancunaca cancunapaj yayahuan cashpami pai rurai nishcata ruracunguichij– nircami.

Cancunaca diablopaj huahuacunami canguichij nishcami

³⁹ Chaimi paicunaca: –Ñucanchij yayaca Abrahammi– nircacuna. Chaimi Jesusca: –Abrahampaj huahua huahuacuna cashpaca, Abraham rurashca shinallatajmi ruranguichijman.

⁴⁰ Taita Diosmanta imata uyashcataca chaitataj huillashcamantami, cunanca ñucataca ima shinapish huañuchishun nicunguichij. Abrahamca mana chashna rurajchu carca.

⁴¹ Cancunaca, cancunapaj yaya ruraj cashca shinallatajmi ruracunguichij– nijpimi, paicunaca: –¡Ñucanchijca mana huainapaj huahuacunachu canchij! ¡Ñucanchijca shujlla Yaya Diostami charinchij!– nircacuna.

⁴² Chaimi Jesusca: –Cancunapaj Yaya, Taita Dios cajpica, ñucataca c'uyanguichijmanmi. Ñucaca, Taita Diospajmantami shamurcani. Mana ñuca yuyaillamantachu shamurcani. Paimari ñucataca cacharca.

⁴³ ¿Ima nishpataj ñuca yachachishcataca mana entendinguichigari? Cancunallataj mana uyasha nishcamantami mana entendinguichij.

⁴⁴ Cancunapaj yayaca diablomari. Paipaj munaillatami rurashun ninguichij. Paica callarimanta huañuchijmi, yallitaj jatun llullami. Tucui pai nishcacunaca llullami. Llullashpaca pai ima shina cashca shinallatajmi llullan. Llullata callarichij cashcamanta llullapaj yayami.

⁴⁵ Chashna cashpami cancunaca mana llullashpa ñuca huillashcataca mana cringuichij.

⁴⁶ ¿Maijan cancunataj juchata ñuca rurashcata ricuchi tucunguichij? Shinashpaca ima shina cashcatataj huillacujpica ¿ima nishpataj ñucataca mana cringuichij?

⁴⁷ Maijanpish Taita Diospajtaj cajca, paipaj Shimitaca uyanllami. Ashtahuanpish cancunaca mana Taita Diospaj cashpami paipaj Shimitaca mana uyashun ninguichij– nircami.

Cristoca Abrahampaj ñaupami ña tiyashca nishcami

⁴⁸ Jesús chashna nijpimi judiocunaca: –Canca supaitamari charingui. Samariataj Samaria nishpaca, allitajmari nishcanchij– nircacunami.

⁴⁹ Chaimi Jesusca: –Ñucaca mana supai japishcachu cani. Ñuca Yayatamari cazucuni. Cancunaca ñucatamari yanganchinguichij.

⁵⁰ Mana ñucachu ñucata alli nichunca munani. Taita Diosmi ñucata alli nichunca munan. Ñucata mana chashna nijpica paillatajmi imatapish ninga.

⁵¹ Pipish ñuca yachachishcacunata cazujca, manataj huañungachu. Chaica chashnatajmi canga– nijpimi,

⁵² judiocunaca: –Abrahampish, profetacunapish huañurcami. Canca: “Pipish ñuca yachachishcacunata cazujca mana huañungachu” ninguimi. Cunantajca cantaca supai japishca cashcatami yachanchij.

⁵³ ¿Canca, ñucanchij ñaupa yaya Abrahamta yallichari canguiyari? Paipish, profetacunapish huañurcacunami. Canca ¿pi cashcatataj yuyanguiyari?– nircacunami.

⁵⁴ Chaimi Jesusca: –Ñucallataj allimi cani nirijpica, ñuca allimi cani nirishcaca yangallami canman. Ñuca Yayami ñucataca alli nin. Paillatatajmi cancunapish ñucanchij Taita Diosmi nicunguichij.

⁵⁵ Chashna nishpapish cancunaca paitaca mana rijsinguichijchu. Ñucaca paitaca rijsinimi. Rijsishca jahuallataj mana rijsinichu nishpaca, cancuna shinallataj llullami caiman. Ñucaca paita rijsishcamantami, paipaj Shimi nishcata pajtachini.

⁵⁶ Cancunapaj ñaupa yaya Abrahamca, ñuca shamuna punllata ricuna cashcamanta cushicurcami. Ricushpacarin, ashtahuanmi cushicurca– nijpimi,

⁵⁷ judiocunaca: –Manaraj pichca chunga huatayujllapish canguica. ¿“Abrahamta ricurcani” ninguichu imamí?– nircacuna.

⁵⁸ Shina nijpi Jesusca: –Abraham manaraj tiyajpimi, ñucaca ña tiyarcani. Chaica chashnatajmi– nirca.

⁵⁹ Chashna nijpica Jesusta shitangapajmi rumicunata japircacuna. Ashtahuanpish Jesusca pacatucushpami, Taita Diospaj huasimanta paicunapaj chaupillatataj llujshishpa rirca.