Juan 7 - Dios Rimashca Shimicunami

Jesustaca paipaj huauquicunapish mana crishcachu

¹ Chai q'uipaca Galileapimi Jesusca yachachishpa puricurca. Judiocuna ima shinapish huañuchishun nicushcamantami Judeamanca mana rirca.

² Ñaupa yayacuna carpa huasicunallata shayachishpa causamushcata judiocuna yuyarina fiestami chayamucurca.

³ Chaimi Jesuspaj huauquicunaca: –Caimanta llujshishpa Judeaman ri. Canta catijcunapish can imalla rurashcacunata ricuchun.

⁴ Tucuicuna rijsishca casha nishpaca pi imata mana pacalla ruranchu. Chaimanta can ruracushcacunataca tucuicunapaj ñaupajpi rurashpa ricuchigri– nircacunami.

⁵ Paipaj huauquicunapish Jesustaca Quishpichij cashcataca mana crircacunachu.

⁶ Chaimi Jesusca: –Ñuca rina punllaca manaraj chayamunchu. Ashtahuanpish cancunapajca ima horaspish rinallamari.

⁷ Cancunataca cai pachapaj cajcunaca mana p'iñanchu. Ashtahuanpish ñucataca, paicuna rurashcacuna mana allichu nishpa huillajpimi p'iñancuna.

⁸ Cancunaca chai fiestamanca richijlla. Ñuca rinaca manaraj chayamujpimi, chai fiestamanca ñucaca manaraj rini– nircami.

⁹ Paicunaman chashna nishpaca, Jesusca Galileapimi saquirirca.

Jesusca judiocunapaj fiestapi cashcami

¹⁰ Paipaj huauquicuna rishca q'uipami, Jesuspish chai fiestamanca pi mana yachajllapi pacalla rirca.

¹¹ Judiocunaca chai fiestapi Jesusta mashcacushpaca: –¿Maipishi chai runaca?– ninacurcacunami.

¹² Chaipi caj achcacunaca Jesusmanta paicunapura achcata parlanacushpaca, shujcunaca: “Chai runaca allimari” nircacunami. Cutin maijancunaca: “Gentecunataca umacunllamari” nircacunami.

¹³ Judiocunata manchashcamantami, tucuicunapaj ñaupajpica Jesusmantaca pi mana parlanacui tucurcacuna.

¹⁴ Chai fiesta ña chaupiyagrijpica, Jesusca Taita Diospaj huasiman rishpa chaipi yachachi callarijpimi,

¹⁵ judiocunaca: –¿Ima shinataj caica, jatun yachanacunapi mana yachagrishca cashpapish cai tucuitaca yacharcari?– nishpa mancharircacuna.

¹⁶ Chashna ninacucujpimi, Jesusca: –Ñucaca mana ñuca yuyaimantachu yachachini. Ashtahuanpish ñucata cachaj Yaya yachachi nishcallatami yachachini.

¹⁷ Maijanpish Taita Diospaj munaita rurasha nijmi, cai ñuca yachachicunca Taita Diospaj cashcata, mana cashpaca ñuca yuyaillamanta rimacushcata yachanga.

¹⁸ Maijanpish paipaj quiquin yuyaillamanta huillajca, shujtajcuna paita alli nichunllami munan. Ashtahuanpish paita cachaj Yayata jatunyachichun huillacujca mana llullachu, mana ñahuita ricushpalla imatapish rurajchu.

¹⁹ Moisesca ¿manachu cancunamanca Taita Dios Mandashcata curca? Chai mandashcataca cancunaca pi mana cazucunguichijchu. ¿Ima nishpataj ñucataca huañuchishun nicunguichigari?– nircami.

²⁰ Chaimi chaipi caj achcacunaca: –Supai japishcami cangui. ¿Pitaj cantaca huañuchishun nicun?– nircacuna.

²¹ Chaimi Jesusca cashna nirca: –Pi mana rurai tucushcata rurashcamantami tucuicuna mancharinguichij.

²² Moisesman cushca mandashcapica circuncisionta rurachun ninmi. Chaita pajtachingapajca samana punlla cajpipish ruranguichijllami. (Chai mandashcaca mana Moisespaj punllallamantachu callarirca, ashtahuanpish ñaupa yayacunamantami ña callarishca carca).

²³ Moisés mandashcata mana p'aquingapajca samana punlla cajpipish, circuncisiontaca ruranguichijllami. ¿Samana punllapi shuj runata tucuita alliyachishcamantachu ñucahuanca p'iñaringuichij?

²⁴ Mana alli yuyachijllapica ama juchachichijchu. Ashtahuanpish ima shina cashcata alli yachashpataj mana allichu nichigari– nircami.

Jesusca pai jahua pachamanta cashcata huillashcami

²⁵ Jesús chashna nijpimi Jerusalenpi causaj maijancunaca cashna nircacuna: –Caica ¿manachu huañuchishun nishpa mashcacushca runa yuyachin?

²⁶ Riquichij, tucuicunaman huillacujpipish, paitaca pi imata mana ninca. ¿Mandajcunaca paitaca Cristo cashcatachu yuyancuna imashi?

²⁷ Ñucanchijca pai maimanta cashcataca yachanchijmi. Ashtahuanpish Cristo shamujpica, pai maimanta cashcataca pi mana yachangacunachu ninmi– nircacunami.

²⁸ Chashna nishcamantami Jesusca Taita Diospaj huasipi yachachicushpaca sinchita rimashpa cashna nirca: –Shinashpaca, ñucataca rijsishcanguichijmi. Maimanta cashcatapish yachashcanguichijmi. Ñucaca Taita Dios cachajpi shamujmi cani. Mana ñucallatajchu shamurcani. Paitaca cancunaca mana rijsinguichijchu. Paica mana llullachu.

²⁹ Ñucaca paipajmanta shamushcamantami paitaca rijsini. Paimari ñucataca cacharca– nircami.

³⁰ Shina nijpi paita japinata yuyacushpapish paita japina horas manaraj chayamushcamanta pi mana japi tucurcacunachu.

³¹ Chaipi cajcunamanta achcacuna Jesusta crishpaca: –Pai mana Cristo cajpica Cristo shamushpaca ¿cai runa rurashcacunatapish yallitachu ruranga imashi?– nircacunami.

Fariseocunaca Jesusta japinaman soldadocunata cachashcami

³² Jesusmanta tucuicuna chashna parlanacucujta fariseocuna uyashpaca, curacunata mandajcunahuan, fariseocunahuan tucushpami Jesusta prezu japimuchun soldadocunata cacharcacuna.

³³ Chaipimi Jesusca: –Ashacamallami cancunahuan cani. Chaimantaca ñucata cachajpajman tigrashpa rishallami.

³⁴ Cancunaca ñucataca mashcanguichijmi. Mashcashpapish mana japinguichijchu. Ñuca maipi canmanca, cancunaca mana shamui tucunguichijchu– nircami.

³⁵ Chaimi judiocunaca paicunapura cashna ninacurca: –Ñucanchij mana japi tucuchunca ¿Caica maimanshi rigrin? ¿Griegocunapaj llajtapi causacuj israelcunapajman rishpa griegocunata yachachinamanchu ringa, imashi?

³⁶ Paica: “Ñucataca mashcanguichijmi, mashcashpapish mana japinguichijchu. Ñuca maipi canmanca, cancunaca mana shamui tucunguichijchu” nishpaca ¿imatashi nisha nin?– nircacunami.

Causaiyuj pajchacuj jatun yacumi

³⁷ Fiesta tucuri jatun punllapimi, Jesusca shayarishpa sinchita cashna nirca: –Maijanpish yacunaihuan cashpaca ñucapajman shamushpa ubyaichij.

³⁸ Quillcachishcapi nishca shinaca: “Ñucata crijpaj shungu ucumantaca, causaiyuj achca jatun yacumi pajchacungalla” ninmi– nircami.

³⁹ Shina nishpaca, paita crijcuna Taita Diospaj Espirituta chasquina cashcatami huillarca. Jesusta manaraj sumajyachijpimi, jucha illaj Espirituca manaraj shamurca.

Jesusmantaca caita chaitami yuyarcacuna

⁴⁰ Chaipi caj achcacuna Jesús huillashcata uyashpaca maijancunaca: “Caitajca Taita Dios cachasha nishca profetatajmari” nircacunami.

⁴¹ Shujtajcunaca: “Caitajca Cristomi” nircacunami. Maijancunaca: “¿Galileamantachari Cristoca shamungari?.

⁴² ¿Manachu Quillcachishcapica: David causashca Belén pueblomanta paipaj huahua huahuapuramantami Cristoca shamunga nin?” nircacunami.

⁴³ Chashna ninacushpami Jesusmantaca, caita chaita yuyarcacuna.

⁴⁴ Maijancunaca Jesustaca prezu japishun yuyashpapish, mana japi tucurcacunachu.

Jesustaca pai shinatajca pi mana rimashcachu nishcami

⁴⁵ Jesusta japinaman cachashcacuna tigramujpica, curacunata mandajcunapish, fariseocunapish: –¿Ima nishpataj mana japimunguichij?– nishpa tapujpimi,

⁴⁶ paicunaca: –¡Chai runa shinatajca pi mana rimashcachu!– nircacuna.

⁴⁷ Chaimi fariseocunaca: –¿Cancunatapishchu crichirca?

⁴⁸ ¿Mandajcuna, fariseocunaca maijanllapish paitaca crishcachari?

⁴⁹ Ashtahuanpish paita crijcunaca Mandashcata mana yachaj, llaquichishca canapaj cajcunallami– nijpimi,

⁵⁰ Jesuspajman tuta shamuj, fariseopuramanta Nicodemoca cashna nirca:

⁵¹ –Ñucanchij Mandashcapi nishca shinaca maijantapish pai rimashcata manaraj uyashpa, pai imata rurashcata manaraj alli yachashpaca mana juchachinallachu ninmi– nircami.

⁵² Shina nijpimi caishuj fariseocunaca: –¿Canpish galileopurachu cangui? Quillcachishcata alli ricuiyari. Galileamantaca shuj profetallapish manaraj tiyashcachu– nircacuna.

⁵³ Chashna ninacushpaca paicunapaj huasicunaman rircallacunami.