Juan 6 - Dios Rimashca Shimicunami

Pichca huaranga gentecunaman carashcami

¹ Chai q'uipaca Jesusca, Galilea cucha ch'imba lado urimanmi rirca. Chai cucha urica Tiberias shutimi carca.

² Pi mana alliyachipaj unguihuan cajcunata Jesús alliyachijta ricushcamantami achcacuna paita catishpa rircacuna.

³ Chaipimi Jesusca shuj urcuman huichiyashpa, paipaj yachacujcunandij chaipi tiyarirca.

⁴ Judiocunapaj Pascua fiestami ña chayamucurca.

⁵ Jesusca achcacuna paipajman shamucujta ricushpami, Felipetaca: –Cai tucuicunaman carangapajca ¿maipitaj tandataca randishun?– nirca.

⁶ Ashtahuanpish ima nijta uyangapajllami chashnaca nirca. Jesusca, paillataj imata rurana cashcataca ñami yacharca.

⁷ Chaipimi Felipeca: –Ishqui patsaj denariocunahuan randishca tandapish, mirga mirgallapish mana pajtangachu– nirca.

⁸ Yachacujcunapuramanta Simón Pedropaj huauqui Andresmi cashna nirca:

⁹ –Caipi shuj huambrami pichca cebada tandata, ishqui chalhuandij charicun. Chaillaca cai tucuicunapajca ¿imataj pajtangari?– nijpimi,

¹⁰ Jesusca: –Tucuicunata quinrilla siririchun mandai– nirca. Chaipica achca bulluj pambami carca. Chaipimi pichca huaranga shina c'aricuna quinrilla sirirircacuna.

¹¹ Jesusca chai tandata japishpa Taita Diosta pagui nishpaca, yachacujcunamanmi chaupishpa chaupishpa curca. Paicunaca, tucui chaipi cajcunamanmi cararcacuna. Chashnallatajmi chalhuatapish chaupishpa chaupishpa curca. Mana nijtami cararcacuna.

¹² Ña mana nijta micujpimi, paipaj yachacujcunataca: –Ama ima chingarichun, puchushcacunataca tandachichij– nirca.

¹³ Chai pichca cebada tandallamanta micujcunaca mana nijta micujpica puchushcacunataca, chunga ishqui canasta jundatami tandarcacuna.

¹⁴ Chai runacunaca, pi mana rurai tucuipajta Jesús rurajta ricushpami: –Caica cai pachaman shamuna cashca Profetatajmari– nircacuna.

¹⁵ Ashtahuanpish paitaca, jatun Mandajta rurangapaj huaicashpa shamushun ninacujtami Jesusca yacharca. Chaimantami pailla cutin jahua urcuman rirca.

Yacu jahuata Jesús purishcami

¹⁶ Ña tutayamucujpimi, paipaj yachacujcunaca cuchaman uriyamushpaca,

¹⁷ Capernaumman cuchata ch'imbangapaj barcopi yaicurcacuna. Ñami amsayashca carca, Jesusca manaraj paicunapajman shamushcachu carca.

¹⁸ Ña ch'imbacujpica achca huaira jatarishpami cucha yacutaca caiman chaiman shitacurca.

¹⁹ Paicunaca cunan pichca, mana cashpaca sujta kilometrollata rishcapimi, yacu jahuata purishpa barcoman Jesús c'uchuyacujta ricushpa mancharircacuna.

²⁰ Jesusca paicunataca: –Ñucamari cani. Ama mancharichijchu– nijpimi,

²¹ cushicushpa, paitaca barcoman yaicuchircacuna. Chaimantaca, paicuna maiman ricushcamanca utcami chayagrircacuna.

Gentecuna Jesusta mashcashcami

²² Cayandij punllaca cucha ch'imbanijpi saquirijcunaca: –Caina chishica shuj barcollami caipi carca. Jesusca chai barcopica mana paipaj yachacujcunahuan yaicurcachu. Chai barcopica yachacujcunallami rirca– ninacurcacunami.

²³ Ashtahuanpish maipimi Mandaj Jesús Taita Diosta pagui nishpa tandata cararca chai cuchullamanmi Tiberias pueblomanta shujtaj barcocuna chayamushca carca.

²⁴ Jesuspish, paipaj yachacujcunapish mana chaipi cajta ricushpami, paicunaca barcocunapi yaicushcahuan Jesusta mashcangapaj Capernaumman rircacuna.

Jesusca causaita cuj tandami

²⁵ Cuchata ch'imbashpa Jesushuan tupashpaca: –Rabí, ¿ima horataj caimanca chayamurcangui?– nishpa tapujpimi,

²⁶ Jesusca: –Pi mana rurai tucuipajta ñuca rurajta ricushcamantaca, mana mashcanguichijchu. Ashtahuanpish tandata mana nijta micushcallamantami mashcacunguichij. Chaica chashnatajmi.

²⁷ Chingarijlla micunataca ama mashcaichijchu, ashtahuanpish mana tucurij huiñai causaipaj micunata mashcaichij. Chaitaca, Runa Aichayujmi cancunamanca cunga. Chaita cuj cachunca, Dios Yayami churarca– nircami.

²⁸ Chashna nijpica: –Shinashpaca, Taita Dios rurai nishcacunata rurangapajca ¿imatataj rurana canchij?– nijpi,

²⁹ Jesusca: –Runa Aichayujtaca Taita Dios cachashca cashcata crinami. Chaimi Taita Diospajta ruranaca– nirca.

³⁰ Shina nijpica cashnami nircacuna: –Ñucanchij canta cringapajca ¿ima milagrota ruraiyari? Chaita ricushpa cringapaj.

³¹ Ñucanchij ñaupa yayacunaca shitashca pambapica, maná tandatami micushcacuna. Chaitaca Quillcachishcapica: “Jahua pachamanta caj tandatami cararca” ninmi– nircacunami.

³² Chaimi Jesusca: –Moisesca mana jahua pachamanta tandatachu curca. Ashtahuanpish ñuca Yayamari cancunamanca jahua pachamantataj caj tandata cun. Chaica chashnatajmi.

³³ Taita Dios cushca tandatajca, jahua pachamantami shamun. Paimi cai pachapi causajcunamanca causaita cun– nijpimi,

³⁴ –Mandaj Jesús, chai tandata punllanta ñucanchijman carai– nircacuna.

³⁵ Chaimi Jesusca: –Causaita cuj tandaca ñucami cani. Pipish ñucapajman shamushpa crijca manataj yaricachingachu, manataj yacunachingachu.

³⁶ Ña nishca shinallataj ñucata ricushpapish, mana cringuichijchu.

³⁷ Ñuca Yaya agllashcacunallami ñucapajmanca shamunga. Ñucapajman shamujtaca mana tigrachishpa cachashachu.

³⁸ Ñucaca jahua pachamantaca, mana ñuca munaita rurangapaj shamurcanichu. Ashtahuanpish ñucata cachaj Yayapaj munaita rurangapajmi shamurcani.

³⁹ Ñucata cachaj Yayaca, pai agllashpa cushcacunataca shujllatapish chingachichunca mana munanchu. Ashtahuanpish shamuj punllapi causachichunmi munan.

⁴⁰ Ñucata cachaj Yayapaj munaica caimi: Maijanpish Churita ricushpa paita crijca, huiñai causaita charichunmi munan. Tucuri punllapica ñucami paicunataca causachisha– nircami.

⁴¹ Jesustaca: “Jahua pachamanta shamushca tandami cani” nishcamantami judiocunaca huashalla rimashpa,

⁴² cashna nircacuna: –Caica ¿manachu Josepaj churi Jesús? Paipaj yaya mamatapish ñucanchijca rijsinchijmi. ¿Ima nishpataj cunanca: “Jahua pachamantami shamurcani” ninchu imamí?– nircacuna.

⁴³ Chaimi Jesusca: –Huashalla parlanacunataca ña saquichij.

⁴⁴ Ñucata cachaj Yaya mana pushamujpica, ñucapajmanca pi mana shamui tucunchu. Paicunataca tucuri punllapica causachishami.

⁴⁵ Profetacunata Quillcachishcapica: “Taita Diosmi tucuicunata yachachinga” ninmi. Chashna nishca shinallatajmi ñuca Yayata uyashpa, pai yachachishcata yachajcunaca tucuicuna ñucata cringacuna.

⁴⁶ Taita Diostaca, pi mana ricushcachu. Pai cachajpi shamuj, ñucallami paitaca ricurcani.

⁴⁷ Pipish ñucata crijca, huiñai causaita charintajmi. Chaica chashnatajmi.

⁴⁸ Huiñai causaita cuj tandaca ñucami cani.

⁴⁹ Cancunapaj ñaupa yayacunaca, shitashca pambapica maná shuti tandatami micurcacuna. Chaita micushpapish huañurcallacunami.

⁵⁰ Cai tandaca jahua pachamanta shamushcami. Maijanpish chai tandata micujca mana huañungachu.

⁵¹ Jahua pachamanta shamuj causaiyuj tandaca ñucami cani. Maijanpish cai tandata micujca huiñaitami causanga. Ñuca carana tandaca, ñuca aichami. Chaitaca cai pachapi causajcuna huiñai causaita charichunmi, ñucallataj curisha– nircami.

⁵² Chaimi judiocunaca: –Caica, ¿Ima shinataj paipaj quiquin aichataca ñucanchij micuchunca carangari?– nishpami, paicunapura rimanacurcacuna.

⁵³ Chaimi Jesusca: –Runa Aichayujpaj aichata mana micushpa, paipaj yahuarta mana ubyashpaca, cancunaca huiñai causaitaca mana charinguichijchu. Chaica chashnatajmi.

⁵⁴ Maijanpish ñuca aichata micujca, ñuca yahuarta ubyajca, huiñai causaitami charin. Paicunataca tucuri punllapica causachishami.

⁵⁵ Ñuca aichami micunatajca, ñuca yahuarmi ubyanatajca.

⁵⁶ Maijanpish ñuca aichata micujca, ñuca yahuarta ubyajca ñucahuanmi, ñucapish paihuanmi cani.

⁵⁷ Ñucata cachaj Yayaca causaiyujmi. Paimantami ñucaca causani. Chashnallatajmi maijanpish ñuca aichata micujca, ñucamanta huiñai causaita charinga.

⁵⁸ Cai tandaca jahua pachamanta shamushcami. Cancunapaj ñaupa yayacuna micushca maná shuti tanda shinallaca mana canchu. Paicunaca chaita micushpapish huañurcallacunami. Cai tandata micujca, huiñaitami causanga– nircami.

⁵⁹ Caicunataca, Capernaúm pueblopi caj sinagogapi yachachishpami Jesusca chashna nirca.

Huiñai causaita cuj shimicunami

⁶⁰ Jesús chashna nijta achca paita catijcuna uyashpaca: –Cai yachachishcaca sinchimari. ¿Pitaj uyasha ningari?– nircacunami.

⁶¹ Jesusca paita catijcuna chashna huashalla rimanacucujta yachashpami: –¿Ñaja cancunata yachachishcachu p'iñachin?

⁶² Runa Aichayujtaca ñaupaman pai maipi cashcaman cutin huichiyajta ricushpacarin ¿imatashi ninguichij?

⁶³ Taita Diospaj Espiritumi causaita cujca, aichaca causaitaca mana cunchu. Cancunaman ñuca huillashca shimicunaca causaita cuj Espiritumi.

⁶⁴ Chashna huillajpipish cancunamanta maijancunaca manaraj cringuichijchu– nircami. (Jesusca callarimantami maijanlla mana crij cashcata, pi paita japichina cashcatapish yacharca).

⁶⁵ Chaita yachashpami cashna nirca: –Cancunamanca ñuca Yaya crina yuyaita mana cujpica, pipish ñucapajmanca mana shamui tucunchu nircani– nircami.

⁶⁶ Chai punllamantami paipaj yachacujcunaca achcacuna huashaman tigrashpa, ña mana paihuan purircacuna.

⁶⁷ Chaimi Jesusca, chunga ishqui yachacujcunataca: –¿Cancunapishchu ñucata shitashpa rishun ninguichij?– nijpi,

⁶⁸ Simón Pedroca: –Mandaj Jesús ¿pipajmantaj rishunri? Canmari huiñai causaita cuj shimicunataca charingui.

⁶⁹ Ñucanchijca cantaca causaj Taita Diospaj Churi cashcatami crinchij. Cristo cashcatapish yachanchijmi– nirca.

⁷⁰ Chaimi Jesusca: –Ñucaca cancunataca, chunga ishquitamari agllarcani. Ashtahuanpish cancunamanta shujca diablomari– nirca.

⁷¹ Simonpaj churi Judas Iscariotetami chashnaca nirca. Paimi Jesustaca japichina carca. Paica chunga ishqui yachacujcunamanta shujmi carca.