Juan 4 - Dios Rimashca Shimicunami

Samaria huarmihuan Jesús parlanacushcami

¹ “Jesusca achca yachacujcunatami charin, Juanta yallimi bautizacun” nijta fariseocuna yachashcatami Mandaj Jesusca yacharca.

² (Jesusca mana bautizarcachu, paipaj yachacujcunami bautizarca).

³ Chashna nishcata Jesús yachashpaca, Judeamanta llujshishpami Galileaman cutin rirca.

⁴ Galileaman ringapajca Samariatami pasana carca.

⁵ Samariaman rishpaca Sicar nishca shuj pueblomanmi chayagrirca. Chai puebloca, yaya Jacob paipaj churi Joseman cushca allpa c'uchullapimi carca.

⁶ Chai allpapica Jacobpaj pugyumi tiyarca. Jesusca shaicuita shamushcamantami chai pugyu c'uchupi tiyarirca. Ña chaupi punlla shinami carca.

⁷ Chaimanca, Samariamanta shuj huarmimi yacuta huishinaman chayarca. Paitami Jesusca: –P'ichilla yacuta ubyangapaj cuhuai– nirca.

⁸ (Paipaj yachacujcunaca, Sicar pueblopi micunata randinamanmi rishcacuna carca).

⁹ Chaimi Samaria huarmica: –Ñucaca Samariamanta huarmimi cani. Canca judiomi cangui. ¿Ima nishpataj ñucataca yacuta cuhuai ninguiyari?– nirca. (Judiocunahuan samariacunahuanca mana apanacuj cashcamantami chashna nirca).

¹⁰ Chaimi Jesusca: –Taita Dios canman cusha nishcata yachashpaca: “Yacuta ñucaman cuhuai” nicujca pi cashcata yachashpaca, canmari paitaca yacuta cuhuai ninguiman. Paica causaita cuj yacutami canmanca cunman– nijpimi,

¹¹ chai huarmica: –Amito, imahuan huishinatapish mana charinguica, pugyupish ucujtamari. ¿Maimantataj causaita cuj yacutaca cunguiyari?

¹² ¿Canca, cai pugyuta cuj yaya Jacobtapish yalli jatunchari canguiyari? Paipish, paipaj churicunapish, animalcunapish cai pugyumantami ubyajcuna cashca– nircami.

¹³ Chaimi Jesusca: –Maijanpish cai yacuta ubyajca, cutin yacunachingallami.

¹⁴ Maijanpish ñuca cushca yacuta ubyajca, manataj yacunachingachu. Ñuca cushca yacuca huiñai causaita cushpa huiñaita llujshicungallami– nijpimi,

¹⁵ chai huarmica: –Amito, ama cutin yacunachingapaj, caipi huishinaman ama shamungapaj, chai yacuta ñucaman cuhuai– nirca.

¹⁶ Chaimi Jesusca: –Ri, cambaj cusata cayamugri– nijpi,

¹⁷ chai huarmica: –Mana cusayuj canica– nirca. Chaimi Jesusca: –“Mana cusayuj canica” nishpaca, mana llullanguichu.

¹⁸ Canca pichca cusatami charishcangui. Cunan canhuan causacujpish, mana cambaj cusachu. Caitaca mana llullashpami nishcangui– nircami.

¹⁹ Chaimi chai huarmica: –Amito, canca Taita Dios huillachishcata huillajmi yuyachingui.

²⁰ Ñucanchij ñaupa yayacunaca, cai urcupimi adorajcuna carca. Ashtahuanpish cunan cancunaca, Jerusalenllapimi adorana ninguichijmi– nircami.

²¹ Chaimi Jesusca cashna nirca: –Huarmi, mana cai urcullapi, mana Jerusalenllapi Yaya Diosta adorana punlla shamucujta criyari.

²² Cancunaca pita adoracushcatapish mana yachanguichijchu. Ñucanchijca pita adoracushcataca yachanchijmi. Quishpichijca judiocunamantami shamun.

²³ Yaya Diostaca Espíritu yuyaita cushca shina, mana nij tucushpalla adorana punlla chayamunami carca. Chai punllamari ña chayamun. Yaya Diosca chashna adorajcunatami munan.

²⁴ Taita Diosca Espiritumi. Chaimanta paita adorajcunaca paipaj Espíritu yuyaita cushca shina, mana nij tucushpallami adorana– nircami.

²⁵ Chaimi chai huarmica: –Cristo nishca Mesías shamuna cashcataca yachanimi. Pai shamushpami ima shina cashcata tucuita alli huillanga– nirca.

²⁶ Chaimi Jesusca: –Canhuan rimacuj ñucamari chaica cani– nirca.

²⁷ Chashna nicujpi, paipaj yachacujcuna chayamushpaca, chai huarmihuan parlanacucujta ricushpami mancharircacuna. Chashna mancharishpapish: “¿Imatataj tapucungui? ¿Imatataj paihuan parlacungui?” ninallatapish maijan mana nircachu.

²⁸ Chai huarmica paipaj puñuta saquishpami, puebloman rishpa chaipi cajcunaman cashna nirca:

²⁹ –Jacuchij, shuj runata ricunguichij. Paica tucui ñuca ima shinalla cashcatami huillan. ¿Manachu paica Cristo canga?– nircami.

³⁰ Chaimi tucuicuna chai pueblomanta llujshishpa Jesuspajman shamurcacuna.

³¹ Chaicamaca Jesuspaj yachacujcunaca: –Rabí, micupaiyari– nicurcacunami.

³² Chaipimi Jesusca: –Ñucaca cancuna mana rijsishca micunatamari charini– nijpi,

³³ yachacujcunaca caishuj chaishuj: –¿Pishi caraj shamurca?– ninacurcacuna.

³⁴ Chaipimi paicunataca Jesusca: –Ñuca micunaca ñucata cachaj Yayapaj munaita rurana, pai rurai nishcata pajtachinami.

³⁵ ¿Manachu cancunaca: “Chuscu quillarajmi c'uchunapajca illan”? ninguichij. Ñucaca cashnami nini: Chagracunata huichilla ricuichij, ña yurajyashca c'uchunallami.

³⁶ C'uchujpish c'uchushcamanta pagota japinmi. Chai c'uchushcaca huiñai causaipajmi. Chashna cajpimi c'uchujpish, tarpujpish ishquindijtaj cushicunga.

³⁷ “Shujca tarpujmi, caishujca c'uchujmi” nishcami caipica chashnataj pajtan.

³⁸ Manapish cancuna tarpushcatami c'uchunaman cancunataca cacharcani. Shujtajcuna tarpushcatamari, cancunaca c'uchunguichij– nircami.

³⁹ “Tucui ñuca imalla rurashcatami huillan” nishpa huillajpica, Samaria pueblopi causajcunaca achcacunami Jesusta crircacuna.

⁴⁰ Samaritanocuna Jesuspajman shamushpaca: –Ñucanchijhuan saquiripai– nijpimi, Jesusca ishqui punllata chaipi saquirirca.

⁴¹ Chai punllacunapica Jesusllataj huillajpipish achcacuna paita crishpami,

⁴² chai huarmitaca: –Can huillashcallamantaca mana crinchijchu. Ñucanchijtaj pai huillashcata uyashpami crinchij. Paica cai pachata Quishpichij Cristotaj cashcatami cunantajca ña yachanchij– nircacunami.

Mandajpaj churita Jesús alliyachishcami

⁴³ Ishqui punlla q'uipa chaimanta Galileaman rishpaca,

⁴⁴ chaipimi Jesusca “Maijan profetatapish quiquin llajtallapitajca, alli nishca mana cai tucunchu” nishpami huillarca.

⁴⁵ Galileapi causajcunaca Jerusalenman Pascua fiestaman rishpami Jesús tucui imalla rurashcacunata ricurcacuna. Chaimi Galileaman Jesús chayajpica cushicushpa chasquircacuna.

⁴⁶ Jesusca, ñaupaman yacumanta vinota rurashca Galileapi caj Caná pueblomanmi cutin rirca. Jesús chaipi cajpica Capernaúm pueblopimi jatun mandaj churashca mandajpaj churi ungushca cashca carca.

⁴⁷ Chai mandajca Judeamanta Galileaman Jesús chayamushca nijta uyashpami, Jesuspajman shamushpaca: “Ñuca churimi ungushca ña huañunalla. Jacupai alliyachipangui” nijpi,

⁴⁸ Jesusca: –Pi mana ruraipajcunata, ricuchinacunata mana ricushpaca, mana cringuichijchu– nirca.

⁴⁹ Chaimi jatun mandaj churashca mandajca: –Amito, ñuca churi manaraj huañujpi jacupai– nircami.

⁵⁰ Chaimi Jesusca: –Ri, cambaj churica ñamari alli– nijpi chai runaca, Jesús nishcata crishpaca rircallami.

⁵¹ Pai ña huasiman chayagrijpica, paipajta rurajcuna tupamushpami: –Cambaj churica ñamari alli– nircacuna.

⁵² Shina nijpica: –¿Ima horataj alliyarcari?– nijpi paicunaca: –Caina chaupi punlla yallitami fiebreca anchurca– nircacuna.

⁵³ “Cambaj churica causacunmi” nishpa, chai horas shinata Jesús nishcatami yayaca yuyarirca. Chaimantami huasipi tucui causajcunandij paica crirca.

⁵⁴ Judeamanta Galileaman shamushpaca caihuanca ishqui cutinmi pi mana ruraipajtaca rurashpa Jesusca ricuchirca.