Juan 19 - Dios Rimashca Shimicunami

¹ Chashna nijpimi Pilatoca, Jesusta azotichun mandarca.

² Soldadocunaca Jesusmanca cashayuj caspita coronata rurashpami umapica churachircacuna. Amsa puca capata p'achallichishpami,

³ cashna nircacuna: –¡Judiocunapaj jatun Mandaj allimari cangui!– nishpami ch'ajyachircacuna.

⁴ Pilatoca cutin canllaman llujshishpami: –Riquichij, paipica ima millaita rurashcata mana japinichu. Chaimantami cancuna entendichun cutin canllaman pushamuni– nirca.

⁵ Jesusca casha coronata umapi churashca, amsa puca capata p'achallishcami canllaman llujshirca. Chaipimi Pilatoca: –¡Caipimi chai runaca!– nirca.

⁶ Jesusta ricushpaca curacunata mandajcunapish, Taita Diospaj huasita cuidajcunapish: –¡Chacatai! ¡Chacatai!– nishpa caparinacujpimi Pilatoca: –Ñucaca paipica ima huañuipaj juchata rurashcata mana japinichu. Cancunallataj pushashpa chacatagrichijlla– nirca.

⁷ Chaimi judiocunaca: –Ñucanchijca shuj mandashcatami charichij. Chai mandashcapi nishca shinaca Taita Diospaj Churimi cani nishcamantaca paica huañunatajmi can– nircacuna.

⁸ Chashna nijta Pilato uyashpaca, ashtahuanmi mancharirca.

⁹ Pilatoca mandashpa tiyana ucuman cutin yaicushpami Jesustaca: –Canca ¿maimantataj cangui?– nijpi ashtahuanpish Jesusca imata mana nircachu.

¹⁰ Chaimi Pilatoca: –¿Ñucahuanchu mana rimangui? ñucaca canta chacatasha nishpaca chacatai tucushcata, cacharisha nishpapish cachari tucushcataca ¿manachu yachangui?– nirca.

¹¹ Chaimi Jesusca: –Canca ñucata imata rurachun jahua pachamanta mana saquijpica, ñucataca imata mana rurai tucunguichu. Chaimanta ñucata canman cujca, canta yalli juchayujmari– nircami.

¹² Chaimi Pilatoca, ima shinapish Jesusta cacharinata yuyacurca. Chashna yuyacujpipish judiocunaca: –Cai runata cacharishpaca, mana Cesarhuan apanacujchu cangui. Pipish jatun mandaj tucusha nijca, Cesarta p'iñajmi– nishpami caparircacuna.

¹³ Chaita Pilato uyashpaca, Jesusta canllaman llujshichishpami, mandashpa tiyanapi tiyarirca. Chai tiyarina pambaca rumihuan rurashcami carca. Chaica hebreopica Gábata nisha ninmi.

¹⁴ Pascua punllapaj allichirina chaupi punlla shinatami Pilatoca judiocunataca: –¡Caipimi cancunata jatun Mandajca!– nijpi,

¹⁵ paicunaca: –¡Paitaca chacatashpa huañuchilla!– nishpa caparircacuna. Chaimi Pilatoca: –¿Cancunata jatun Mandajtachu chacatasha?– nijpi, curacunata mandajcunaca: –¡Ñucanchijca Cesarllatami jatun mandajtaca charinchij!– nircacuna.

¹⁶ Chaimi Pilatoca, chacatashpa huañuchichun paicunaman cujpi, Jesustaca pushashpa rircacuna.

Jesusta chacatashcami

¹⁷ Jesusca paita chacatana cruzta aparishcami, Uma Tullu shuti urcuman llujshirca. Chai urcuca Hebreopica Gólgota nisha ninmi.

¹⁸ Chaipimi shujtaj ishqui runacunandij, Jesustaca chaupipi churashpa chacatarcacuna.

¹⁹ Pilatoca: “Caica Nazaretmanta Jesusmi, judiocunata jatun Mandajmi” nishpa quillcashcatami, cruz jahuapi churachirca.

²⁰ Jesusta chacatashcaca, Jerusalén c'uchullapi cajpimi, chai quillcataca achca judiocuna rezarcacuna. Chai quillcaca hebreo, griego, latín rimaicunapimi carca.

²¹ Chaita ricushpaca, judiocunapaj curacunata mandajcunami Pilatotaca: –“Judiocunata jatun Mandaj” nishpaca, mana quillcanachu carcangui. Ashtahuanpish: “Caica judiocunata jatun Mandajmi cani nishpa paillataj nirijmi carca” nishpami quillcana carcangui– nigrircacuna.

²² Ashtahuanpish Pilatoca: –Ima shina quillcashcaca, chashnami saquiringa– nircami.

²³ Soldadocunaca Jesusta chacatashpaca, Jesuspaj churanacunataca chuscu soldadocunami shuj shuj japircacuna. Ucu churanatapishmi japircacuna. Chaica mana sirashca, jahuamanta ucucama tucui muyushpa ahuashcami carca.

²⁴ Chaimantami caishuj chaishuj cashna nircacuna: –Caitaca ama lliquishpa chaupishunchijchu, maijanpaj urmachunpish chai churana jahuallapitaj sorteashunchij– nircacunami. Chashna rurajpica: “Ñuca churanacunataca, paicunapurami chaupircacuna. Ñuca churana jahuallapitajmi sortearcacuna” nishpa Quillcachishcami pajtarca. Soldadocunaca chashnatajmi rurarcacuna.

²⁵ Jesusta chacatashca cruz c'uchupica, paipaj mamapish, paipaj mamapaj ñañapish, Cleofaspaj huarmi Mariapish, Magdalamanta Mariapishmi carcacuna.

²⁶ Jesusca, paipaj mamata, paipaj c'uyashca yachacujta chaipi cajta ricushpami paipaj mamataca: –Huarmi, paimi cambaj churi– nirca.

²⁷ Shinallataj yachacujtapish: –Riqui, paimi cambaj mama– nirca. Chai pachamantami yachacujca, Jesuspaj mamataca paipaj huasiman pusharca.

²⁸ Chai q'uipaca, Jesusca ña tucuita tucuchishcata yachashpa, Quillcachishcapi nishca pajtachunmi: –¡Yacunanca!– nijpi,

²⁹ soldadocunaca shuj mangapi vinagre junda tiyacujpimi, esponjata satishpa hisopo caspi puntapi churashpa, Jesuspaj shimiman pajtachirca.

³⁰ Jesusca vinagreta ubyashpaca: –¡Ña tucuchishcami!– nishpaca, umata huarcushpa paipaj espirituta Taita Diosman mingashpa huañurcallami.

Jesuspaj costillapi lanzahuan satishcami

³¹ Chai punllaca, Pascuapaj judiocuna allichirinami carca. Chaimantami samana punllapajca, huañushcacuna cruzpi ama saquirichun, changacunata p'aquishpa paicunata anchuchichun Pilatota nigrircacuna. (Chai samana punllapica jatun fiestami cana carca).

³² Chaimi soldadocunaca Jesushuan chacatashcacunapajman chayashpaca, caishujpaj chaishujpajtapish changacunata p'aquircacuna.

³³ Jesuspajman c'uchuyashpaca, paitaca ña huañushca cajta ricushpami, changacunataca mana p'aquircacuna.

³⁴ Shuj soldadollami paitaca costilla quinripi lanzahuan satijpi yahuarndij, yacundij llujshirca.

³⁵ Chashna tucushcata ricujmi huillani. Chashna ricushcataca ima shina cashcatataj yachashcamantami huillani. Cancunapish crichunmi, chashnaca huillani.

³⁶ Tucui caicunaca: “Paipaj tulluca shujllapish mana p'aquishcachu canga” nishpa Quillcachishcapi nishca pajtachunmi, chashnaca tucurca.

³⁷ Shinallataj Taita Dios Quillcachishca shujtajpipish: “Paita lanzahuan satijtapish ricungacunami” nicunmi.

Jesusta pambashcami

³⁸ Tucui chaicuna chashna tucushca q'uipami Arimateamanta Joseca, Jesuspaj cuerpota apangapaj Pilatota mañagrirca. Pilatoca apailla nijpimi, Jesuspaj cuerpotaca apashpa rirca. Joseca judiocunata manchashcamanta, pacalla Jesuspaj yachacujmi carca.

³⁹ Sarunman Jesuspajman tuta shamuj Nicodemopishmi shamurca. Paica mishquijllata ashnacujta, mirrahuan, aloehuan chagrushcatami, patsaj libra shinata apamurca.

⁴⁰ Paicuna Jesuspaj cuerpota apashpaca, judiocuna ima shina ruraj cashca shinallatajmi, mishquijllata ashnacujhuan churashpa linsocunahuan pilluchircacuna.

⁴¹ Chai chacatashca c'uchullapimi, shuj huerta tiyarca. Chai huertapica pita manaraj churashca, mushuj jutcumi tiyarca.

⁴² Pascuapaj judiocuna allichirina punlla ñalla tucurigrijpimi, chai jutcupish c'uchullapi cashcamanta, Jesuspaj cuerpotaca chaipi churarcacuna.