Juan 14 - Dios Rimashca Shimicunami

Jesusca Yayapajman pushaj ñanmi

¹ –Ñuca rigrini nijpipish ama mancharichijchu. Yaya Diostapish crichij, ñucatapish crichij.

² Ñuca Yayapaj huasipica, causanaca achcami tiyan. Mana tiyajpica cancunaman huillaimanmi carcani. Cunanca cancuna causanata allichingapajmi rigrini.

³ Ñuca rishpa cancuna causanata allichishca q'uipaca cancunapish ñuca maipimi cani cancunapish chaipi cachun pushangapaj tigramushami.

⁴ Ñuca maiman ricujtaca yachanguichijmi. Ñuca maipi canman rina ñantapish rijsinguichijmi– nijpimi,

⁵ Tomasca: –Mandaj Jesús, can maiman ricujtaca mana yachanchijchu. Ñantacarin ¿ima shinataj rijsishunri?– nirca.

⁶ Chaimi Jesusca: –Ñucamari ñan cani, mana llullapish, causaiyujpish cani. Yayapajmanca pi mana paillatajca chayai tucunchu. Ñucami Yayapajman chayachij ñan cani.

⁷ Ñucata rijsishpaca, ñuca Yayatapish rijsinguichijmi. Cunanca ñucata ñami ricunguichij chaimanta Yayatapish ñami rijsinguichij– nircami.

⁸ Chaimi Felipeca: –Mandaj Jesús, Yayata ñucanchijman ricuchi. Chaillamari ñucanchijpajca yalli alli canga– nirca.

⁹ Chaimi Jesusca: –Unitami cancunahuan carcani. Felipe ¿manarajchu ñucataca rijsingui? Pipish ñucata rijsijca, ñuca Yayatapish ñami rijsin. ¿Ima nishpataj canca: “Yayata ñucanchijman ricuchi” ningui?

¹⁰ Ñucaca Yayahuan, Yayaca ñucahuan shujlla cashcataca ¿manachu cringui? Cancunaman ñuca imalla nishca shimicunataca, mana ñuca yuyaillamantachu nircani. Ashtahuanpish ñucapi causaj Yayami, tucui imalla pai munashcacunata rurachicun.

¹¹ Ñucaca Yayahuan, Yayaca ñucahuan shujlla cashcataca crichigari. Mana cashpaca ñuca rurashcacunata ruracushpallapish crichigari.

¹² Maijanpish ñucata crijca, ñuca rurashca shinallatajmi paipish ruranga. Ñucaca ñuca Yayapajman rishcamanta chai ñuca rurashcacunata yallitapishmi ruranga. Chaica chashnatajmi canga.

¹³ Tucui imatapish ñucamanta Yayata mañajpica paica ñucamanta jatunyachishca cachun tucui cancuna mañashcata cushami.

¹⁴ Imatapish ñucamanta mañajpica, chaita rurashami.

Jesusca jucha illaj Espirituta cachasha nishcami

¹⁵ Ñucata c'uyashpaca, ñuca mandashcacunata ruraichij.

¹⁶ Shujtaj cushichijta cancunaman cuchun ñuca Yayata mañashami. Chai cushichijca huiñaitami cancunahuan canga.

¹⁷ Chai Espirituca imatapish chaitataj yachachijmi. Chai Espiritutaca cai pachapaj cajcunaca mana ricushcamanta, mana rijsishcamanta mana chasqui tucunchu. Ashtahuanpish cancunaca paitaca cancunapi causashcamanta rijsinguichijmi. Paica cancunapica causacungallami.

¹⁸ Cancunataca Yaya mama illajlla shinataca mana saquishachu. Cancunapajman tigramushami.

¹⁹ Cai pachapaj cajcunaca ashacamallami ñucataca ricungacuna. Chai q'uipaca ña mana ashtahuan ricungacunachu. Cancunaca ñucataca ricunguichijmi. Ñuca causacushcamanta, cancunapish causacunguichijllami.

²⁰ Chai punllami ñucaca, ñuca Yayahuan, cancunapish ñucahuan, ñucapish cancunahuan shujlla cashcataca yachaj chayanguichij.

²¹ Maijanpish ñuca mandashcacunata yachashpa chaitataj rurajmi ñucata c'uyajca. Ñucata c'uyajtaca, ñuca Yayapish c'uyangami. Ñucapish c'uyashami. Ñuca ima shina cashcapish ñuca c'uyashcapimi ricurisha– nijpimi,

²² Judasca: –Mandaj Jesús ¿ima shinataj ñucanchijllaman ricurishpa, cai pachapaj cajcunamanca mana ricurisha ninguiyari?– nirca. (Chashna nijca mana Judas Iscariotechu carca).

²³ Shina nijpi Jesusca, cashnami nirca: –Ñucata c'uyajca, ñuca huillashca Shimitaca cazungami. Ñuca Yayaca paita c'uyangami. Paipajman shamushpa paihuan causashunmi.

²⁴ Maijanpish ñuca huillashca Shimicunata mana cazujca, ñucataca mana c'uyanchu. Cancuna uyashca Shimicunaca mana ñuca yuyaillamantachu, ñucata cachaj Yaya huillachijpimi huillacuni.

²⁵ Ñucaca cancunahuan cashparajmi, tucui chaicunataca chashna nini.

²⁶ Ñuca Yayaca cancunata Cushichij cachun, paipaj jucha illaj Espirituta ñucapaj randi cachangami. Paimi cancunataca tucuita yachachinga, ñuca cancunaman tucui imalla yachachishcatapish cutin yuyachingami.

²⁷ Cancunamanca ñuca sumaj causaitami cuni, sumajta causachunmi chaitaca saquini. Cai pachapaj cajcuna cushca shinaca mana cunichu. Chaimanta cancunapaj shungupica ama musparinguichijchu, ama mancharinguichijchu.

²⁸ “Ñucaca rigrinimi, cutin cancunapajman tigramushami” nijtaca ña uyarcanguichijmi. Ñucata c'uyashpatajca, ñuca Yayapajman rigrini nijta uyashpaca, cushicunguichijmanmi. Ñuca Yayaca ñucata yallimari.

²⁹ Cunanca cai nishcacuna chashna tucujpica cancuna crichunmi manaraj chashna tucujpi cancunamanca ña huillani.

³⁰ Cai pachata mandajca ñamari shamucun. Cancunahuanca ña mana ashtahuan rimashachu. Pai shamushpapish ñucataca mana mishangachu.

³¹ Chashna cajpipish cai pachapi cajcunaca ñuca Yayata ñuca c'uyashcatapish, pai mandashca shina ruracushcatapish yachachunmi chashna tucugrini. ¡Jatarichij, caimanta jacuchij!