Juan 12 - Dios Rimashca Shimicunami

Betaniapi Jesusta mishquijllata ashnacujhuan María churashcami

¹ Pascuapaj sujta punlla illajpirajmi Jesusca, huañushcacunapaj chaupimanta pai causachishca Lázaro causan Betania puebloman rirca.

² Jesús chaiman rijpica sumaj micuitami rurarcacuna. Martaca caracurcami. Jesushuan mezapi micucujcunapurapica, shujca Lazaromi carca.

³ Jesús chaipi cajpimi Mariaca achca valij, imahuan mana chagrushca, mishquijllata ashnacuj shuj libra nardota apamurca. Chaitaca Jesuspaj chaquipi tallishpami, paipaj ajchahuan chaquichirca. Huasi ucupish mishquijllata ashnacujmi tucurca.

⁴ Chaimi yachacujcunapuramanta Jesusta japichina caj, Simonpaj churi Judas Iscarioteca cashna nirca:

⁵ –Cai mishquijllata ashnacujtaca, quimsa patsaj denariocunapi c'atushpa, huajchacunaman cushpachari alli canman carca– nircami.

⁶ Judasca huajchacunata llaquishcamantaca, mana chashna nircachu. Ashtahuanpish shuhua cashcamanta, pai apacun cullqui muchilapi caishujcuna churashcata shuhuaj cashcamantami chashnaca nirca.

⁷ Chaimi Jesusca: –Saquilla, ñucata pambana punllapajmi chaitaca huaquichicushca.

⁸ Huajchacunaca mana illangachu. Ashtahuanpish ñucaca mana cancunahuan causacushallachu– nirca.

Lazarota huañuchishun nishcacunami

⁹ Achca judiocunami, Betaniapi Jesús cajta yachashpaca, chaiman rircacuna. Mana Jesusta ricunallamanchu rircacuna, ashtahuanpish huañushcacunapaj chaupimanta causachishca Lazarota ricungapajpishmi rircacuna.

¹⁰ Ashtahuanpish curacunata mandajcunaca Lazarotapish huañuchishun nishpami yuyarinacurcacuna.

¹¹ Lazarota causachishcamantami, achca judiocuna Jesusta crishpa chai curacunataca ña mana catishun nircacuna. Chaimi Lazarotaca huañuchishun nircacuna.

Jerusalenman Jesús yaicushcami

¹² Chai cayandij punllaca, Jerusalén fiestaman rij achcacunaca, Jerusalenman Jesús shamucun nijtami uyarcacuna.

¹³ Chaimantami yura ramacunata p'itishpa, Jesusta tupanaman llujshimushpaca: –¡Hosanna! ¡Israelcunapaj Jatun Mandaj, Jatun Diospaj shutipi shamucujtaca alli nishca cachun!– nishpa caparircacuna.

¹⁴ Quillcachishcapi nishca shinallatajmi Jesusca, shuj huahua burrota japishpa tiyarirca:

¹⁵ “Sionpi causajcunalla, ama manchaichijchu. Cancunapaj jatun Mandajca, shuj huahua burropimi tiyarishca shamucun” nishcami pajtarca.

¹⁶ Paipaj yachacujcunaca Jesús imamanta chashna ruracushcataca mana entendircacunachu. Jesusta Taita Dios jatunyachishca q'uipami, pai ima shinalla tucuna cashcacunaca Quillcachishcapi ña tiyacushcata yuyarircacuna.

¹⁷ Jutcupi churashcamanta Lazarota cayashpa, huañushcacunapaj chaupimanta Jesús causachijta ricujcunami, shujtajcunamanca huillarcacuna.

¹⁸ Pi mana rurai tucuipajta Jesús rurashcata uyashcamantapishmi, Jesustaca achcacuna tupanaman shamurcacuna.

¹⁹ Ashtahuanpish fariseocunaca: –Chaica riqui, imata mana rurai tucunchijca. Tucuicunamari paita catishpa rincuna– nishpami paicunapura ninacurcacuna.

Maijan griegocuna Jesusta mashcashcami

²⁰ Pascua fiestapi Taita Diosta adorangapajca, achcacunami Jerusalenman huichiyarcacuna. Paicunapurapica, maijan griegocunapishmi chaipi carca.

²¹ Chai griegocunaca Felipepajman c'uchuyashpaca: –Amito, Jesusta ricushun ninchijca– nircacunami. Felipeca Galileapi caj Betsaida pueblomantami carca.

²² Chaimi Felipeca, Andresman huillagrirca. Ishqui tucushpami, Jesusmanca huillarcacuna.

²³ Paicuna huillajpica Jesusca: –Runa Aichayujta jatunyachinaca ñami chayamushca.

²⁴ Trigo muyu allpapi mana urmashpa, mana huañushpaca paillami saquirin. Ashtahuanpish allpapi urmashpa huañushpaca achca granotami p'ucun. Chaica chashnatajmi.

²⁵ Pipish paipaj causaita c'uyajca, chingachingami. Pipish cai pachapi paipaj causaita mana c'uyajca huiñaitami causanga.

²⁶ Pipish ñucapajta ruraj casha nishpaca ñucata catichun. Ñuca maipimi cani, ñucapajta rurajpish chaipimi canga. Ñucapajta rurajcunataca, ñuca Yayami alli ninga– nircami.

Jesusca pai huañuna cashcata huillashcami

²⁷ Cunanca, ñuca almaca llaquihuan huañucunmari. ¿Imatataj nishari? ¿Yayitu, cai jatun llaquita apachunca ama saquichu nishachu imamí? Maitataj chashnaca nishari llaquita apangapajtajmari shamurcani.

²⁸ Ashtahuanpish cashna nisha: Yayitu, can tucuita rurai tucuj cashcata ricuchi– nijpica jahua pachamanta shuj rimashcami: “Ñami tucuita rurai tucuj cashcataca ricuchircani, ñuca tucuita rurai tucuj cashcataca cutinpish ricuchisharajmi” nishcami uyarirca.

²⁹ Chashna uyarijpica tucui chaipi cajcunaca, c'ulun ninmari nircacuna. Shujtajcunaca: –Shuj angelmari paihuan riman– nircacunami.

³⁰ Shina ninacujpi Jesusca: –Chai rimashcaca mana ñucapaj allipajchu uyarin, ashtahuanpish cancunapaj allipajmi uyarin.

³¹ Cunanca cai pachapi causajcunaman, paicuna imalla rurashcata ricuchina punllami, cunanca cai pachapaj mandajta llujchichishpa shitana punllami.

³² Ñucaca allpamanta jahuaman huarcushca cashpami, tucuicunata ñucapajman pushamusha– nircami.

³³ Chashna nishpaca, pai ima shina huañuna cashcatami huillarca.

³⁴ Chaimi chaipi caj gentecunaca: –Ñucanchijca Mandashcapica: “Quishpichij Cristoca huiñaitami causanga” nishcatami uyarcanchij. ¿Ima nishpataj canca: “Runa Aichayujtaca jahuaman huarcushcatajmi canga” ningui? ¿Chai Runa Aichayujca pitagari?– nircacunami.

³⁵ Chaimi Jesusca: –Luzca ashacamallami cancunahuanca canga. Cancuna mana yuyashcapi amsa ama japichun, luz caipi cajpiraj luzhuan shujlla tucushpa purichij. Amsapi purijca, maiman ricushcata mana yachanchu.

³⁶ Luzpaj huahuacuna cangapajca, luz caipi cajpiraj, paita crichij– nircami. Jesusca tucui chaicunata nishpaca, paicunapajmanta pacatucushpa rircallami.

Judiocuna imamanta Jesusta mana crishcami

³⁷ Jesusca judiocunapaj ñaupajpi, pi mana rurai tucuipajta achcata rurajpipish paitaca mana crircacunachu.

³⁸ Profeta Isaiasca: “Jatun Dioslla, ñucanchij huillashcataca ¿pitaj crishcari? Jatun Dios imatapish rurai tucuj cashcataca ¿pitaj crishcari?” nircami. Chashna nishca pajtachunmi mana crircacuna.

³⁹ Isaiasllataj cashna nishcamantapishmi mana cri tucurcacuna:

⁴⁰ Taita Diosllatajmi “Paicunapaj ñahuitaca, mana ricujta rurarca. Shungutapish sinchiyachirca. Ñahuihuanca ama ricuchun, shunguhuanca ama yuyarichun, ñuca jambichun, ñucapajman ama cutirichunmi chashna rurani nishca” pajtachunmi chashnaca tucurca.

⁴¹ Isaiasca Jesustaca tucuita rurai tucuj cashcata ña ricushcamantami chashna nirca.

⁴² Tucui chaicuna chashna cajpipish llajtata mandajcunacamami, achcacuna Jesustaca crircacuna. Paicunaca sinagogamanta fariseocuna llujshichishpa, cachanata manchashcallamantami crishcataca mana huillarcacuna.

⁴³ Paicunaca Taita Dios alli nishca canapaj randica, runacuna alli nishca cangapajmi mana huillashun nircacuna.

Jesús rimashcacunami runacuna ima shina cashcataca ricuchinga

⁴⁴ Jesusca caparishpami cashna nirca: “Pipish ñucata crijca, mana ñucallatachu crin, ñucata cachajtapishmi crin.

⁴⁵ Pipish ñucata ricujca, ñucata cachajtapishmi ricun.

⁴⁶ Ñucaca achijyachij luz cashpami, achijyachingapaj cai pachamanca shamurcani. Pipish ñucata crijca, ña mana amsapi cangachu.

⁴⁷ Pipish ñuca shimicunata uyashpapish mana cazujtaca, pai ima shina cashcataca mana ñucachu ricuchisha. Ñucaca cai pachapi causajcunata llaquiman cachangapajca mana shamurcanichu, ashtahuanpish cai pachapi causajcunata quishpichingapajmi shamurcani.

⁴⁸ Pipish ñucata p'iñashpa mana ricunachishpa, ñuca rimashcacunata mana chasquijca, pai ima shina cashcata ricuchijtami charin. Cai ñuca huillashca Shimimi, tucuri punllapica pai ima shina cashcataca ricuchinga.

⁴⁹ Ñucaca mana ñuca quiquin yuyaimantachu rimarcani. Ñucata cachaj Yayami imallata rimanatapish, yachachinatapish ñucataca mandarca.

⁵⁰ Pai mandashcaca, huiñai causaipaj cashcataca yachanimi. Chaimi ñuca rimashpaca, ñuca Yaya ñucata mandashca shinallataj rimani” nircami.