Juan 1 - Dios Rimashca Shimicunami

¹ Taita Dios imatapish manaraj rurajpimi Rimashca Shutica ña tiyarca. Rimashca Shutica Taita Dioshuanmi carca. Rimashca Shutica Taita Diosllatajmi carca.

² Taita Dios tucuita rurai callaricujpica, paica Taita Diosllahuantajmi carca.

³ Tucui imalla tiyajcunataca, paihuanmi rurarca. Tucui imatapish paillahuantajmi rurarca.

⁴ Paipimi causaica tiyarca. Chai causaimi, runacunapaj luz carca.

⁵ Chai luzmi amsataca achijyachin, amsaca chai luztaca mana amsayachi tucunchu.

⁶ Taita Dios cachashca shuj runami tiyarca. Paica Juan shutimi carca.

⁷ Pai huillajpica tucuicuna crichunmi, chai luzmanta huillangapaj paica shamurca.

⁸ Juanca mana luzchu carca, ashtahuanpish luzmanta huillachun cachashcami carca.

⁹ Tucui gentecunata achijyachijtaj luzca, cai pachapica ñami ricurigrirca.

¹⁰ Cai pachataca Taita Diosca Rimai Shutihuan tucushpami rurarca. Cai pachapi causajcunaca pai rurashca cashpapish paitaca mana rijsircacunachu.

¹¹ Paipaj cajcunapajmanmi shamurca. Ashtahuanpish paipaj cajcunaca mana chasquircacunachu.

¹² Maijanpish paita chasquishpa, paipaj Shutipi crijcunataca tucuicunatami Taita Diospaj huahuacunata rurarca.

¹³ Taita Diospaj huahua tucungapajca mana huahuacuna huacharij shina aicha munaimanta, c'arita munashcamantachu huacharirca. Ashtahuanpish Taita Diospaj munaimantami huacharirca.

¹⁴ Taita Diospaj Rimaica, aichayujmi tucurca. Paica ñucanchij chaupipimi causarca. Paitaca Yaya shinallataj sumaj cajtami ricurcanchij. Mana c'uyaipajta c'uyaj canahuan, mana llullahuan jundami carca.

¹⁵ Bautizaj Juan Jesusmanta huillashpaca: “Ñucapaj q'uipa shuj shamucunmi nishcaca paimari. Paica ñucapaj q'uipa shamushpapish ñucapaj ñaupa ña tiyashcamanta ñucata yalli jatunmari” nishpami caparirca.

¹⁶ Paica tucuihuan junda cajpimi, mana c'uyaipajta c'uyaitaca tucuicuna jahuanpi jahuanpi chasquinchij.

¹⁷ Mandashcataca Moisesmanmi huillachirca. Ashtahuanpish mana c'uyaipajta c'uyaica, mana llullaca, Jesucristomantami shamurca.

¹⁸ Taita Diostaca pi manataj ricushcachu. Paipaj shujlla Churi paipaj c'uchupi cajllami ricushca. Paimi Taita Dios ima shina cashcataca ricuchishca.

Bautizaj Juan huillashcami

¹⁹ Jerusalenpi causaj judiocunami curacunatapish, levitacunatapish: –¿Canca pitaj cangui?– nishpa Juanta tapuchun cachajpi, Juanca cashna nirca:

²⁰ –Ñucaca mana Cristochu cani– nircami. Chashna huillashpaca mana llullarcachu.

²¹ Shina nijpi: –Shinashpaca ¿pitaj canguiyari? ¿Eliaschu cangui?– nijpi: –Chaipish mana canichu– nirca. Shina nijpi: –Shinashpaca ¿profetachu cangui?– nijpipish: –Mana– nircami.

²² Chaimi paicunaca: –Shinashpaca ¿pitaj canguiyari? ¿Canllatajca pi cashcatataj yuyangui? Ñucanchijta cachajcunaman huillagringapajmari yachashun ninchij– nircacuna.

²³ Chaimi Juanca: –Profeta Isaiasca shitashca pambapica: “Jatun Diospaj shamuna ñanta allichichij nishpami shuj runa caparicun” nishcami. Ñucaca chaimari cani– nircami.

²⁴ Juanta tapunaman cachashcacunaca, fariseocunapurami carca.

²⁵ Paicunaca: –Canca manapish Cristo cashpa, manapish Elías cashpa, Profetapish mana cashpaca ¿ima nishpataj bautizacungui?– nircacunami.

²⁶ Chaimi Juanca cashna nirca: –Ñucaca yacupi bautizajllami cani, ashtahuanpish shujmari cancunapurallapitaj tiyan. Paitaca cancunaca manaraj rijsinguichijchu.

²⁷ Paica ñucapaj q'uipa shamushpapish ñucata yalli jatunmari. Chaimanta paipaj pargate huatashcallatapish mana pascaipajmi cani– nircami.

²⁸ Juan bautizacushca Jordán yacu ch'imbanij Betábara pueblopimi chashna tucurca.

Taita Diospaj malta Ovejamari nishcami

²⁹ Chai cayandij punllami Juanca, Jesús paipajman shamucujta ricushpa cashna nirca: –¡Caimari cai pachapi causajcunapaj juchata anchuchij Taita Diospaj malta Ovejaca!

³⁰ Paitamari ñucaca: “Ñucapaj q'uipa shamujca, ñucapaj ñaupa ña tiyashcamanta ñucata yalli jatunmari” nicurcani.

³¹ Ñucapish paitaca pi cashcata mana rijsishpapish israelcunaman paita rijsichingapajmi yacupi bautizaj shamurcani– nircami.

³² Juanca pai ricushcataca cashnami huillarca: –Jahua pachamanta Taita Diospaj Espíritu paloma shina uriyamushpa paipaj jahuapi saquirijtami ricurcani.

³³ Ñucapish paitaca pi cashcata manaraj rijsircanichu. Ashtahuanpish yacupi bautizachun ñucata cachaj Taita Diosmi: “Maijanpaj jahuamanmi Espíritu uriyamushpa paipaj jahuapi saquirin. Chaimi jucha illaj Espirituhuan bautizajca canga” nirca.

³⁴ Chashna tucujtaca ñucataj ricushca cashpami, caimari Taita Diospaj Churi nishpa huillacuni– nircami.

Juanpaj ishqui yachacujcuna Jesusta catishcami

³⁵ Chai cayandij punllapish Juanca cutinmi, paipaj ishqui yachacujcunandij chaillapitaj carca.

³⁶ Chaipi cashpami Jesús chaita puricujta ricushpa Juanca: –¡Riquichij, chaimari Taita Diospaj malta Ovejaca!– nirca.

³⁷ Chashna nijta Juanpaj ishqui yachacujcuna uyashpaca, Jesusta catishpa rircallacunami.

³⁸ Paicuna caticujta Jesús tigrarishpa ricushpaca: –¿Imatataj mashcacunguichij?– nijpi, paicunaca: –Rabí, ¿maipitaj causangui?– nircacuna. (Rabí nishcaca: “Yachachij” nisha ninmi).

³⁹ Chaimi Jesusca: –Jacuchij, ricunguichij– nijpi paicuna rishpaca, Jesús maipi causacushcatami ricurcacuna. Ña chishi cajpimi chai punllaca paihuan saquirircacuna.

⁴⁰ Bautizaj Juan chashna nijta uyashpa Jesusta catishpa rij ishquicunamanta shujca, Simón Pedropaj huauqui Andresmi carca.

⁴¹ Andresca paipaj huauqui Simonhuanraj tupashpaca: –Mesiashuanmari tupashcanchij– nircami. (Mesías nishcaca: “Cristo” nisha ninmi).

⁴² Andresca paipaj huauqui Simontaca Jesuspajmanmi pushamurca. Jesusca Simonta ricushpaca: –Canca, Jonaspaj churi Simonmi cangui. Cunanca cantaca Cefastami shutichini– nircami. (Cefas nishcaca: “Pedro” nisha ninmi).

Felipetapish Natanaeltapish Jesús cayashcami

⁴³ Chai cayandij punllami Jesusca Galileaman risha nicushpa, Felipehuan tupashpaca: –Ñucata cati– nirca.

⁴⁴ Felipeca, Andrespish, Pedropish causan Betsaida pueblomantami carca.

⁴⁵ Felipeca, Natanaelta mashcashpa paihuan tupashpaca: –Moisés quillcashpa mandashcapi, Profetacuna quillcashpa huillashcapi nishca runahuanmari tupashcanchij: Paica, Nazaret pueblomanta Josepaj churi Jesusmi cashca– nircami.

⁴⁶ Chaimi Natanaelca: –Nazaretpica ¿ima allitaj tiyangari?– nijpi, Felipeca: –¡Jacu ricungui!– nirca.

⁴⁷ Jesusca paipajman Natanael shamucujta ricushpaca: –¡Caitajca israeltajmari, paipica ima umana mana tiyanchu!– nijpimi,

⁴⁸ Natanaelca: –¿Maipitaj ñucataca rijsircangui?– nijpi, Jesusca: –Cantaca, Felipe manaraj cayajpimi, higo yura ucupi cajpiraj ricurcani– nirca.

⁴⁹ Chaimi Natanaelca: –¡Rabí, canca Taita Diospaj Churimi cangui! ¡Canca, israelcunata jatun Mandajmi cangui!– nijpimi,

⁵⁰ Jesusca: –“Higo yura ucupi cajpirajmi ricurcani” ¿nishcallamantachu ñucataca cringui? Caita yallicunatapishmi ricungui– nirca.

⁵¹ Cashnapish nircami: –Cunanmanta pachami cancunaca jahua pacha pascarishcata, Runa Aichayujpajman Taita Diospaj angelcuna huichiyacujta, uriyacujtapish ricunguichij. Chashnatajmi canga– nircami.