JOSUÉ 9 - Dios Rimashca Shimicunami

Gabaón pueblopi causajcuna israelcunata umashcami

¹ Jordanmanta cai ladoman caj llajtacunapica, urcucunapi caj llajtacunapipish, pambacunapi caj llajtacunapipish, mama cucha c'uchupi caj llajtacunapipish Libanocamami Heteocunapish, amorreocunapish, cananeocunapish, ferezeocunapish, heveocunapish, jebuseocunapish causancuna. Chai llajtacunata jatun mandajcunami israelcuna Jericó pueblota, Hai pueblota imallata rurashcata yachaj chayashpaca tucuicuna tandanacushpa,

² Josuehuanpish israelcunahuanpish macanacungapaj allichirircacuna.

³ Gabaón llajtapi causaj heveocunapish Jericopi causajcunata, Hai pueblopi causajcunata Josué ima shinalla chingachishcatami yachaj chayarcacuna. Chaimantami Josuehuanca mana macanacushun nishpa,

⁴ paicunaca jatun mandajpaj randi cachashcacuna tucushpa rishunchij nishpa Josuepajmanca cashna rircacuna. Paya sacocunata, vinotapish llachapashcalla paya capachucunapi burrocunaman apachishpami rircacuna.

⁵ Shinallataj churanacunatapish, pargatecunatapish llachapashca paya payata churashpami rircacuna. Ñanpi micuna tandatapish chaquishpa p'ulasyashcatami aparcacuna.

⁶ Gilgalpi Josuepish israelcunapish causacun carpa huasicunaman chayashpaca: –Ñucanchijmi yallitaj caru llajtamanta shamunchij. Cunanca ñucanchijhuan shuj ruranata ari nihuaichij– nircacunami.

⁷ Chaimi israelcunaca heveocunataca: –Ñucanchij c'uchullapi causajcunallataj canguichijllatajmari. ¿Maitataj cancunahuanca imata ari ninacushunri?– nircacuna.

⁸ Heveocunaca Josuetaca: –Ñucanchijca cancunapajta rurajcunami cashun ninchij– nijpimi Josueca: –Cancunaca ¿picunataj canguichij? ¿Maimantataj shamunguichij?– nirca.

⁹ Chaimi paicunaca: –Cambajta ruraj ñucanchijca yallitaj caru llajtamantami shamurcanchij. Cancunata Mandaj Diosca tucuita rurai tucuj jatun cashcata, Egiptopi imallata rurashcatami yacharcanchij.

¹⁰ Jordán jatun yacu ch'imbanijpi caj Hesbón pueblopi causaj amorreocunata jatun mandaj Sehontapish, Basán llajtapi causaj amorreocunata jatun mandaj Ogtapish imallata rurashcatami yacharcanchij. Chai jatun mandajca Astarot pueblopimi causarca.

¹¹ Chaimantami ñucanchij llajtapi causaj cunaj yuyajcunapish, chaipi causajcunapish cashna nircacuna: Ñanpi micunapaj micunata apashpa, paicunata tupanaman richij. Paicunapajman chayashpaca: Ñucanchijca cancunapajta rurajcunami cashun ninchij. Ñucanchijhuan shuj ruranata ari nihuaichij ninguichij nishpami cacharcacuna.

¹² Ñucanchij llajtamanta cancunata mashcanaman llujshimui punllaca, cai ñucanchij tandataca cunanlla cusashca rupajlla tandatami apamurcanchij. Cunanca tucui chaquishpa ña p'ulasyashcapishmari.

¹³ Vinotapish mushuj capachucunapimi jundachimurcanchij. Cunanca payayashpa ñami lliquirin. Churanacunatapish, pargatecunatapish mushujtami churarimurcanchij. Yallitaj carumanta shamushpami, ña tucui payayashcahuan chayamunchij– nircacunami.

¹⁴ Israelcunaca chai runacuna chashna ricuchijpica, Mandaj Diosta mana tapushpa chasquircallacunami.

¹⁵ Chashnami Josueca, heveocunahuanca sumajta causanata ari ninacurca. Israelcunata pushajcunapish, Josué nishca shinallatajmi ari nircacuna.

¹⁶ Ari ninacushcamanta quimsa punllapimi, israelcunaca paicunapajman shamuj runacunaca paicuna causacun c'uchulla llajta Gabaón pueblopi causajcunallataj cashcata yachaj chayarcacuna.

¹⁷ Chaita yachashpa paicunata mashcanaman rishpaca, quimsa punllapimi chai runacuna causacun pueblocunaman chayarcacuna. Chai runacunaca Gabaón, Cafira, Beerot, Quiriat-jearim pueblocunamantami cashca carca.

¹⁸ Israelcunaca chai pueblocunaman chayashpapish, israelcunata mandajcuna Mandaj Diospaj shutipi mana huañuchishunchu nishpa ari ninacushcamantami mana huañuchircacuna. Chaimantami tucui israelcuna paicunata mandajcunata juchachishpa rimarcacuna.

¹⁹ Chaimi israelcunata mandajcunaca: –Ñucanchijca Mandaj Diospaj shutipimari manataj huañuchishunchu nishpa ari nircanchij. Chaimantami chai runacunataca mana imata rurai tucunchij.

²⁰ Paicunataca mana huañuchinachu canchij. Mana huañuchishunchu nishca jahua huañuchijpica, Mandaj Diosca ñucanchijhuanmi p'iñaringa– nircacuna.

²¹ Israelcunata mandajcunaca, paicuna ari nishcata pajtachishpami, Gabaón runacunataca ama huañuchinguichijchu nishpa israelcunataca mandarca. Ashtahuanpish paicunataca tucui israelcunapaj yacuta, yantata ashtajcuna cachunmi churarca.

²² Josueca Gabaón runacunata cayashpami: –¿Ima nishpataj cancunaca cai c'uchulla llajtallapitaj causajcuna cashca jahua caru llajtamantami shamunchij nishpa ñucanchijmanca llullarcanguichij? nishpa tapurca.

²³ Chaimanta cunan cancunaca tucui cancunapaj causaipi ñucanchijpajta rurajcuna cachun Dios llaquichishcacunami canguichij. Yantacunata p'itishpa, yacuta ñucanchij Diospaj huasiman ashtashpami causanguichij– nircami.

²⁴ Chaimi paicunaca Josuemanca: –Cancunata Mandaj Diosca paipajta ruraj Moisestaca cancunamanmi cai llajtacunata cuni. Cancunaca cai llajtapi causajcunataca tucuita chingachichij nishcata cancunapajta ruraj ñucanchij yachaj chayashpami, ñucanchijta huañuchinata manchashcamanta chashna nircanchij.

²⁵ Cunanca cancunapaj maquipimi canchij. Cancunapaj ima shina ashtahuan alli canata rurapaichijlla– nircacunami.

²⁶ Chashnami Josueca, Gabaón runacunata israelcuna huañuchichunca mana saquirca.

²⁷ Chai punllallatajmi Josueca, chai runacunataca tucui israelcunapaj, Mandaj Diospaj huasipaj yantata, yacuta ashtajcuna cachun churarca. Mandaj Dios maipipish paita yuyarinapaj cachun agllashpa ricuchijpica, chaipi paipaj altarman yantata yacuta ashtajcunami tucurcacuna. Gabaonitacunaca, cunan punllacamami chaillatataj rurashpa causancuna.