JOSUÉ 20 - Dios Rimashca Shimicunami

Miticunapaj cachun pueblocunata Josué agllashcami

¹ Mandaj Diosca Josuetaca cashnami mandarca:

² “Israelcunataca cashna nishpa mandai: Moisesman ima shinalla ñuca huillachishca shinallataj miticuna pueblocunata agllaichij.

³ Maijancunaca manapish huañuchina yuyaihuan cashpa, huañuchishpaca huañujpaj c'uchulla familia paitapish ama huañuchichun chai pueblocunapi miticugrichun.

⁴ Miticunata mashcashpa puricujca maijan chai puebloman chayashpaca, puebloman yaicuna pungupi caj cunaj yuyajcunapajman chayashpa imamanta miticushpa puricushcata paicunaman huillachun. Chaita alli huillajpica, cunaj yuyajcuna chai puebloman yaicuchichun. Chaipi pai causachun causanatapish cuchun.

⁵ Huañujpaj c'uchulla familia paitapish huañuchingapaj chai huañuchijta catishpa chayajpipish, manapish p'iñanacushca cashpa, manapish huañuchina yuyaihuan huañuchishca cajpica, chai pueblopi causajcunata cunaj yuyajca chai mashcacujmanca ama cuchun.

⁶ Miticushpa puricujca, tucui chaipi causajcuna tandanacushpa tapungacama chai pueblollapitaj cachun. Shinallataj paita tapucui punllacunapi maijan curacunata jatun mandaj cashca cajpica, pai huañungacama chai pueblopi causachun. Chai q'uipaca miticushpa causacujca, paipaj quiquin llajtapi quiquin huasillapitaj causanaman tigrachunlla” nircami.

⁷ Shina nijpi paicunaca cai pueblocunatami agllarcacuna: Neftalipaj urcupi caj Galileapica, Cedes pueblota, Efrainpaj urcupica, Siquem pueblota, Judapaj urcupica, Quiriat-arba nishca Hebrón pueblotami agllarcacuna.

⁸ Jordán yacu ch'imba ladomanca Jericomanta, inti llujshin ladoman caj llajtacunapica, cai pueblocunatami agllarcacuna: Rubén aillupaj llajtapica, shitashca pugru pambapi caj Beser pueblota, Gad aillupaj Galaad llajtapica, Ramot pueblota, Manasés aillupaj Basán llajtapica, Golán pueblotami agllarcacuna.

⁹ Tucui chai pueblocunataca israelcuna cashpa, mana israelcuna cashpapish manapish huañuchina yuyaihuan cashpa huañuchijcuna miticunapajmi agllarcacuna. Imamanta huañuchishcata mandajcuna tandanacushpa manaraj tapujpi, chai huañujpaj c'uchulla familia paitapish ama huañuchichunmi, chaipi miticuna carca.