JOSUÉ 17 - Dios Rimashca Shimicunami

Manasés aillupaj llajtami

¹ Manasespaj aillumanca Josepaj punta churi cashcamantami, cashna sorteashpa curca. Manasespaj punta churi Maquirpaj huahua huahuacunamanca Galaad, Basán llajtacunatami curca. Maquirca Galaadpi causajcunapaj punta yaya, macanacunatapish alli yachajmi carca.

² Manasespaj caishuj churicunamanpish paicunapaj familia mashna cashcapajmi sortearca. Paicunaca caicunami: Abiezer, Helec, Asriel, Siquem, Hefer, Semida shuticunami carca. Paicunaca Josepaj nietocunami carca.

³ Maquirca, Manasespaj churimi carca. Galaadca, Maquirpaj churimi carca. Heferca, Galaadpaj churimi carca. Zelofehadca, Heferpaj churimi carca. Zelofehadca, c'ari huahuacunataca mana charircachu, ushushicunallatami charirca. Paicunaca Maala, Noa, Hogla, Milca, Tirsa shuticunami carca.

⁴ Chai ushushicunami Eleazar curapajman, Nunpaj churi Josuepajman, israelcunata mandajcunapajman rishpa cashna nircacuna: “Mandaj Diosca Moisestaca ñucanchij japina cashcataca caishuj c'ari huahuacunapaj huahua huahuacunaman cushcallapitaj allpacunata cuchunmi mandarca” nircacunami. Chashna nijpica Josueca, Mandaj Dios mandashca shinallatajmi, paicuna japina cashcataca paicunapaj yayapaj huauquicunaman cushca c'uchullapitaj curca.

⁵ Chaimantami Manasespaj huahua huahuacunaca Jordán yacu caishuj ladoman caj Galaad, Basán llajtacunata japishca jahua chunga mirga allpacunahuan japircacuna.

⁶ Chashnami Manasespaj huahua huahuacunaca huarmicuna cashpapish, c'ari huahuacuna shinallataj paicuna japina cashca allpacunataca japircacuna. Galaadpi caj llajtacunataca Manasespaj caishuj huahua huahuacunami japircacuna.

⁷ Manasespaj huahuacunapaj llajtacunaca caicunami: Asermanta callarishpaca, Siquem ch'imbapurapi caj Micmetatcama, ura ladotaca Tapuapi causajcunapajcamami.

⁸ Tapuapi caj allpacunaca Manasespaj huahua huahuacunapajmi. Manasespaj huahua huahuacunapaj llajtahuan lindepi caj Tapúa puebloca Efrainpaj huahua huahuacunapajmi.

⁹ Chai lindeca, Caná jatun yacuman uriyashpami chai yacuta catishpa mama cuchaman llujshin. Chai yacu janaj lado pueblocunaca, Manasespaj llajtapi cashpapish Efrainpajmi. Manasespaj llajtaca chai jatun yacumanta huichimanmi.

¹⁰ Efrainpaj llajtaca, chai Caná jatun yacumanta ura ladomanmi, Manasespaj llajtaca chai jatun yacumanta janaj ladomanmi. Chai llajtacunaca ishquindijtajmi mama cuchaman tupajta, Manasespaj llajtaca janaj ladomanca Aserpaj llajtahuanmi tupanacun. Inti llujshin ladomanca Isacarpaj llajtahuanmi tupanacun.

¹¹ Manasespaj huahua huahuacunaca Isacar, Aser shuti llajtacunapica cai pueblocunatapishmi charirca: Bet-seán, Ibleam pueblocunatami, muyundij llajtacunandij charirca. Dor pueblopi causajcunapish, muyundij llajtacunandij, Endor pueblopi causajcunapish, muyundij llajtacunandij, Taanac pueblopi causajcunapish, muyundij llajtacunandij, Meguido pueblopi causajcunapish, muyundij llajtacunandijmi paicunapaj carca. Chaicunaca quimsa jatun llajtacunami.

¹² Manasespaj huahuacunaca, chai pueblocunapi causajcunataca mana llujshichishpa cachai tucurcacunachu. Chaimantami cananeocunaca chai llajtacunamanta manataj llujshishpa chaipi causarcallacuna.

¹³ Chai q'uipami israelcunaca ña c'ari c'ari tucushpa, cananeocunataca tributota cobrarcacuna. Shina cashpapish chai llajtamantaca mana llujshichishpa cacharcacunachu.

Josepaj huahua huahuacunaca sachacunandij allpacunata japishcami

¹⁴ Josepaj huahua huahuacunaca, Josuetaca cashnami nircacuna: –Ñucanchijca Dios cunancama alli nishca cashpami, achcata mirarishcanchij. Chashna cashca jahuamari ñucanchijmanca shuj cutinlla sorteashpa, shujllapi allpataca cungui– nircacunami.

¹⁵ Chaimi Josueca: –Cancuna yallitaj achcacuna cajpi cancuna causanapaj Efraín urcucuna mana pajtajpica, ferezeocunapaj, refaitacunapaj llajtacunaman rishpa chai llajtacunapi caj sachacunata urmachigrichij– nirca.

¹⁶ Josepaj huahuacunaca: –Chai urcupish ñucanchijpajca mana pajtangachu. Chai pambajlla llajtacunapi causaj tucui cananeocunapish fierro carrocunatami charin. Bet-seán muyundij llajtacunapi causajcunapish Jezreel pugru pambapi causajcunapish chashnallatajmi charin– nircacunami.

¹⁷ Chaimi Josueca, Josepaj ishqui churicunapaj Efrainpaj, Manasespaj huahua huahuacunataca: –Cancunaca achcacuna cashcamantaca, jahuallamari mishai tucunguichij. Chaimanta cancunaca mana shuj partellapichu allpataca charinguichij.

¹⁸ Chai llajtapi causaj cananeocunataca, fierro carrocunayuj c'ari c'aricuna cajpipish cancunaca chai llajtamanta llujshichishpa cachanguichijmi. Chashna llujshichishpa cachashpami, chai urcucunataca sachata urmachishpa, cancuna causanapaj japinguichij. Maillata chai urcucuna cajtaca tucuitami japinguichij– nirca.