JOSUÉ 16 - Dios Rimashca Shimicunami

Efraín aillupaj, Manasés aillupaj llajtacuna maillata cashcami

¹ Josepaj huahua huahuacunapaj sorteajpica, cai llajtacunami paicunapajca urmarca: Inti llujshin ladoman caj Jordán yacumanta callarishpaca, Jericó pueblo jahua urcucunaman caj yacu pugyucuna tiyancama. Chaimantaca shitashca pambata huichi rishpa achca urcucuna tiyanpi caj Bet-elcamami carca.

² Bet-elmanta llujshishpaca, Luz pueblota rishpami, arquitacunapaj llajtata pasashpa Atarotman chayan.

³ Inti huashicun ladoman caj jafletitacunapaj llajtata uriyashpa, uraman caj Bet-horón pueblo lindecama, Gezercamami. Chaimantaca mama cuchamanmi llujshin.

⁴ Manasés, Efraín shuti Josepaj ishqui churicunapaj huahua huahuacunaca, paicuna japina cashcataca chai allpacunatami japircacuna.

⁵ Efrainpaj huahua huahuacunapaj mashna familiapaj allpaca caicunami: Paicuna japina cashca lindeca, inti llujshin ladotaca, Atarot-adarmanta jahua Bet-horoncamami.

⁶ Chaimantaca mama cuchacama, janaj ladotaca Micmetatcama, chaimantaca inti llujshin ladota muyushpami Taanat-silocama chayan. Chaimantaca Janoamanmi pasan.

⁷ Janoamantaca Atarot, Naarat pueblocunata uri rishpami Jericohuan tupanacushpa, Jordán yacuman llujshin.

⁸ Inti huashicun ladomanca, Tapuamanta tigrashpaca, Caná jatun yacuta catishpa mama cuchamanmi llujshin. Efrainpaj huahua huahuacunapaj mashna familiacuna japina cashca llajtacunaca chaicunami.

⁹ Efrainpaj huahua huahuacunapajca Manasespaj huahua huahuacuna japishca llajtapi caj maijan pueblocunatapishmi muyundij llajtacunandij paicunaman curca.

¹⁰ Shina cajpipish Efrainpaj huahua huahuacunaca, Gezerpi causaj cananeocunataca mana llujshichishpa cacharcacunachu. Chaimantami chai runacunaca, cunan punllacama impuestota pagashpa paicunahuan chagru causancuna.