JOSUÉ 15 - Dios Rimashca Shimicunami

Judá aillupaj llajta maillata cashcami

¹ Judá aillupajpish sorteajpica, tucui cai llajtacunami paicunapaj urmarca: Inti huashicun ladotaca, Edom llajtahuan tupanacuncama, ura ladotaca Zin nishca shitashca pambatami carca. Paicunamanca mashna familia cashcata ricushpa causana pajtatami curca.

² Ura ladotaca Cachisapa Cucha urimanta callarishpa,

³ Acrabim huichita, Zin nishca shitashca pambacama. Cades-barnea ura lado huichitaca, Hezroncama. Adar pueblota huichi rishpaca, Carca pueblomanmi muyurca.

⁴ Chaimantaca Asmonta pasashpa, Egiptopaj jatun yacucamami llujshirca. Mama cuchaman tupajtami carca. Ura lado lindeca tucui chaicunami canga nircami.

⁵ Inti llujshin lado huichitaca Cachisapa Cucha urimanta callarishpa, Jordán yacu chai cuchaman yaicuncamami. Janaj lado lindeca Jordán yacu yaicunmantami callarin.

⁶ Chaimantaca Bet-hogla pueblo huichita rishpa janaj ladoman caj Bet-arabacamami. Chaimantaca Rubenpaj churi Bohanpaj jatun rumi chaicamami.

⁷ Acor pugru pambamanta callarishpa huichi rishpaca, Debircamami. Janaj ladota muyurishpaca, Aduminman huichi rina Gilgal ch'imbapuratami. Ura ladotaca jatun yacuta catishpa, En-semes jatun pugyu yacuta pasashpa, Rogel pugyu yacucamami.

⁸ Chai lindeca Hinompaj churipaj pugru pambata huichi rishpami, Jebuseocuna causacun Jerusalén ura ladota pasan. Chaimantaca Hinompaj churipaj pugru pamba ch'imbapurapi tiyaj urcu puntatami huichiyan. Chai urcuca inti huashicun ladoman caj Refaim pugru pamba jahua ñan ladomanmi.

⁹ Chai lindeca urcu puntamantaca Netofa pugyuta muyushpami, Efrón urcu c'uchullapi caj pueblocunata pasashpa, Baala nishca Quiriat-jearimtami muyun.

¹⁰ Chai q'uipaca, chai lindeca Baalamantaca inti huashicun ladoman caj Seir urcuta muyushpami, jahua ladoman caj Quesalón nishca Jearim urcuta pasashpa, Bet-semes puebloman uri rishpa, Timna pueblota pasan.

¹¹ Chaimantaca Ecrón pueblo huichita rishpa Sicrón pueblota muyushpami, Baala urcuta pasashpa, Jabneelman llujshishpaca, mama cuchaman chayan.

¹² Inti huashicun lado lindeca Mama Cucha uritami carca. Judapaj huahua huahuacunaca chai tucui llajtacunatami paicunapaj japircacuna. Paicunamanpish mashnacunapura cajta ricushpa, causana pajtatami chai tucui llajtacunata curca.

Hebrón, Debir pueblocunata Caleb japishcami

¹³ Jefonepaj churi Calebmanca Mandaj Dios mandashca shinallatajmi Josueca Judá aillupura japishca llajtallapitaj allpacunata curca. Anacpaj yaya shayachishca Quiriat-arba pueblotami curca. Chai puebloca Hebronmi.

¹⁴ Calebmi, Anac runapaj Sesai, Ahimán, Talmai shuti quimsa churicunataca chai llajtamanta llujshichishpa cacharca.

¹⁵ Chai q'uipaca, Debirpi causajcunahuanmi macanacugrirca. Chai puebloca ñaupaca, Quiriat-sefermi carca.

¹⁶ Chaipi cashpami Calebca: “Quiriat-seferpi causajcunahuan maijanpish macanacushpa mishajmanca Acsa shuti ñuca ushushitami paipaj huarmi cachun cusha” nirca.

¹⁷ Chai llajtapi causajcunataca, Calebpaj huauqui Cenazpaj churi Otonielmi misharca. Chaimantami Calebca paipaj ushushi Acsataca, Otonielpaj huarmi cachun curca.

¹⁸ Otonielca Acsa huarmita paipaj huasiman pushacushpaca, tarpuna allpacunata cambaj yayata mañai nishpami yachachirca. Chaimi paica burropi tiyarishcamanta uricujpi paipaj yayaca: –¿Imatataj ningui?– nishpa tapurca.

¹⁹ Chaimi paica: –Ñucami cantaca shuj mañanata charini. Ñami Neguev pambapica allpacunata cuhuashcangui. Cunanca pugyu yacuyuj allpacunata cuhuayari– nijpimi Calebca janajmanpish, uramanpish yacuyuj allpacunata curca.

Judá aillupaj pueblocunami

²⁰ Cai tucui llajtacunatami, Judapaj aillu familiacunaca, paicuna japina cashca allpacunataca japircacuna.

²¹ Judapaj huahua huahuacunaca, ura ladoman caj Edom llajtahuan tupanacunpica cai pueblocunatami japircacuna: Cabseel, Edar, Jagur,

²² Cina, Dimona, Adada,

²³ Cedes, Hazor, Itnán,

²⁴ Zif, Telem, Bealot,

²⁵ Hazor-hadata, Queriot, cunanca Hazor nishca Hezrón,

²⁶ Amam, Sema, Molada,

²⁷ Hazar-gada, Hesmón, Bet-pelet,

²⁸ Hazar-sual, Beerseba, Bizotia,

²⁹ Baala, Iim, Esem,

³⁰ Eltolad, Quesil, Horma,

³¹ Siclag, Madmana, Sansana,

³² Lebaot, Silhim, Aín, Rimón shuti pueblocunatami japircacuna. Tucui chai ishqui chunga iscun pueblocunataca, muyundij llajtacunandijmi japircacuna.

³³ Pambajlla llajtacunapica, cai pueblocunatapishmi japircacuna: Estaol, Zora, Asena,

³⁴ Zanoa, En-ganim, Tapúa, Enam,

³⁵ Jarmut, Adulam, Soco, Azeca,

³⁶ Saaraim, Aditaim, Gedera, Gederotaim shuti pueblocunatami japircacuna. Chai chunga chuscu pueblocunatapish, tucui muyundij llajtacunandijmi japircacuna.

³⁷ Zenán, Hadasa, Migdal-gad,

³⁸ Dileán, Mizpa, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlis,

⁴¹ Gederot, Bet-dagón, Naama, Maceda shuti pueblocunatapish japircacunami. Chai chunga sujta pueblocunatapish tucui muyundij llajtacunandijmi japircacuna.

⁴² Libna, Eter, Asán,

⁴³ Jifta, Asena, Nezib,

⁴⁴ Keila, Aczib, Maresa shuti pueblocunatapish japircacunami. Chai iscun pueblocunatapish, tucui muyundij llajtacunandijmi japircacuna.

⁴⁵ Ecrontapish caishuj c'uchulla pueblocunandij, muyundij llajtacunandijmi japircacuna.

⁴⁶ Ecronmantaca mama cuchacama, Asdod muyundij llajtacunandijmi japircacuna.

⁴⁷ Asdodtapish c'uchullapi caj pueblocunandij, chai muyundij llajtacunandijmi japircacuna. Gaza c'uchullapi caj pueblocunatapish, muyundij llajtacunandijmi japircacuna. Tucui chai pueblocunataca, Egiptohuan tupanacunpi caj jatun yacucamami, Mama Cucha uri llajtacunandij japircacuna.

⁴⁸ Jahua urcucunamanca: Samir, Jatir, Soco,

⁴⁹ Dana, cunanca Debir nishca Quiriat-sana,

⁵⁰ Anab, Estemoa, Anim,

⁵¹ Gosén, Holón, Gilo shuti pueblocunatami japircacuna. Chai chunga shuj pueblocunatapish, tucui muyundij llajtacunandijmi japircacuna.

⁵² Arab, Duma, Esán,

⁵³ Janum, Bet-tapúa, Afeca,

⁵⁴ Humta, cunanca Hebrón nishca Quiriat-arba pueblotapish, Sior shuti pueblotapishmi japircacuna. Chai iscun pueblocunatapish, tucui muyundij llajtacunandijmi japircacuna.

⁵⁵ Maón, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Caín, Gabaa, Timna shuti pueblocunatapishmi japircacuna. Chai chunga pueblocunatapish, tucui muyundij llajtacunandijmi japircacuna.

⁵⁸ Halhul, Bet-sur, Gedor,

⁵⁹ Maarat, Bet-anot, Eltecón shuti pueblocunatami japircacuna. Chai sujta pueblocunatapish, tucui muyundij llajtacunandijmi japircacuna.

⁶⁰ Rabá pueblotapish, muyundij llajtacunandijmi japircacuna. Quiriat-baal pueblotapish, muyundij llajtacunandijmi japircacuna. Chai pueblollatatajmi, Quiriat-jearim nincuna.

⁶¹ Shitashca pambapica, Bet-arabá, Midín, Secaca,

⁶² Nibsán, En-gadi, Cachi tiyan pueblotapishmi japircacuna. Chai sujta pueblocunatapish, tucui muyundij llajtacunandijmi japircacuna.

⁶³ Judapaj huahua huahuacunaca, chai tucui pueblocunata japishpapish, Jerusalenpi causaj jebuseocunataca mana llujshichishpa cachai tucurcacunachu. Chaimantami jebuseocunaca cunancama, Judapaj huahua huahuacunahuan Jerusalenpi causancuna.