JOSUÉ 10 - Dios Rimashca Shimicunami

Amorreocunatapish israelcuna mishashcami

¹ Jerusalenta jatun mandaj Adonisedecca, Jericota shinallataj Hai pueblopi causajcunatapish jatun mandajndij chingachishpa Josué japishcatami uyarca. Gabaón pueblopi causajcunapish israelcunahuan mana macanacungapaj ari ninacushpa israelcunapurapi causacushcatapishmi uyarca.

² Gabaón puebloca shujtaj jatun pueblocuna shinallataj jatun mandajyuj, alli macanacuj soldadocunayuj cashca cashpapish, israelcunata manchashcata uyashpami Jerusalenta jatun mandaj Adonisedecca achcata mancharca.

³ Chaimantami Jerusalenta jatun mandaj Adonisedecca, Hebrón pueblota jatun mandaj Hohampajman, Jarmut pueblota jatun mandaj Pireampajman, Laquis pueblota jatun mandaj Jafiapajman, Eglón pueblota jatun mandaj Debirpajmanpish rishpa cashna nishpa cayamuchun cacharca:

⁴ “Gabaonpi causajcunaca Josuehuan, israelcunahuan mana macanacushpa sumajta causashun nishpami, ari ninacushcacuna. Cunanca Gabaonpi causajcunahuan macanacugringapaj ñucata ayudanaman shamupaichij” nichunmi cacharca.

⁵ Paicunaca Jerusalenta jatun mandaj, Hebronta jatun mandaj, Jarmutta jatun mandaj, Laquista jatun mandaj, Eglonta jatun mandajpish pichca jatun mandajcunami tandanacurcacuna. Paicunaca amorreocunata jatun mandajcunami, chaicunami paicunapaj soldadocunandij tandanacushpa Gabaón pueblo c'uchullapi carpa huasicunata shayachishpa paicunahuan macanacurcacuna.

⁶ Gabaonpi causajcunaca, chai mandajcuna paicunahuan macanacunaman shamujpimi, Gilgalpi Josueman cashna huillanaman cacharcacuna: “Urcupi causaj mandajcunami tucuicuna tandanacushpa, ñucanchijhuan macanacungapaj shamushcacuna. Ñucanchij cancunapajta rurajcunata llaquichichunca ama saquihuaichijchu. Ñucanchijta mitsashpa ayudanaman utca shamupaichigari” nishpami cacharcacuna.

⁷ Chaimi Josueca, Gilgalmantaca macanacunata alli yachaj soldadocunata, c'ari c'ari tucui runacunatapish pushashpa huichiyarca.

⁸ Mandaj Diosca Josuetaca: “Paicunataca ama manchaichu, ñucami tucui paicunataca cambaj maquipi churarcani. Cantaca pi mana mishai tucungacunachu” nircami.

⁹ Josueca, Gilgalmanta tucui tuta rishpa chaiman chayashpami, macanacushun nicujcunataca ñapish llaquichirca.

¹⁰ Chai runacunataca Mandaj Diosca, israelcunata jatunta manchana yuyaitami churarca. Gabaonpi causajcunahuan macanacushun nicujcunataca Josueca achcacunatami huañuchirca. Bet-horón puebloman huichi rina ñanta, Azeca shuti, Maceda shuti pueblocunacama catishpami ashtahuan huañuchircacuna.

¹¹ Israelcuna ama japichun miticushpa callpacuj amorreocunaca, Bet-horón pueblo ñan urita ricujpimi, Mandaj Diosca jahua pachamanta jatun runducunata paicunapaj jahuapi shitarca. Azeca pueblocamami shitarca. Chai runducunaca israelcuna espadahuan huañuchishcatapish yallitami huañuchirca.

¹² Mandaj Dios amorreocunata israelcunapaj maquipi churajpica, Josueca Mandaj Diostaca tucui israelcunapaj ñaupajpimi cashna nirca: “Mandaj Dios, intitaca Gabaón pueblo jahuallapi shuyachi, lunataca Ajalón pugru pamba jahuallapi shuyachi” nircami.

¹³ Israelcuna paicunata p'iñajcunata tucui huañuchingacamami intipish, lunapish shayarirca. Chaupi punlla shinapi shayarishpaca, shuj punlla shinahuan inti mana huashicushcataca Jaser libropimi quillcashca tiyacun.

¹⁴ Chai punlla tucushca shinaca ñaupamanpish, q'uipatapish manataj chashna tucushcachu. Shuj runa mañashcata Mandaj Dios uyashcallamantami chashna tucushca. Chai punllaca Mandaj Diosca, israelcunapaj allipajmi macanacurca.

¹⁵ Chai q'uipaca Josueca tucui israelcunandijmi Gilgalpi caj carpa huasicunaman tigrarcacuna.

¹⁶ Macanacungapaj shamuj pichca jatun mandajcunaca pacatucushpa callpashpaca, Maceda pueblo chaipimi shuj jutcupi miticurcacuna.

¹⁷ Chai pichca mandajcuna Macedapi caj jutcupi miticushpa tiyacujta ricushpa Josueman huillajpica,

¹⁸ Josueca: “Jutcu punguman jatun rumicunata singuchishpa huichcashpa, cuidaj runacunata chaipi churaichij nishpami mandarca.

¹⁹ Cancunaca ama saquirichijllachu. Ashtahuanpish mirga mirga tucushpa cancunata p'iñajcunataca mashcashpa huañuchigrichij. Paicunapaj pueblocunaman yaicujtapish ama saquichijchu. Cancunata Mandaj Diosca paicunataca ñami cancunapaj maquipi churarca” nircami.

²⁰ Josuehuan israelcunahuanca amorreocunataca jatunta llaquichishpami tucuicunata huañuchircacuna. Pueblo muyundijta pircashca ucuman yaicujcunallami saquirircacuna.

²¹ Tucuita huañuchishca q'uipaca israelcunaca shujllapish mana huañushpa, ima mana tucushcami, Macedapi caj carpa huasicunaman Josuepajman tigrarcacuna. Israelcunata p'iñajcunaca paicunata c'amingapajca c'allullapish mana cuyurircacunachu.

²² Chaimi Josueca israelcunataca: “Jutcupi huichcashca tiyacuj chai pichca jatun mandajcunata llujshichichij” nirca.

²³ Josué nishca shinallatajmi israelcunaca chai pichca jatun mandajcunataca, Jerusalenta jatun mandajta, Hebronta jatun mandajta, Jarmutta jatun mandajta, Laquista jatun mandajta, Eglonta jatun mandajtapish jutcumanta llujshichircacuna.

²⁴ Chai mandajcunata Josuepajman pushamujpimi, paica tucui israelcunata chaiman cayashpa, soldadocunata mandajcunataca cashna nirca: “Caiman c'uchuyashpa cai mandajcunapaj cungapi cancunapaj chaquihuan saruichij” nijpimi paicunaca chashna rurarcacuna.

²⁵ Chaipimi israelcunataca Josueca: “Cancunata p'iñajcunataca ama manchaichijchu, ama chujchuichijchu. Ashtahuanpish c'ari c'ari caichij. Cancunata p'iñajcunataca Mandaj Diosca, tucuicunatami chashnallataj ruranga” nirca.

²⁶ Chai q'uipami Josueca chai mandajcunataca huañuchishpa, pichca yuracunapi shuj shuj huarcuchirca. Chai yuracunapica tutayangacamami huarcushca carcacuna.

²⁷ Ña inti huashicugrijpimi, Josueca israelcunataca chai huañushcacunata yuracunamanta uricuchishpa, paicuna miticushca jutcullapitaj churagrichun mandarca. Chaipi churashpaca, jatun rumicunahuanmi chai jutcu pungutaca tapashpa churarcacuna. Cunan punllacamami chashnallataj tiyacun.

Shujtaj llajtacunatapish japishcami

²⁸ Josueca chai punllallatajmi, Maceda pueblota japishpa, tucui chaipi causajcunatapish espadacunahuan huañuchishpa paicunapaj jatun mandajtapish huañuchirca. Chaipi caj causaiyujcunataca shujllatapish mana saquishpami tucuita chingachirca. Maceda pueblota jatun mandajtapish Jericota jatun mandajta shinallatajmi rurarca.

²⁹ Maceda pueblomantaca Josueca, tucui israelcunandijmi Libna pueblopi causajcunahuan macanacungapaj rirca.

³⁰ Mandaj Diosca chai pueblopi causajcunatapish, chai pueblota jatun mandajtapish israelcunapaj maquipi churajpimi, israelcunaca chai pueblopi caj causajcunataca shujllatapish mana saquishpa espadacunahuan tucuita huañuchirca. Jericota jatun mandajta shinallatajmi, chai pueblota jatun mandajtapish rurarca.

³¹ Libna pueblomantapish Josueca tucui israelcunandijmi Laquis puebloman rircacuna. Chai pueblopi causajcunahuan macanacungapajmi, chai pueblo c'uchullapi carpa huasicunata shayachishpa macanacunalla shayarircacuna.

³² Mandaj Diosca Laquis pueblopi causajcunatapish, israelcunapaj maquipi churajpimi, chai cayandij punllaca chai pueblota japishpa chaipi caj tucui causaiyujcunataca espadacunahuan huañuchircacuna. Paicunatapish Libna pueblopi causajcunata shinallatajmi rurarcacuna.

³³ Gezer pueblota jatun mandaj Horamca, Laquis pueblopi causajcunata ayudashpa, israelcunahuan macanacungapajmi huichiyarca. Paicunatapish Josueca shujllatapish mana saquishpami tucuicunata huañuchirca.

³⁴ Laquis pueblomantaca Josueca, tucui israelcunandijmi Eglón puebloman rirca. Chai pueblo c'uchullapimi carpa huasicunata shayachishpa macanacunalla shayarircacuna.

³⁵ Chai pueblota japishpaca, chai punllallatajmi chai pueblopi caj causaiyujcunataca espadacunahuan tucuicunata huañuchirca. Paicunatapish Laquis pueblopi causajcunata shinallatajmi rurarcacuna.

³⁶ Chai q'uipaca Josueca, tucui israelcunandij Eglón pueblomanta Hebrón puebloman huichiyashpami, chaipi causajcunahuan macanacunalla shayarirca.

³⁷ Chai pueblota japishpaca, chai pueblota jatun mandajtapish, pai mandacushca caishuj pueblocunapi causaiyujcunatapish shujllatapish mana saquishpami tucuicunata espadacunahuan huañuchircacuna. Chaicunapi causajcunatapish Eglón pueblopi causajcunata shinallatajmi causaiyujcunataca tucuita chingachircacuna.

³⁸ Chai q'uipaca Josueca, tucui israelcunandij Debir puebloman rishpami paicunacunahuan macanacunalla shayarircacuna.

³⁹ Chaipi causajcunataca paicunata jatun mandajndij chai jatun mandaj mandacushca caishuj pueblocunapi causajcunandijmi espadacunahuan tucuicunata huañuchircacuna. Paicunatapish causaiyujcunataca shujllatapish mana saquishpami tucuicunata chingachircacuna. Chai Debir pueblopi causajcunatapish paicunapaj jatun mandajtapish Hebronpi, Libnapi causajcunata paicunapaj jatun mandajndij ima shina rurashca shinallatajmi rurarcacuna.

⁴⁰ Chashnami Josueca, Neguev llajtapi caj llajtacunataca: Urcu llajtapi causajcunatapish, quinri llajtapi causajcunatapish, pamba llajtapi causajcunatapish paicunapaj jatun mandajcunandij shujllatapish mana saquishpa causaiyujcunataca tucuicunata espadacunahuan huañuchircacuna. Israelcunata Mandaj Dios mandashca shinallatajmi rurarcacuna. Chashnami chai llajtacunataca tucuita japircacuna.

⁴¹ Josueca Cades-barnea pueblomanta callarishpaca Gaza pueblocama, shinallataj Gosén llajtamantaca Gabaón pueblocamami tucuicunata huañuchirca.

⁴² Chai pueblocunapi causajcunata jatun mandajcunataca, shuj cutin macanacuipimi tucuita huañuchishpa, paicunapaj llajtacunatapish tucuita japircacuna. Israelcunata Mandaj Dios paicunamanta macanacujpimi, chashna misharcacuna.

⁴³ Chai q'uipaca Josueca tucui israelcunandijmi Gilgalpi caj paicunapaj carpa huasicunaman tigrarcacuna.