JONÁS 2 - Dios Rimashca Shimicunami

Taita Diosta Jonás mañashcamanta

¹ Jonasca chalhuapaj huijsa ucupi cashpami Mandaj Diostaca,

² cashna nishpa mañarca: “Ñucaca llaquihuan cashpami, Mandaj Diostaca mañarcani. Paica uyahuarcami. Huañushca shina cashpa canta caparijpica, uyahuarcanguimi.

³ Ñucataca mama cucha chaupipimari shitahuarcangui. T'imburicuj yacumari millpurca. Cambaj yacucunaca caiman chaiman cuyurishpamari, ñuca jahuata pasarca.

⁴ Chaimantami: Cambaj ñaupajmanta shitashca cashpapish, cambajlla sumaj huasitaca ricusharajmi nircani.

⁵ Yacuca tucuimi millpurca. Jatun yacu ucupimari carcani. Yacu millmacunami ñuca umapi pillurirca.

⁶ Urcucuna chaquimanmi uriyarcani, ña huiñaipaj allpa tapashca shinami carcani. Chashna cajpipish ñucata Mandaj Taita Dioslla, canmari ñucataca pambashca ucumanta llujshichihuarcangui.

⁷ Ña huañugricushpami, can Mandaj Diosta yuyarircani. Ñuca mañashcaca cambajlla huasiman uyarishcatajmari.

⁸ Rurashcalla dioscunata yanga mañajcunaca, cambaj c'uyaitami cungarincuna.

⁹ Ashtahuanpish cantaca ñuca shimihuan cantashpami alabasha. Animalcunatapish cushpa huañuchishami. Canman imata cusha nishcatapish cushatajmi. Mandaj Dioslla, canllami quishpichij cangui” nishpami mañarca.

¹⁰ Mandaj Diosllataj cutin mandajpimi, Jonasta millpuj chalhuaca chaquishca allpaman llujshishpa, Jonasta shungu tigrarca.