JOEL 1 - Dios Rimashca Shimicunami

Langosta c'urucuna granocunata micushpa chingachishcamanta

¹ Mandaj Diosca Petuelpaj churi Joeltaca cashnami nirca:

² “Cunaj yuyajcunapish, cai llajtapi tucui causajcunapish caita alli uyaichij: ¿Cancunaca cai shina llaquicunataca ricushcanguichijchu imatagari? ¿Cancunapaj ñaupa yayacunapish cai shina llaquicunataca ricushcachu canga imatagari?

³ Cai llaquicunataca, cancunapaj huahuacunaman huillanguichij. Paicunaca paicunapaj huahuacunaman huillachuncuna. Chai huahuacunapish, paicunapaj huahua huahuacunamanmi huillangacuna.

⁴ Cancuna tarpushca granocunamanta oruga c'urucuna mana tucui micushcataca, p'ichachaucunami micurca. P'ichachaucuna mana tucui micushcataca, revoltón c'urucunami micurca. Revoltón c'urucuna mana tucui micushcataca, langostacunami micushpa chingachirca.

⁵ Machajcunalla, rijcharishpa huacaichigari. Llullu vinota rurashpa ubyajcunalla, tucuicuna caparirishpa huacaichigari. Cancuna ubyana vinotaca quichugrinmari.

⁶ Ñuca llajtamanca, mana yupaipaj c'ari c'ari achca runacunamari yaicumurca. Paicunapaj ñaupaj quirucunapish, jashlin quirucunapish leonpaj quirucuna shinamari.

⁷ Ñuca uva chagracunatapish chingachircami. Ñuca higo yuracunatapish ramacunacama tucui jahua caratami lluchushpa micurcacuna, yuraj caspicunallatami urmachishpa saquircacuna.

⁸ Cazarana tucushca huarmi paipaj cusa cana huañujpi, cañamazuta churarishpa huacaj shina huacayari.

⁹ Mandaj Diospaj huasimanca Diosman imalla cuna cashcatapish, tallina vinotapish ña mana apamuncunachu. Chaimantami Mandaj Diospajta ruraj curacunaca, llaquirishpa huacacuncuna.

¹⁰ Chagracunaca llaquinayajmari. Tarpuna allpaca, chushaj yana allpallamari. Trigopish tucurishcamari, llullu vinopish chaquirishcamari, aceitepish chingarishcamari.

¹¹ Allpapi tarpushpa causajcunapish, uvata tarpushpa causajcunapish caparirishpa huacaichigari. Allpapi tarpushca trigo muyupish, cebada muyupish tucuimari chingarishca.

¹² Uva chagracunapish chaquirishcamari, higo yuracunapish chingarishcamari. Granada yuracunapish, palmera yuracunapish, manzana yuracunapish, tucui shujtaj yuracunapish chaquirishcamari. Chashnami huañujlla aichayuj runacuna cushicunaca chingarishca.

¹³ Curacuna, chumbillirishpa caparishpa huacaichigari. Mandaj Diosman altarpi cushpa rupachijcuna, huacaichigari. Ñuca Diospajta rurajcuna, cañamazuta churarishpa dormichigari. Cancunapaj Diospaj huasimantaca imalla cuna cashcatapish, tallina vinotapishmi anchuchishca.

¹⁴ Ayunangapaj tandanacuchun tucuicunaman huillaichigari. Cancunata Mandaj Diospaj huasimanca cunaj yuyajcunatapish, cai llajtapi causajcunatapish tucuicunata tandachishpa, Mandaj Diosta caparishpa mañaichigari.

¹⁵ ¡Aij, Mandaj Dios shamuna punllaca ñamari pajtamucun! Tucuita Rurai Tucuj Mandaj Dios jatunta llaquichina punllaca ñamari chayamucun.

¹⁶ Ñucanchijtaca ñahui ricucuitamari micunacunatapish quichurca. Taita Diospaj huasipi cushicushpa micunatapishmari quichurca.

¹⁷ Tarpushca granocunapish, allpa ucullapitajmi ismushpa chingarirca. Trigo muyu chingarishcamantaca, huaquichina huasicunaca chushajllamari. Chai granocunata huaquichina huasicunaca urmashcamari.

¹⁸ ¡Animalcunaca llaquinayajtamari huacarcacuna! ¡Vacacunaca yangallamari q'uihuata mashcashpa purircacuna! Shinallataj oveja canllapish yaricaihuanmi huañurcacuna” nircami.

¹⁹ Mandaj Dioslla, cantami caparisha. Shitashca pambapi huiñacuj q'uihuacunatapish, urcucunapi tiyaj yuracunatapish nina lunyashpamari, tucuita rupachishpa chingachirca.

²⁰ Larca yacucunapish chaquirinca. Shitashca pambacunapi tiyaj q'uihuacunatapish nina tucui rupachinca. Sacha animalcunapish, can Mandaj Diosmanca huacashpami huillangacuna.