JOB 9 - Dios Rimashca Shimicunami

Jobca Diosmanca mana imata cutichi tucushcamanta

¹ Jobca cashna nishpami cutichirca:

² Ñucaca chashna cana cashcataca yachanillatajmi. ¿Ima shinataj runaca Taita Diospaj ñaupajpica, alli ricuringari?

³ Paihuan rimanacushpapish, huaranga shimicunamantaca shujllatapish mana cutichi tucungachu.

⁴ Paica tucuita yachajmi, imatapish rurai tucujmi. Maijanpish paita c'ariyashpa shayarijtaca chingachinllami.

⁵ Pai p'iñarishpaca, urcucunatapish tugyachinllami. Chashna llaquichishcataca, pi mana yachanchu.

⁶ Paica allpataca, maipi tiyacushcamantaca cuyuchinllami. Allpata aparicuj pilarcunatapish chujchuchinllami.

⁷ Intita ama llujshichun nishpa pai mandajpica, mana llujshinchu. Luzerocunatapish sellashca shinami pacan.

⁸ Paillami jahua pachataca, linsota chutaj shina churarca. Paica caiman chaiman cuyucuj mama cucha jahuata purijmi.

⁹ Osa shuti, Orión shuti, Pléyades shuti luzerocunatapish paimi rurarca. Shinallataj uraman tiyaj pacallacunatapishmi rurarca.

¹⁰ Paica pipish mana entendipaj imallatajshi jatuncunata rurajmi. Mana yupai tucuipaj achca allicunatapish rurajmi.

¹¹ Riqui, pai ñuca ñaupajta rijpipish, paitaca manamari ricunichu. Pai pasajpipish, manamari entendinichu.

¹² Pai imata quichujpica, ¿pitaj cutin tigra quichui tucungari? ¿Pitaj imatataj ruracungui ningallapishri?

¹³ Taita Diosca, pai p'iñarinataca mana saquingachu. Jatun tucushcacunata ayudajcunapish, paipaj chaqui ucupimi sarurincuna.

¹⁴ ¿Ñucacarin paimanca imatataj cutichishari? ¿Mashna agllashca shimicunatataj paihuanca rimashari?

¹⁵ Ñucaca cashcata ruraj cashpapish, mana imata cutichi tucuimanchu. Ashtahuanpish ñuca jueztaca rogarimanllami.

¹⁶ Ñuca mañashcata uyashpa pai cutichijpipish, ñuca rimashcata uyashcataca manaraj crimanchu.

¹⁷ Paica ñucamanca, jatun mancharina llaquicunatami curca. Yangamantamari ñuca chugricunataca, ashtahuan mirachirca.

¹⁸ Cushicuita charichunpish, mana saquinchu. Ashtahuanpish jatun llaquicunallatamari apachihuarca.

¹⁹ Pai imata rurai tucuj cashcata rimajpica, tucuita rurai tucujmi. Ima rurashcata ricui callarijpica, ¿pitaj ñucapaj randica, shayari tucungari?

²⁰ Ñucaca cashcata rurajmi cani nirishpaca, ñuca quiquin shimillahuantajmi llaquipi yaicuiman. Ñucaca ima pandata mana ruraj canichu nirishpapish, millai runami caiman.

²¹ Ñucaca ima juchachina illajlla cashpaca, ñucallatajmi mana cazuriman. Ñuca causaitapish p'iñaimanmi.

²² Caillatami nisha nini: Paica allita rurajtapish, paita mana manchajtapish chingachinllami.

²³ Azotishpapish huañuchinllami. Ima juchachina illaj runa llaquihuan cajpipish, asinllami.

²⁴ Cai pachataca, Diosta mana manchajcunamanmi curca. Paicunapaj juezcunapaj ñahuicunatapish tapanmi. Mana paillataj tucuita ruracujpica, ¿pitaj canga, maipitaj canga?

²⁵ Ñuca causai punllacunaca, quillcata apajtapish yalli utcamari callpashca. Ima allitapish manaraj ricujpimari miticushca.

²⁶ Callpaj barcocuna shinamari callpashca. Aichata micunaman uriyacuj águila shinamari callpashca.

²⁷ Ñucaca: Llaquicunata cungarishpa, llaquijlla ñahuita mana ricuchishpa, cushijlla cashcata ricuchisha yuyanimi.

²⁸ Shina cajpipish, cai tucui nanaicunaca muspachicunmari. Ñucataca manamari ima juchachina illajlla cashcata yuyanguichu.

²⁹ Ñucaca Diosta mana manchajmi cani. ¿Imapajtaj yangaca imatapish rurashari?

³⁰ Ñucataca rasu yacucunahuan armarishca cajpipish, maquicunata rasu shinallataj yurajllata maillarishca cajpipish,

³¹ jutcupimari shitahuashcangui. Chaipica ñuca quiquin churanacunapish, ñucataca millanachingacunami.

³² Paica manamari ñuca shina runallachu. Chaimantami paitaca mana c'ariyai tucuni. Paihuan ñucahuan parlanacushpaca, alli tucuimanchari.

³³ Ñucanchij jahuapi maquicunata churashpa allichij juezca, pi mana tiyanchu.

³⁴ Paipaj varata ñuca jahuamanta anchuchishpachari alli canman. Pai cachashca manchaipish ñucataca, ama manchachishca cachun.

³⁵ Chashna cajpica, mana manchashpa rimashami. Cunanca cashnaca mana ñucachu cani.