JOB 8 - Dios Rimashca Shimicunami

Bildadca Diosca cashcallatatajmi rurashca nishcami

¹ Súa pueblomanta Bildad runami cashna nishpa cutichirca:

² “¿Maicamataj chashna rimaricunguillari? Can rimashca shimicunaca, acapana huaira jatarishca shinallamari.

³ Taita Diosca allita ruranataca ¿p'aquishcami canga yuyanguichu? Tucuita Rurai Tucuj Diosca, cashcata ruranataca ¿shujtajyachishcami canga yuyanguichu?

⁴ Cambaj huahuacuna paita mana cazushpa juchata rurashcamantami, paicunataca chai juchamanta llaquichishca canga.

⁵ Canca tutamantapi Taita Diosta mashcashpa, Tucuita Rurai Tucuj Diosta mañashpa,

⁶ chuya shungu tucushpa allita ruraj cajpica, cunanmantaca paimi cantaca yuyaringa. Cashcata can rurashcamantaca, cambaj huasipipish ashtahuanmi mirachinga.

⁷ Canca ñaupaman ashallata charishca cashpapish, q'uipataca achca allicunatami charingui.

⁸ Cunanca ñaupa huiñai yayacunata tapuiri, chai yayacunapaj yayacuna imallata yachashcata yachai.

⁹ Ñucanchijca cainallamantami canchij, chaimantami mana imata yachanchij. Ñucanchij causaica, cai pachapica llandu shinallami.

¹⁰ Cantaca paicunaca yachachingami. Imallatapish rimangami, imalla yuyashcata quiquin shungupi charicushcamanta llujshichishpami rimangacuna.

¹¹ ¿Carrizoca mana lodo tiyanpica huiñangallachu? ¿Michina q'uihuaca, yacu mana tiyanpica huiñangallachu?

¹² Verdijlla cashpapish, mana p'itishca cashpapish, chaicunami tucui q'uihuacunamanta ñaupaman chaquirin.

¹³ Taita Diosta cungarijcuna imalla rurashcapish chashnallatajmi tucun. Diosta mana manchaj runa shuyacushcapish, chai shina chingarinllami.

¹⁴ Pai shuyacushcaca p'itiringami. Pai shunguta churashcaca araña ahuashca shinallami.

¹⁵ Paipaj huasipi taunarijpica, urmangallami. Maquihuan lutsarijllapipish p'itiringallami.

¹⁶ Millaita rurajca, intipi mana chaquirij verdijlla yura shinami. Paipaj ramacunapish tucui huertata tapacuj yallitaj jatunmi.

¹⁷ Paipaj sapicunapish yacu c'uchupi cashpaca, caita chaita ahuarishpa rinllami. Rumilla allpaman chayangacamami suniashpa huiñan.

¹⁸ Pai maipi tiyacushcamanta p'itishpa shitajpica, pai maipi tiyacushca allpapish: Cantaca mana ricushcanillapishchu ningami.

¹⁹ Chashnami pai cushicushpa causanaca tucuringa. Pai maipi tiyacushca allpallapica, shujtaj q'uihuacunami huiñanga.

²⁰ Riqui, Taita Diosca ima pandata mana rurajtaca mana p'iñanchu. Millaicuna imata rurachunpish, mana ayudanchu.

²¹ Ashtahuanpish canca shimi jundatami asingui, cambaj shimihuanpish cushicushpami cantangui.

²² Canta p'iñajcunaca musparinahuanmi churarishca shina saquiringa. Diosta mana manchajcunapaj huasicunaca chingaringami” nircami.