JOB 5 - Dios Rimashca Shimicunami

¹ Cunanca sinchita capariyari, maijan cutichinchu imami. ¿Maijan angelpajmantaj tigrashpa rigringuiyari?

² Rumi shungu runataca, p'iñarina yuyaillami huañuchicun. Charina yuyailla causajcunataca, shujtajcuna charishcata munana yuyaillami tucuchicun.

³ Ñucaca, rumi shungu runataca sapiyashpa yallitaj jatun tucujtami ricurcani. Chaimantami chai ratollataj pai causana huasitaca, llaqui tucushca canman nircani.

⁴ Paipaj huahuacunaca mana ashtahuan sumajta causai tucungacunachu. Puebloman yaicuna pungullapimi huañuchingacuna. Paicunata quishpichijca, pi mana tiyangachu.

⁵ Paipaj granocunataca yaricaihuan cajcunami micungacuna. Casha chaupicunamantapish mashcashpami apangacuna. Yacunaihuan cajcunapish paipaj haciendamantami ubyangacuna.

⁶ Llaquica mana allpamanta llujshinchu. P'iñana yuyaica, mana pambamanta huiñanchu.

⁷ Ashtahuanpish rupacuj ushpa jatarishpa, huairata callpaj shinami tucun. Chashna llaquipajllami runaca huacharin.

⁸ Ñucaca Taita Diostachari mashcaiman, paimanchari ñuca llaquitaca mingaiman.

⁹ Paica achca allicunatapish, pipish mana rurai tucuipajcunatapish, mana yupai tucuipaj sumaj allicunatapish rurajmi.

¹⁰ Cai pachamanca tamyatami cachan, tarpushcacunamanca yacutami cachan.

¹¹ Yangacunatapish jatuntami ruran. Llaquilla cajcunataca mana urmanapi churashpa cushichinmi.

¹² Millaita rurangapaj yuyaisapacunataca, paicunapaj maquicunahuan ama imata rurai tucuchunmi muspachin.

¹³ Jatun yachajcunataca, paicuna yachashcallapitaj japishpa muspachinllami. Millai runacunataca, paicuna yuyashcallapitaj pandachinllami.

¹⁴ Punllapica amsahuanmi tsagnaringacuna. Chaupi punllapimi tutapi shina tantiashpa purincuna.

¹⁵ Chashnami Diosca huajcha runataca, espadapi huañunamantapish, paita mana manchajcunapaj shimimantapish, huañuchijcunapaj maquimantapish quishpichin.

¹⁶ Huajcha runaca paillatami shuyan. Millaicunataca millaita rurashcallatajmi shimitaca huichcanga.

¹⁷ Ricuiri, Taita Dios llaquita cachashca runaca cushicunmari. Chaimanta Tucuita Rurai Tucuj Dios ima shinapish llaquichijpica, mana p'iñarinichu.

¹⁸ Paillatajmi caracha ungüitaca churarca, chaitaca paillatajmi maillashpa huatanga. Pai chugrichishcataca, paipaj maquicunallahuantajmi jambin.

¹⁹ Sujta cutin jatun llaquicunata apacujpipish quishpichingami. Ña canchis cutinpica, ima mana allipish cantaca mana japingachu.

²⁰ Cantaca yaricaihuan huañunamantapish quishpichingami. Jatun macanacuipipish espadapi huañunamanta quishpichingami.

²¹ Millaita rimaj c'allucunamantapish pacashcami cangui. Chingachij jatun llaqui shamujpipish, mana manchanguichu.

²² Canca llaqui japijpipish, yaricai japijpipish asinguimi. Sachapi causaj p'iña animalcunatapish mana manchanguichu.

²³ Shinallataj allpapi sirij rumicunapish cambaj chagra p'ucunataca mana jarcangachu. Sachapi causaj p'iña animalcunapish canhuanca sumajtami causangacuna.

²⁴ Cambaj huasipica sumaj causai tiyashcatami yachaj chayangui. Can causana huasita ricunaman yaicushpaca, imapish mana illashcatami ricungui.

²⁵ Chashnallataj canca, cambaj huahua huahuacuna achca cashcatapishmi ricungui. Cambaj huahua huahuacunaca allpapi huiñaj q'uihua shinami cangacuna.

²⁶ Trigota tandana punlla tucujpi, tandachishca shinami ña yuyaj tucushpaca, pambana jutcupi pambarinaman rina cangui.

²⁷ Riqui, cai tucuitami yuyachishcanchij. Chaica chashnallatajmi tucunga. Uyashpapish cambaj quiquin allipajllataj yachayari nircami.