JOB 42 - Dios Rimashca Shimicunami

Jobca juchacunata Diosman huillashpa Diospaj ñaupajpi alli llujshishcamanta

¹ Jobca Mandaj Diostaca cashna nishpami cutichirca:

² “Ñucaca cantaca tucuita rurai tucuj cashcatami yachani. Cambaj yuyaimantaca imapish mana pacalla cai tucunchu.

³ ¿Pitaj can imalla ruranacunamantaca, manapish entendishpa ñucataca muspachircachu imami? Chaimantami ñucaca mana ima yuyaita japishpa rimaricurcanilla. Ñucapajca yallitaj jatun mancharinacunamari cashca, chaitaca mana entendircanichu.

⁴ Canhuan rimasha ninica, ñucata uyahuayari. Ñuca tapushcacunataca can cutichihuangui.

⁵ Ñucaca parlashcallatami canmantaca uyarcani. Cunanmi cantaca ñuca quiquin ñahuihuantaj ricuni.

⁶ Chaimantami ñucallataj manchanayajta llaquirishpa, allpa jahuapi ushpa jahuapi tiyarini” nircami.

⁷ Mandaj Diosca cai tucuita Jobta rimashca q'uipami, Temanmanta caj Elifaztapish cashna rimarca: “Cancunaca ñucata servij Job shinaca ñucamantaca ima allicunata mana huillacunguichij. Chaimantami canhuanpish, caishuj ishqui runacunahuanpish yallitaj p'iñarini.

⁸ Chashna mana allita rurashcamanta, cunanca canchis c'ari bizicunata, canchis carnerocunata apashpa, cancunamanta ñucaman cushpa tucui rupachichun ñucata servij Jobman cugrichij. Ñucata servij Jobmi cancunamantaca ñucata mañanga. Pai mañashcatami ñucaca uyasha. Pai mañajllapimi cancunataca mana ñucamanta ima allicunata huillashca cajpipish, mana jatunta llaquichisha. Cancunaca manamari ñucata servij Job shina carcanguichijchu” nircami.

⁹ Shina nijpimi Temanmanta Elifazpish, Suhamanta Bildadpish, Naamanmanta Zofarpish, Mandaj Dios mandashca shinallataj rurarcacuna. Chaimantami Mandaj Diosca Job mañashcataca chasquirca.

Diosca Jobman allicunata cushcamanta

¹⁰ Paihuan alli apanacuj quimsa runacunamanta mañashca q'uipami, Mandaj Diosca Jobmantaca chai tucui llaquicunata anchuchirca. Shinallataj Jobmanca ñaupa charishcamanta ishqui cutihuan yallimi tucuita curca.

¹¹ Chaita ricushpami, paipaj huauquicunapish, panicunapish, tucui ñaupa rijsishcacunapish, paipaj huasiman shamushpa paihuan micurcacuna. Mandaj Dios paiman llaquicunata cachashcamanta, llaquirishcata ricuchishpa cushichingapajmi shamurcacuna. Paicunaca tucuicunami shuj cullquitapish, shuj curi sortijastapish cungapaj apamurcacuna.

¹² Mandaj Diosca Jobmanca q'uipa punllacunapica, ñaupa punllacunapi bendiciashcatapish yallitami bendiciarca. Chaimantami paica, 14.000 ovejacunata, 6.000 camellocunata, 1.000 yunta huagracunata, 1.000 burrocunatapish charirca.

¹³ Canchis churicunatapish, quimsa ushushicunatapishmi charirca.

¹⁴ Punta ushushitaca Jemima shutitami shutichirca, q'uipa ushushitaca Cesia shutitami shutichirca, chaipaj q'uipa ushushitaca Keren-hapuc shutitami shutichirca.

¹⁵ Chai llajtapica Jobpaj ushushicuna shina sumaj huarmicunaca, pi mana tiyarcachu. Jobca paicunamanpish, paicunapaj turicunaman shinallatajmi japina cashcata curca.

¹⁶ Jobca ungüimanta alliyashca q'uipaca, 140 huatacunahuanmi causarca. Paica, paipaj huahuacunapaj huahuacunatapish, chai huahuacunapaj huahua huahuacunatapishmi ricurca. Paica chuscu cutin nietocuna ricuringacamami causarca.

¹⁷ Chaimantaca yallitaj yuyajyashpami huañurca.