JOB 41 - Dios Rimashca Shimicunami

¹ Canca leviatán animaltaca ¿anzuelollahuanchu llujshichinguiman? ¿Paipaj c'allutapish huatanguimanchu?

² ¿Singa t'utucunapipish huascata pasachinguimanchu? ¿quijaduscunapipish fierro ipita churanguimanchu?

³ ¿Ama llaquichihuaichu nishpachu, cantaca mañanga? ¿Cantaca mishqui shimicunahuanchu rimanman?

⁴ ¿Paica tucui causaipi canta servingapaj canhuanca ari ninacunmanchu?

⁵ ¿Paihuanca pajarohuan shinachu pugllanguiman? ¿Cambaj ushushicuna pugllachun huatashpa churanguimanchu?

⁶ ¿Paitaca taucacunapura jatun micuita rurashpa micungacunachu? ¿Paitaca, c'atujcuna, randijcunapura chaupinacungachu?

⁷ ¿Paipaj carataca cuchillohuan p'itinguimanchu. Paipaj umataca, chalhuata japijcunapaj tujsina fierrohuan p'itinguimanchu?

⁸ Paitaca cambaj maquihuan huajtagriyari. Canca paihuan macanacushcataca yuyaricunguillami. Mana cutinca macanacusha ninguichu.

⁹ Paita japinata yuyashpapish, chanzata rurashcallami saquiringuiman. Pipish paita ricushpallami, chahuata huañunman.

¹⁰ ¿Paitaca pitaj c'ari tucushpa rijchachi tucungari? Ñuca ñaupajpicarin ¿pitaj shayari tucungari?

¹¹ ¿Pitaj q'uipata cuchun nishpa, ñucamanca ñaupaman imata cushca canga? Cai pachapi imalla tiyajcunaca ñucapajmari.

¹² Pai ima shina cashcatapishmi huillasha nini. Paipaj fuerzamantapish, ch'imbapurangapaj mana manchaj cashcatapishmi huillagrini.

¹³ Paipaj aichata tapaj carataca ¿pitaj anchuchi tucungari? ¿Pitaj paitaca ishqui frenota churai tucungari?

¹⁴ ¿Pitaj paipaj shimitaca pascangari? Paipaj quirucunapish manchanana filajlla quirucunamari.

¹⁵ Paipaj churanapish imapish mana yaicuipaj sinchi escudocunata quichquijllata sirashca shinami.

¹⁶ Jahuanpi huasha huashan c'atashcami. Chaitaca huairapish mana yaicunchu.

¹⁷ Sinchita llutarinacushcami, mana pascaipaj alli huatashcami.

¹⁸ Paipaj singahuan p'ucujpica, achij nicuj ninami llujshin. Paipaj ñahui luluncunaca pacarijpi inti llujshicuj shinami.

¹⁹ Paipaj shimimantaca lunyacuj ninami llujshin. Nina chispacunatami shitan.

²⁰ Paipaj singa t'utumantapish t'imbucuj mangamanta shinami cushni llujshicun.

²¹ Samaita cacharijpica, rupacuj carboncunami japirin. Paipaj shimimantaca lunyacuj ninami llujshin.

²² Paica cungapimi manchanayaj fuerzata charin. Paita ricushpallami, mancharishpa chahuata huañuncuna.

²³ Ñutu aichacunapish manchanayaj sinchimi. Mana cuyurinchu, casijllami tiyan.

²⁴ Paica, cutana mama rumi shina sinchi shungutami charin.

²⁵ Paitaca yallitaj jatun cashcamantami, c'ari c'ari tucushcacunapish manchancuna. Manchaihuan huañucushpatajca, chuya shungumi tucuncuna.

²⁶ Espadahuan cashpapish, lanzahuan cashpapish, puntajlla caspihuan cashpapish, fierro churanahuan cashpapish, paitaca pi manataj huañuchi tucungachu.

²⁷ Paipajca fierropish ujsha shinallami, broncepish ismushca caspi shinallami.

²⁸ Puntajlla caspicunapish paitaca mana manchachinchu. Huaracahuan rumita shitajpipish, ujsha shinallami paitaca japin.

²⁹ Tucui laya huañuchinacunaca, paipajca p'angallami. Paica espadacunata ch'ilin nichijta uyashpapish asinllami.

³⁰ Paipaj chaquicunaca puntasapa fierrocuna shinami. Chaihuanmi pambataca jutcushpa purin.

³¹ Jambicunata tandachishpa mangapi t'imbuchicuj shinami mama cucha yacutapish t'imbuchin.

³² Paica yacupi huambushpapish, yurajlla puscuta rurashpami purin.

³³ Cai pachapica paiman rijchajca pi mana tiyanchu. Paitaca imata mana manchaj animal cachun rurashcami.

³⁴ Paica paita yalli jatun ima tiyajpipish, mana manchanchu. Tucui jatun tucushcacunata jatun mandajmi nircami.