JOB 40 - Dios Rimashca Shimicunami

¹ Mandaj Diosca Jobtaca cashnapishmi nishpa rimarca:

² “¿Canca, alli yachaj cashpachu, Tucuita Rurai Tucuj Dioshuanca rimanacusha ningui imatagari? Maijanpish Dioshuan rimanacusha nishpaca, caicunataraj cutichichunlla” nircami.

³ Mandaj Dios shina nijpimi, Jobca cashna cutichirca:

⁴ “Mandaj Dioslla, ñucaca imapaj mana valij runamari cani. ¿Imatataj canmanca cutichichun ninguiyari? Ashtahuanpish ñucaca maquihuanmi shimita taparipani.

⁵ Ñucaca ñami cutin cutin rimarcani, cunanca ña mana ashtahuan rimasha ninichu” nircami.

Diosca tucuita rurai tucuj cashcata ricuchishcamanta

⁶ Mandaj Diosca jatun acapana chaupimantami, Jobtaca cashna nishpa rimarca:

⁷ Cunanca sinchita chumbillirishpa c'ari c'ari cangui. Ñuca tapushcacunatami cutichina cangui.

⁸ ¿Canpishchu ñuca mandashcataca, mana valichingui? ¿Canca ima juchachina illajllami cani nishpachu, ñucataraj juchachisha ningui imamí?

⁹ ¿Canca Dios shina sinchi rigrayujchu cangui imatagari? ¿Cambaj rimashcapish c'ulun nishpachu uyarin imatagari?

¹⁰ Cunanca jatun cashcahuan, alli cashcahuan sumajta allichiriyari. Sumaj cashcatapish, alli nishca canatapish churariyari.

¹¹ Manchanayajta p'iñarishpa rimariyari, jatun tucushcacunatapish tucuicunata tucuchiyari.

¹² Jatun tucushcacunatapish pingachiyari. Diosta mana manchajcunatapish, paicuna tiyacunllapitaj llaquichiyari.

¹³ Paicunataca tucuicunata allpahuan pambayari. Ñahuillapish ama ricuchun amsapi huichcayari.

¹⁴ Chashna rurajpica ñucapish canmanca, cambaj alli lado maquillahuantaj mishai tucushcata huillashami.

¹⁵ Huagra shina q'uihuata micuj behemot animaltaca canta shinallatajmi rurarcani.

¹⁶ Paica achca fuerzayuj sinchi huashatami charin. Huijsa aichapipish achca fuerzayujmi.

¹⁷ Paipaj chupatapish cedro caspita shinami cuyuchin. Changapi tiyaj angucunapish ahuashca shinami.

¹⁸ Paipaj tullucunaca bronce shina sinchimi. Paipaj dedocunapish fierro barra shinami.

¹⁹ Diosca paitaca tucui animalcunamanta puntapi cachunmi rurarca. Paita ruraj Diosca paitaca espadahuan tujsishpa huañuchi tucunmi.

²⁰ Paipajllami urcucunapica, q'uihuacunapish huiñan. Chaimantami tucui animalcuna chaipi micushpa purincuna.

²¹ Paica llandulla ucucunapimi siririn. Paica jucu allpa tiyan carrizocunapimi miticun.

²² Paitaca jatun yuracunami llandun. Yacu uripi tiyaj sauce yuracunapimi pillurin.

²³ Paica jatun yacu manchanayajta mirarijpipish, mana imata mancharinchu. Jordán yacu shina millpugrijpipish, mana mancharinchu.

²⁴ ¿Pai chaparacujpica pi japi tucungachu? Paipaj singatapish ¿pi jutcui tucungachu?