JOB 4 - Dios Rimashca Shimicunami

Elifaz runaca Jobta rimashcamanta

¹ Chaimantami Temán llajtamanta Elifazca cashna nishpa rimarca:

² Canca ñucanchij rimajpica, llaquiringuimi. Shina cajpipish, pitaj mana imata rimangari.

³ Riqui, canca achcacunata yachachijmari carcangui, irquicunatapish sinchiyachijmari carcangui.

⁴ Pandarijcunatapish cunashpa allichijmari carcangui. Cunguri mucucuna quihuiricujpipish, derechajmari carcangui.

⁵ Ashtahuanpish cunan canta jatun llaqui japijpica, yallitajmari llaquiringui. Chai jatun llaquicuna canta japijpica, yallitajmari musparingui.

⁶ ¿Manachu canca Taita Diosta manchanapi shunguta churaj carcangui? ¿Manachu ima pandata mana ruranapi shunguta churaj carcangui?

⁷ Cunanca alli yuyariyari, ima mana allita mana rurajcunaca, ¿maijan huañushcachu imatagari? Alli runacunaca maijan ¿chingarincunachu imatagari?

⁸ Ashtahuanpish millaita ruranata yapushpa, millaita ruranallatataj tarpushpaca, chaillatatajmi tandajta ricushcani.

⁹ Diospaj samaillahuanmi huañuncuna, pai p'iñarishpa p'ucujllapimi chingarincuna.

¹⁰ Huacaricuj leonpish, p'iña leonpish, huahua leoncunapish quirucunamari p'aquirishcacuna.

¹¹ Yuyaj leonca micuna aichata mana charishcamantami huañun. Micuna illajllapitajmi mama leonpaj churicunaca, caita chaita rincuna.

¹² Chaitaca ñucapish mana yacharcanichu. Shina cajpipish, ñuca rinrinllapimi huillahuarca.

¹³ Tuta muscui shina ricurishpami, tucui runacuna dormicujpi,

¹⁴ ñucataca manchachishpa chujchuchirca. Chaimantami ñuca tullucunapish tucui cuyurirca.

¹⁵ Ñuca ñaupajta huaira p'ucuj shinalla aya pasajpimi, ñuca aicha millmacunapish shayarirca.

¹⁶ Ñuca ricucunpimi ñuca ñaupajpi shuj aya shayarirca, ashtahuanpish paipaj ñahuitaca manamari rijsircanichu. Pai chaipi shayacushpaca, cashna nijtami upajlla uyarcani:

¹⁷ ¿Runaca Diostapish yalli cashcata rurajchu canga? ¿Runaca paita rurajtapish yalli ima mapa illajchu canga? nircami.

¹⁸ Riqui, paita servijcunapipish Diosca, paipaj shungutaca mana churanchu. Paipaj angelcunatapish pandarijlla cashcata yachanmi.

¹⁹ Allpa jahuallapi lodohuan shayachishca huasicunapi causajcunapicarin ¿maitataj shunguta churangari? Paicunaca allpalla cashcamantaca, polilla c'uru micushpa tucuchinallami.

²⁰ Paicunaca tutamanta alli cashpapish, chishipajca huañushpa, huiñaipaj chingarinllami. Ima tucushcatapish pi mana yachanchu.

²¹ Paicuna chingarijpica, paicuna sumaj cashcapish chingarinllami. Ima alli yachaitapish mana yachashpami huañuncuna.