JOB 39 - Dios Rimashca Shimicunami

¹ ¿Canca, sacha chivocuna mashna quillacunapi huachaj cashcataca yachanguichu? ¿Canca, tarugacuna huachacujta ricushcanguichu?

² ¿Canca, tarugacuna mashna quillata chichu purijtaca yupashcanguichu? ¿Ima quillapi huachana cashcatapish yachanguichu?

³ Paicunaca huachana nanai japijpica, siririshpami huachancuna. Huahuacuna llujshijpica nanaitapish ña mana charincunachu.

⁴ Paicunapaj huahuacunaca sinchiyashpami catincuna, q'uihuacunata micushpami alli huiñancuna. Paicunapaj mamacunata shitashpa rishpaca, ña mana cutinca tigramuncunachu.

⁵ ¿Pitaj, sacha burrotaca cacharishca purichun churashca canga? ¿Pitaj paitaca huascata mana churana animalta rurashca canga?

⁶ Ñucami paimanca pi mana causanapi causachun churarcani. Chaimantami paica shitashca pambacunapi causan.

⁷ Pueblopi causajcunataca mana rijsinchu. Shuj runa huashata catishpa caparishcatapish mana uyanchu.

⁸ Paica urcucunapimi pacalla micushpa causan. Verde q'uihuacunallatami micushpa purin.

⁹ ¿Búfalo huagraca canta servishpa causasha ninmanchu? ¿Cambaj huasipica causasha ningachu?

¹⁰ ¿Chai bufalotaca yugohuan huatashpa yapui tucunguichu? ¿Pugru pambacunapipish paihuanca yapui tucunguichu?

¹¹ Pai fuerzasapa cashcamantaca ¿paipi shunguta churanguillachu? ¿Yapunatapish paihuanca tucuchinguimanchu?

¹² ¿Cambaj granocunata tandachishpa, erapi parvangapajpish paimanca apachinguimanchu?

¹³ Pavo realmanpish ¿canchu sumaj color alascunata curcangui? Avestruzmanpish ¿canchu sumaj alascunata plumacunataca curcangui?

¹⁴ Paica t'iyu allpa jahuallapimi luluncunataca huachan, chaillapitajmi ugllan.

¹⁵ Paica huachashca luluncunataca chaquihuan sarushpa p'aquinatapish, sacha animalcuna sarushpa ñutunatapish mana yuyarinchu.

¹⁶ Mana pai huachashca cajpi shinami paipaj huahuacunata mana c'uyan. Chingarichunlla huachashca canataca, mana manchanchu.

¹⁷ Paicunamanca Taita Diosmari yachaj canataca mana curca. Alli yuyaiyuj canatapish mana curcachu.

¹⁸ Paica jahuata jatarishpaca caballotapish, caballo jahuapi tiyarishpa callpacujtapish mishashpami callpan.

¹⁹ ¿Canchu caballomanca fuerzataca curcangui? ¿Canchu paipaj cungapi tiyaj millmataca churarcangui?

²⁰ ¿Paitaca langosta c'uruta shinalla manchachinguimanchu? Paica singahuan p'ucushpallapish sinchitamari p'ucun.

²¹ Allpata aspirishpami, fuerzasapa cashcamanta yallitaj cushicun. Paica ima huañuchinahuan chapacujpipish tupagrinllami.

²² Manchachisha nijpipish, mana mancharinchu. Espadata ricuchijpipish, paipaj ñahuitaca mana huashaman churanchu.

²³ Huaquichinamanta llujshichishpa, fierro lanzata, jabalinata ch'ilin nichicujpipish,

²⁴ manchanayajta p'iñarishpami, allpata aspirin. Trompetapi tocajpipish, mana casijlla shayarinchu.

²⁵ Ashtahuanpish trompetacunahuan ch'imbapurami manchanayajta huacarin. Paica macanacuitapish carumantami mutquin. Soldadocunata pushajcuna caparirishcatapish, soldadocuna caparirishcatapishmi uyan.

²⁶ ¿Can yuyaita cujpichu, gavilanca jahuata jatarishpa alascunata uriman chutashpa callpan?

²⁷ ¿Canchu, angataca urcu jahuacunapi tazinta rurachun mandarcangui?

²⁸ Paica rumi c'aca quinricunapi, rumi urcu puntapimi causan.

²⁹ Chai jahuamantami, maipi aicha ricurijtapish chaparan. Carumantami paipaj ñahuihuan ricun.

³⁰ Paipaj huahua angacunaca yahuartami tsupancuna. Mama angaca maipi huañushcacuna siricunmanmi micunaman rin nircami.