JOB 38 - Dios Rimashca Shimicunami

Taita Diosca Jobtaca imata mana yachaj cashcata ricuchishcamanta

¹ Chaimantami Mandaj Diosca jatun acapana chaupimanta Jobtaca cashna nishpa rimarca:

² ¿Ñuca imalla ruranacunata pandachisha nishpa, yachai illaj shimicunata rimacuj runaca pitagari?

³ Cunanca, chumbillirishpa c'ari c'ari shayari. Ñucami cantaca tapugrini, ñuca tapushcacunatami cutichina cangui.

⁴ ¿Ñuca cai pachata ruracujpica, canca maipitaj carcangui? Can alli yuyaita charishpaca, chaita ñucaman huillahuai.

⁵ Cai pacha mashnata medina cashcataca ¿pitaj mandashca canga? ¿Pitaj paipaj jahuataca huascata chutashpa medishca canga? ¿Chaita yachanguichu?

⁶ ¿Cai pachapaj callari rumicunaca ima jahuapitaj tiyacunga? Callari esquina rumitaca ¿pitaj churashca canga?

⁷ Pacarij luzerocuna tucuicuna alabacujpi, Diospaj churicunapish tucuicuna cushicucujpica ¿maipitaj carcangui?

⁸ Mama cucha yacu pai tiyanamanta llujshishpa talliricujpipish ¿pitaj pungucunata churashpa huichcashca canga?

⁹ Ñucami yacutaca p'uyuhuan tapachircani. Paitaca amsahuanmi chumbillichircani.

¹⁰ Shinallataj maiman ama llujshichunmi mandarcani. Chaimantami aldabacunayuj pungucunatapish churarcani.

¹¹ Chaimantaca: Caicamallami chayana cangui, mana ashtahuan rinachu cangui, t'imburicuj jatun tucushca yacuca caillapimi pararinga nircanimi.

¹² ¿Can causacushca punllacunapica, shuj cutinllapish tutamantataca achijyachun nishpa mandarcanguichu? ¿Mai ladota pacarinataca, canchu ricuchircangui?

¹³ ¿Canchu achijtaca tucui allpata achijyachishpa, Diosta mana manchajcunata maita cachachun churarcangui?

¹⁴ Sellohuan churashpa rurashca manga sumaj ricurij shinami tucun. Sumajta churarishca shinapishmi ricurin.

¹⁵ Ashtahuanpish Diosta mana manchajcunapaj luztaca anchuchinllami. Jatun tucushcacunapaj rigracunatapish p'aquinllami.

¹⁶ ¿Canca, mama cucha yacu llujshicunman yaicushcanguichu? ¿Chai tucui amsa ucuta ricushpa purishcanguichu?

¹⁷ ¿Huañushcacuna tiyana pungucuna maipi cashcataca ricushcanguichu? ¿Huañuna amsa ucuman chayachij pungutapish ricushcanguichu?

¹⁸ ¿Maicama allpa cashcatapish yachanguichu? Cai tucuita can yachashpaca, ñucaman huillahuai.

¹⁹ ¿Achij tiyacunman maita rina cashcataca yachanguichu? ¿Maipitaj amsapish tiyacun?

²⁰ ¿Paicunataca maipi tiyana cashcaman pushai tucunguimanchu? Paicunapaj huasiman rina ñanta ricuchinguimanchu.

²¹ ¡Canca chai tucuitachu yachangui! Shinashpaca chaipajca ñatajchari huacharircanguiyari. Ñatajchari uni huatacunata causarcanguiyari.

²² ¿Canca rasu maipi tiyajta ricunaman yaicushcanguichu? ¿Mana cashpaca, rundu ima shina tiyajta ricushcanguichu?

²³ Ñucaca llaqui punllacunapajmi chaicunataca huaquichishpa charini. Ñucaca jatun macanacui, huañunacui punllapajmi huaquichishpa charini.

²⁴ ¿Achijca maijan ñantataj chaupishpa rinri? Shitashca pambamanta shamuj huairapish ¿maijan ñanta shamushpataj tucui allpa jahuapi siririn?

²⁵ ¿Pitaj tamyamanca ñanta curca? Relampacuna c'ulun nishpa purichunpish ¿pitaj ñanta curca?

²⁶ ¿Maijantaj pipish mana causan shitashca allpapi tamyachishpa,

²⁷ yacunaihuan huañucuj allpaman yacuta cushpa, imatapish mana tarpuipaj shitashca allpapi llullu q'uihuacunataca huiñachishca canga?

²⁸ ¿Tamyaca yayata charinchu? ¿Garhuataca pitaj huachashca canga?

²⁹ ¿Rasuca pipaj huijsamantataj llujshishca canga? Jahua pachamanta urmaj casataca ¿pitaj huachashca canga?

³⁰ Yacucunallatajmari sinchiyashpaca, rumitajlla tucun. Chaimantami cai pachapi tiyaj yacucunaca, rasu tucunlla.

³¹ ¿Canca Pléyades luzeropaj huascacunataca, huatai tucunguichu? Mana cashpaca ¿Orión luzeropaj huascacunata pascai tucunguichu?

³² ¿Canca jahua pachapi tiyaj luzerocunataca, paicuna ricurina punllacunapi llujshichi tucunguichu, mana cashpaca Osa Mayor luzerotapish paipaj huahua luzerocunandij pushai tucunguichu?

³³ ¿Canca jahua pacha ima shina canata mandashcataca yachanguichu? ¿Canca cai pachapica, pai imalla rurashcacunataca rurai tucunguichu?

³⁴ ¿Manchanayaj yacucuna canta tapachun nishpachu p'uyucunataca, tamyata cachai nishpa capariringui?

³⁵ ¿Canchu, relampacunataca maimanpish richun cachangui? ¿Cantachu chai relampacunaca: Caipimi canchij ningacuna?

³⁶ ¿Shungupica pitaj yachaita churarca? ¿Pitaj alli yuyaitaca curca?

³⁷ Jahua pachapi tiyaj p'uyucunataca ¿maijan alli yuyaiyujtaj yupashpa churashca canga? Chai p'uyucunamantaca ¿pitaj

³⁸ allpacuna rumiyajpipish, samashca allpacuna sinchiyajpipish, nuyuchingapaj tamyataca cachan?

³⁹ ¿Leonpajmanca canchu aichataca japishpa apamungui? Huahua leoncuna yaricaihuan huañucujpipish,

⁴⁰ ¿canchu paicuna causacun jutcucunaman aichata apashpa sajsajta carangui? Paicuna aichata micungapaj paca tucushpa chapacujpipish ¿canchu carangui?

⁴¹ Cuervocuna caita chaita micunata mashcashpa puricujpipish, paicunapaj huahuacuna yaricaihuan cashpa Taita Diosta caparijpipish ¿pitaj paicunaman caran?