JOB 37 - Dios Rimashca Shimicunami

¹ Chaimantami ñuca shunguca, ñalla llujshicuj shina jahuata saltaricun.

² Pai rimarijpi c'ulun nishcata alli uyaichigari. Paipaj shimimanta llujshicuj c'ulun nishcatapish uyaichigari.

³ Chai c'ulun nishcataca, jahua pacha ucunijtami cachan. Relampacunatapish tucui cai pachatami cacharin.

⁴ Chai relampacunata cachashca q'uipapish, c'ulun nishcaca uyarinrajmi. Paipaj sinchi rimashcapish, c'ulun nishpami uyarin. Pai rimashcata ñucanchij uyajpipish, paica mana upallanchu.

⁵ Taita Diosca pai rimashcahuanmi, mancharinata c'ulun nichin. Paica ñucanchij mana yuyaita japipaj mancharinacunatami ruran.

⁶ Paica: Rasutapish, garhuatapish, manchanayaj tamyatapish, allpaman uriyai nishpa uriyachinllami.

⁷ Chashnami runacunataca tucuicunata, paicuna imalla ruracushcataca saquichin. Pai tucuita rurai tucuj cashcata tucuicunallataj yachaj chayachunmi chashna ruran.

⁸ Tamyacujpica animalcunapish, paicuna causana jutcucunaman yaicushpami, chaipi tiyancuna.

⁹ Ura ladomantaca jatun acapanami shamun, janaj ladomantaca chiri huairami shamun.

¹⁰ Taita Dios p'ucujpimi rasupish tucun. Chaimantami jatun yacucunapish rumi shina sinchiyan.

¹¹ P'uyuta yacuyachishpami allpapi yacuta regan. Paipaj luzhuanmi p'uyutapish anchuchin.

¹² Cutinllataj pai mandajpimi, cai pachapi pai mandashca shina rurangapaj p'uyucunaca tucui muyundijta purin.

¹³ Taita Diosca chai tucuitaca huaquinpica llaquichingapaj, huaquinpica pai rurashca allpata c'uyashcamanta, huaquinpica llaquishcata ricuchingapajmi cachan.

¹⁴ Job runalla, caita alli uyai. Taita Dios cashna mancharinacunata rurashcataca alli yuyari.

¹⁵ ¿Taita Dios ima shina cai tucuita tandachij cashcatapish, jahua p'uyupi ima shina achij nichij cashcatapish yachanguichu?

¹⁶ ¿Canca shujtaj shujtaj p'uyucuna tiyashcatapish, alli yachaita charij cai tucui sumajcunata ima shina rurashcatapish yachanguichu?

¹⁷ Ura ladomanta rupaj huaira shamushpa, allpata rupajyachijllapipish, cambaj churanahuanca t'itachinguimari.

¹⁸ ¿Yacuyachishpa mana p'aquirij espejota ruraj shinachu canca Diostaca jahua pachata rurashpa ayudarcangui?

¹⁹ Paita imata nina cashcata ñucanchijman yachachihuai. Ñucanchijca amsapi cashcamantaca, ima alli yuyaita mana charinchijchu.

²⁰ ¿Ñuca rimashpa huillanaca allichu canga? Runaca mashnata yuyacushpapish, amsa yuyaicunallahuantajmi saquiringa.

²¹ Ashtahuanpish cunanca jahua pachapi tiyacuj achij nicujtaca, mana ricui tucuipajchu. Huaira shamushpa p'uyucunata p'ichajpimi, ricunalla canga.

²² Janaj ladomantami quillujllata achij ninga. Mandaj Diosca mana entendipaj jatun Diosmari.

²³ Tucuita Rurai Tucuj Diosca, yallitaj jatun poderyujmi. Paitaca mana pajtai tucunchijchu. Paica jatunta llaquichi tucushpapish, mana llaquichingachu.

²⁴ Chai tucuita ricushpami, tucuicuna mancharingacuna. Quiquin shungullapi alli yachaj tucushcacunataca, mana c'uyanchu nircami.