JOB 36 - Dios Rimashca Shimicunami

Taita Dios jatun cashcataca Eliú huillashcamanta

¹ Eliuca cashnapishmi rimarca:

² Ashallata shuyai, canta yachachishami. Ñucaca, Taita Dios ima shina cashcata ricuchishpa rimana yuyaicunataca charinirajmi.

³ Ñucata Ruraj Diosca, cashcata ruraj cashcataca, saruncunamanpish ima shina caj cashcata yuyarishpami, canmanca huillasha nini.

⁴ Chaimanta ñuca huillashca shimicunaca mana llullachu. Ima panda yuyaita mana yachachijca, canhuanmari cani.

⁵ Riqui, Taita Diosca jatun Diosmari, shina cashpapish pita mana p'iñajchu. Paica tucuita rurai tucungapaj yachaitamari charin.

⁶ Paita mana manchajcunamanca causaita mana cungachu, ashtahuanpish llaquita apacujcunamanrajmi, paicuna japina cashcataca cunga.

⁷ Paipaj ñahuicunataca cashcata rurajcunamantaca manataj anchuchingachu. Ashtahuanpish jatun mandajcunahuanmi jatun tiyarinapi tiyachishpa huiñaipaj jatunyachishca cangacuna.

⁸ Paicunata cadenacunahuan huatashpa charicujpipish, llaquichina huascacunahuan huatashpa charicujpipish,

⁹ Taita Diosmi paicuna imalla rurashcataca ricunga. Paicuna yallitaj mana cazujcuna cashcatami ricuchinga.

¹⁰ Shinallataj paicunataca rinrinllapi rimashpami: Millaita ruranata saquishpa, ñucapajman tigrarichij nishpa jarcan.

¹¹ Chashna nishcata uyashpa, paita servishpaca huañungacamami cushicushpa alli causangacuna.

¹² Ashtahuanpish mana uyashpaca, espadahuan huañuchishcami cangacuna. Alli yachaitaca mana yachashpami chingaringacuna.

¹³ Mishqui shimi jayaj shungucunaca, paicunapaj shungu ucullapimi p'iñarishpa huañurincuna. Paicunata Taita Dios huajtajpica, mana caparishpa paita mañangacunachu.

¹⁴ Paicunaca chairaj cashpami huañungacuna, paicunaca c'aripura siririjcuna tucushpami causangacuna.

¹⁵ Huajcha runataca huajcha canamanta llujshichingami. Llaquihuan capariricujpipish, paica uyangami.

¹⁶ Chashnallatajmi cantapish llaquiman rinamantaca quishpichinga. Ima llaquipish mana japina alli llajtapimi causachun churanga. Chaipimi cambajca meza junda mishqui micunatapish allichinga.

¹⁷ Ashtahuanpish canca allita ruranapaj randi, cashcata ruranapaj randica cambaj yuyaipica Diosta mana manchajcunapaj yuyaillatami jundachishcangui.

¹⁸ Shina cashcamantaca manchayari, ñataj p'iñarishpa huajtashpa canta apanman. Chai llaquimantaca imahuan manataj quishpiri tucunguichu.

¹⁹ ¿Taita Diosca curimanta rurashcacunata charijllapichu, mana cashpaca sinchi fuerzata charijllapichu cantaca mana llaquinga yuyangui?

²⁰ Ama tutayachun shuyacuichu. Tutayajpica, gentecunaca paicuna maipi tiyacushcamanta chingaringallami.

²¹ Millaita ruranamanca ama tigraichu, ashtahuanpish cuidariyari. Dios huanachichun saquinapaj randica, mana allitami agllarcangui.

²² Taita Diosca tucuita rurai tucuj Diosmari. ¿Pitaj pai shina yachachijca tiyangari?

²³ ¿Pai imalla rurashcacunataca pitaj ñaupaman yachachishca cangari? ¿Pitaj paitaca: Canca mana allitami rurashcangui ningari?

²⁴ Tucuicunami pai imalla rurashcacunataca ricuncuna. Canpish paita jatunyachinata yuyariyari.

²⁵ Pai imalla rurashcacunataca, runacunaca tucuitami carullamanta ricuncuna.

²⁶ Riquichij, Taita Diosca jatunmari, chaitaca ñucanchijca manamari yachanchijchu. Pai causashca huatacunatapish manamari yupai tucunchijchu.

²⁷ Paimi yacucuna f'uyul nishpa llujshijpipish, tamyata rurangapaj shujllapi tandachin.

²⁸ Chaimantami p'uyucunaca yacuyashpa runacunapaj jahuapi achcata shutun.

²⁹ ¿Pitaj p'uyu maipi tucurishcatapish yachangari? Pai maipi c'ulun nishpa tiyacushcatapish ¿pitaj yachangari?

³⁰ Riquichij, achijyachijtaca paipaj jahuapimari churarca. Chai achijyachijllahuantajmi mama cuchatapish c'atachirca.

³¹ Chaicunallahuantajmi runacunata llaquichin. Chaicunallahuantajmi cai tucui runacunaman micunatapish caran.

³² Achijtaca ama achijyachichun nishpami p'uyuhuan tapachin.

³³ Pai p'iñarishcataca, c'ulun nishcami huillan. Jatun acapanapish, millaita rurajcunata p'iñarishpa llaquichinatami huillan.