JOB 35 - Dios Rimashca Shimicunami

¹ Eliú runaca ashtahuan yuyaita japishpami cashna rimashpa catirca:

² “Canca: Ñucaca Taita Diostapish yalli cashcata rurajmi cani nishpaca, allitami nin ¿yuyanguichu imatagari?

³ Canca: ¿Paimantaca ima allita japishachu imatagari. Mana cashpaca juchata mana rurashcallamantachu, ima allita japisha imatagari? nishpami yuyangui.

⁴ Chaimantami canmanpish, canhuan tiyacuj cambaj rijsishcacunamanpish, ñuca ima yuyashcata huillasha nini.

⁵ Jahua pachata huichilla ricuyari. Chaipi tiyacuj p'uyucunaca, cantapish yalli jahuamanmari tiyacun.

⁶ Canca juchata rurashpaca, Diostaca ¿imatataj ruranguiyari? Paita yallitaj c'ariyashpapish, paitaca imata mana rurai tucunguichu.

⁷ Cashcata ruraj cashpapish ¿imatataj paimanca cunguiyari? ¿Mana cashpaca imatataj cambaj maquimantaca japinga?

⁸ Cambaj juchacunaca can shinallataj runatami llaquichinga. Cashcata can rurashcapish, huañujlla aichayuj runapajllatajmi alli canga.

⁹ Runacunallataj manchanayajta llaquichijpimi caparirincuna. Jatuncuna tucui laya llaquichijpimi, caparirishpa huacacuncuna.

¹⁰ Llaquita apacujcunaca, shujllapish mana cashna ninchu: ¿Ñucata Ruraj Diosca maipitagari? Paica tutacunapish cantachun cushicuita cujmari.

¹¹ Paica ñucanchijtaca cai pachapi tiyaj animalcunamantapish yalli yachajtamari rurarca. Pajarocunatapish yalli yachajcunatamari rurarca mana nincunachu.

¹² Paicunallataj jatun tucushpa millaita rurashcamantami, paicuna caparicujpipish Diosca manataj uyanga.

¹³ Yanga shimicunallataca, Diosca manataj uyangachu. Tucuita Rurai Tucuj Diosca mana ricungallapishchu.

¹⁴ Can paita mana cazunichu nijpicarin ¿maitataj llaquingari? Can imalla rurashcacunaca paipaj ñaupajpimari tiyacun, paita shuyayari.

¹⁵ Ashtahuanpish cunanca Diosca, manaraj p'iñarishpa llaquichinchu. Manaraj sinchi sinchita japishpa huanachinchu.

¹⁶ Chaillamantami Jobca yangamanta shimita pascashpa rimaricunlla. Ima yuyaita mana cuj shimicunallatami manchanayajta rimaricun” nircami.