JOB 34 - Dios Rimashca Shimicunami

Eliuca Dios ima shina cashcata ricuchishcamanta

¹ Eliuca cashnapishmi nirca:

² “Alli yachajcuna, alli yuyaita charijcuna, ñuca rimashca shimicunata alli uyahuaichij.

³ Shimihuan mishquichishpa micunata micuj shinami, rinrinpish maijan rimashcataca uyanachin.

⁴ Ñucanchij imallata rurana cashcata mashcashunchij. Ñucanchijpura ima alli cashcata rijsishunchij.

⁵ Jobca cashnami nirca: Ñucaca cashcata rurajmi cani. Shina cajpipish Diosca, ñuca japina cashcatami quichurca.

⁶ ¿Ñuca yuyashca shina mana huillashpa llullashachu imatagari? Manapish ima juchata rurashca jahuami achcata nanachij chugrihuan cani nircami.

⁷ ¿Maijan runataj Job shinaca tiyangari? Paica yacuta ubyaj shinami chanzata rurashpa asin.

⁸ Paica millaita rurajcunahuanmi tandanacushpa rirca, millai runacunahuanmi purirca.

⁹ Chashna cashpami, paica cashna nishpa rimarca: Runaca Taita Diospaj munaita rurashcamantaca, ima allita mana japinchu nircami.

¹⁰ Chaimanta alli yuyaita charijcuna caita alli uyaichij: Mana allita ruranaca Diosmantaca carupimi cachun nini. Millaita ruranapish, Tucuita Rurai Tucuj Diosmantaca carupimi cachun nini.

¹¹ Paica runamanca pai imallata rurashcamantaca, chashnallatajmi cunga. Pai ima shinami causarca, chai shinallatajmi cunga.

¹² Taita Diosca mana yangamanta juchachingallachu. Tucuita Rurai Tucuj Diosca, mana ima japina cashcatapish quichungallachu.

¹³ ¿Pitaj cai pachataca paipaj randi ricuj shamushca canga? ¿Pitaj cai pachapi imalla tiyajcunataca maillapi tiyanata sumajta churashca canga?

¹⁴ Runapi causaita cuj samaita pai churashcataca, paillataj chai causaita cuj samaita quichujpica,

¹⁵ tucuicunami huañunman, runaca allpallatajmi tucunman.

¹⁶ Can alli yuyaiyuj cashpaca caita alli uyai, ñuca rimashcapi yuyaita churayari.

¹⁷ Cashcata ruranata p'iñaj runaca ¿mandai tucungachu imashi? ¿Cashcata ruraj runataca llaquipi churanguimanchu?

¹⁸ ¿Jatun mandajtaca: Millaita ruraj nipajchu? ¿Pai churashca mandajcunatapish: Diosta mana manchajcuna nipajchu?

¹⁹ ¿Pitapish mana ñahuita ricushpalla alli nijtacarin imatataj ninguiyari? Mana ashtahuan allicuna cashcata yuyanchu. Mana, charij runallata ashtahuan c'uyanchu. Ashtahuanpish mana charijtapish c'uyanmi. Tucuicuna paipaj maquihuan rurashcacunami.

²⁰ Runacunaca ñapish huañungallami. Chaupi tutahuan capariricushpa chingaringallami. Tucuita rurai tucuj Diosca maquihuan mana huajtashpallataj chingachingallami.

²¹ Paipaj ñahuicunaca runa maita purishcatami chaparacun. Chaqui sarushcatapish tucuitami ricuracun.

²² Millaita rurajcuna miticurinapajca, manchanana amsapish, huañuna amsapish mana tiyanchu.

²³ Diosca runataca mana rurai tucuipajtaca, mana mandanchu. Diostaca imamanta mana juchachinachu.

²⁴ Paica c'ari c'ari tucushcacunatapish mana llaquishpa jatunta llaquichingallami. Paicunapaj randica, shujtajcunatapish churangallami.

²⁵ Taita Diosca millaita rurajcunaman, paicuna imalla rurashcacunata ricuchishpaca, shuj tutallami tucuicunata jatunta llaquichinga.

²⁶ Paica tucuicuna ricunallapimi millai runacunata shina chugrichinga.

²⁷ Paicunaca Diosmanta caruyashpami, pai imata rurachun nishcatapish mana yuyarircacuna.

²⁸ Huajchacunatapish, imata mana charijcunatapish jatunta llaquichishpami, Diospaj ñaupajpi uyarijta caparichircacuna.

²⁹ Taita Dios samachijpica ¿pitaj p'iñachi tucungari? Paipaj ñahuita pacajpica ¿pitaj catishpa ricui tucungari? Paica jatun llajtahuan cashpapish, shuj runallahuan cashpapish chai shinallatajmi.

³⁰ Millaita ruraj runataca, pueblopi causajcunata ama pandachishpa causachunmi, mandaj cachunpish mana churan.

³¹ Cunantajca Taita Diostaca, cashnami nina cangui: Ñami cai tucui llaquitaca apashcani. Cunanca cantaca ña mana ashtahuan p'iñachisha ninichu.

³² Taita Dioslla, ñuca mana ricushcacunata yachachihuai. Ñaupaman mana allicunata rurashcataca, ña mana ashtahuan rurashachu ninami cangui.

³³ ¿Taita Diosca can imalla rurashcamantaca, can munashca shinachu cunga? Paimi can japina cashcataca cunga. Canca mañashpapish mana japinguichu, mañashpapish mana chasquinguichu. Mana cashpaca can yachashcata ñucaman huillai.

³⁴ Alli yuyaiyuj runacunapish, ñucata uyacuj yachaisapa runapish cashnami ningacuna:

³⁵ Jobca manamari alli yachaita charishcamanta rimanchu. Pai rimashca shimicunaca manamari ima yuyaita cunchu ningacunami.

³⁶ Ñucaca Job imalla yuyashcataca, alli ricushca canman yuyanimi. Pai rimashcacunaca chai millai runacuna rimashca shimicuna shinami.

³⁷ Paica juchata rurashca jahuami mana cazurca. Ñucanchijtapish p'iñashpami, maquicunahuan huajtarinlla. Taita Diostapish c'ariyashpa, millai shimicunata mirachishpa rimanllamari” nircami.