JOB 32 - Dios Rimashca Shimicunami

Eliuca Job imalla rimashcata cutichishcamanta

¹ Chai quimsa runacunaca Job rimashcataca mana cutichi tucurcacunachu. Paicunapaj quiquin yuyaipica, Jobca cashcata rurajmi nirircami.

² Chaimantami Rampaj familiapura Buz llajtamanta Baraquel runapaj churi Eliuca Jobhuanca manchanayajta p'iñarirca. Diostapish yalli cashcata ruraj cashca shina ricurijpimi, Jobhuanca yallitaj p'iñarirca.

³ Jobta juchachishpapish imata mana cutichi tucujpimi, paihuan apanacuj quimsa runacunahuanpish yallitaj p'iñarirca.

⁴ Eliuca chairaj cashcamantami, caishuj yuyajcuna Jobhuan parlanacungacama shuyacurca.

⁵ Shina cashpapish chai quimsa runacuna Jobman imata mana cutichi tucujta ricushpami, Eliuca paicunahuanca yallitaj p'iñarirca.

⁶ Chaimantami Buz llajtamanta Baraquel runapaj churi Eliuca cashna nishpa rimarca: Ñuca chairaj cashcamantami, can yuyajcunaraj imatapish rimachun nishpa cancunata manchashpa, ñuca imalla yuyashcacunataca manaraj imata huillarcani.

⁷ Ñucaca: Achca punllacunata causajcunaraj rimachun, uni huatayujcunamari alli yachaitaca huillachun yuyarcanimari.

⁸ Runaca yuyaitaca charinmi. Paimanca Tucuita Rurai Tucuj Diospaj Espiritumi alli yuyaicunata cun.

⁹ Mana uni huatacunata causaj yuyajcuna cashcallamanta alli yachajcuna cashcachu. Cunaj yuyajcunapish allitajca mana entendincunachu.

¹⁰ Chaimantami cancunataca: Uyahuaichij, ñucapish ñuca yachashcata huillasha nini nircani.

¹¹ Riquichij, ñucaca cancunapaj yuyaitami shuyarcani. Cancuna yuyarishpa, yuyarishpa imallata nijtaca uyacurcanillami.

¹² Cancunataca yuyaipimari uyaracurcani. Ashtahuanpish cancunaca maijanpish manamari Jobtaca rimai tucushcanguichijchu. Pai imata nijpipish, manamari imata cutichi tucunguichijchu.

¹³ Ama cancunallatajca alli yachaitami charinchij nirichijchu. Runaca mana mishai tucunchu, Taita Diosllami mishanga.

¹⁴ Jobca ñucataca mana imata rimarcachu, ñucapish paitaca mana cancuna yuyashca shina rimashachu.

¹⁵ Cancunaca mancharishpami, mana imata cutichi tucurcanguichij. Cancunamantaca yuyaicunaca chingarircami.

¹⁶ Ñucaca cancuna imallatapish rimangapishchari nishpamari shuyacurcani. Ashtahuanpish upalla tucushpamari, mana imata ashtahuan rimarcanguichij.

¹⁷ Chaimantami ñucapish imalla yachashcata, ima shinalla yuyashcata huillasha nini.

¹⁸ Ñucaca rimangapajpish, achca shimicunatami charini, achca yuyaicunami tiyacun.

¹⁹ Ñuca shungupi tiyacuj yuyaicunaca, cunanlla rurashca vinota mushuj capachucunapi churajpi t'imbushpa samai mana llujshipaj cajpi, chai capachucuna tugyanachicuj shinami.

²⁰ Imallatapish rimashpataj alli casha ninica. Ñuca shimita pascashpa imallatapish cutichishataj ninica.

²¹ Cunanca maijantapish mana alli ninichu, maijantapish allimi cangui nishpa mana cushichi tucunichu.

²² Ñucaca mana allimi cangui nij tucunata yachanichu. Chashna nishpa rimajpica, ñucata Ruraj Diosca utcami chingachinman.