JOB 31 - Dios Rimashca Shimicunami

Jobca paipaj yuyaipi ima shina cashcata huillashcamanta

¹ Ñuca ñahuicunahuanca ima mana allita ama ricungapajmi, ari ninacurcanchij. Shina cajpica c'arita mana rijsij huarmitaca, mana ricunachu cani.

² Ñuca chaita ricujpica, Taita Diosca jahua pachamanta ¿imata cungachu? ¿Tucuita Rurai Tucuj Diosca, jahua pachamantaca ima japinata cungachu?

³ ¿Diosta mana manchajpajca, llaquica manachu tiyanga? ¿Juchata rurajcunapajca llaquicunaca manachu tiyanga?

⁴ Taita Diosca ñuca imalla rurashcacunatapish ricucunmi. Ñuca chaqui sarushcacunatapish yupacunmi.

⁵ Llullashpa purishca cajpica, mana allita ruranaman ñuca chaquicunahuan utca rishca cajpica,

⁶ cashcata pizaj balanzapi pizahuachunlla. Chashnami ñucapica, ima pandata mana ricunga.

⁷ Alli ñanmanta ñuca chaquicuna caruyashpa rishca cajpica, ñuca ñahuicuna ricushcata shungu yuyashca cajpica, ñuca maquicunahuan ima mana allita rurashca cajpica,

⁸ ñuca tarpushcacunataca shujtajcuna micuchunlla. Ñuca tarpushcacunataca p'itishpa shitachunlla.

⁹ Shujtaj huarmita ricushpa, ñuca shungupi munashca cajpica, shujtajpaj huarmita umangapaj pungupi chapaj cashca cajpica,

¹⁰ ñuca huarmica shujtajpajta cutashpa causachunlla. Paihuan shujtaj c'aricuna siririchunlla.

¹¹ Millaita, juchata ñuca rurashca cashpaca, juezcuna llaquichishcami caiman carcani.

¹² Chai juchaca, Abadonpipish rupachij ninami canman carca. Chaillatajmi ñuca imalla charishcacunatapish tucuita rupachinman carca.

¹³ Ñucata servij runatapish, huarmitapish p'iñarishpa rimashpa, paicuna japina cashcata mana cushca cashpaca,

¹⁴ Taita Dios ricungapaj shayarijpica, ¿imatashi ruraiman carcani? Pai imata tapujpipish ¿imatashi cutichiman?

¹⁵ Ñucata mamapaj huijsapi churaj Diosca, ¿manachu caishujtapish rurarca? Tucuicunallatatajmari shuj Diosllataj rurarca.

¹⁶ Huajchacuna mañagrijpipish mana cushca cajpica, viuda huarmicunata yaricaihuan huañuchun saquishca cajpica,

¹⁷ yaya mama illaj huahuaman mana carashpa, micunata ñucalla micushca cajpica llaquichichunlla.

¹⁸ Ñuca chairaj cashcamantapachami, yayapi shina catirishpa causarca. Ñucaca ñuca mamapaj huijsapi tiyarishcapachamantami, viuda huarmicunata cuidaj cangapaj tiyacurcani.

¹⁹ Ñuca ricucushca jahua maijanta churana illajlla huañuchun saquishca cajpica, imata mana charijtapish, c'atarina illaj purichun saquishcalla cajpica, llaquichichunlla.

²⁰ Paicunapaj aichata imahuan mana tapari tucucujpipish, ñuca ovejacunapaj yura millmahuanmi cunujyachircani. Chaimantami shunguhuantaj ñucataca alli nircacuna.

²¹ Yaya mama illaj huahuatapish mana ñuca maquita alzashpa llaquichishcanichu. Tandanacuna pungupi ñucata ayudajcuna tiyashcallamanta chashna rurashca cajpica,

²² ñuca huashaca tullucunamanta urmachunlla. Ñuca rigra tullupish p'aquirichunlla.

²³ Ñucaca, Taita Dios llaquichinatami mancharcani. Jatun Dioshuanca mana ch'imbapurai tucuimanchu carcani.

²⁴ Curipi ñuca shunguta churashca cashpaca: Canpimi ñuca shunguta churani nimanmi carcani.

²⁵ Ñuca charinacunata yallitaj mirachishcallamanta, ñuca maqui jundata charicushcallamantaca mana cushicurcanichu.

²⁶ Inti achijlla llujshijpipish, mana chaita chapashcanichu. Luna sumajta achij nicujtapish, mana chaipi ñahuita churarcanichu.

²⁷ Chaicunataca ñuca shungullapipish, mana adorarcanichu. Ñuca maquillatatajpish, mana mucharcanichu.

²⁸ Chashna rurashca cashpaca, llaquichishca cana mana allitami ruraiman carcani. Jatun Diostamari cungariman carcani.

²⁹ Ñucata p'iñaj llaqui tucujpipish, mana cushicurcanichu. Paita llaqui japijpica, mana asircanichu.

³⁰ (Ñuca c'alluhuanca ima mapata mana rimarcanichu). Paita llaqui japichunpish mana mañarcanichu.

³¹ Ñucata servijcunapuraca: ¿Maijantaj aichataca manaraj amijta micunguichij? nishpaca, mana nircacunachu.

³² (Carumanta shamujtapish mana canllapi pacarichircanichu. Carumanta shamujcuna yaicuchunca ñuca huasi pungucunata pascarcanillami).

³³ Ima millaitaca pacallapish mana rurashcanichu. Mana ima mana allita rurashpa upalla saquirishcanichu.

³⁴ Mana achca gentecunata manchashcamanta, ñuca familiacuna p'iñanata manchashcamanta, ñuca huasi ucupi upajlla saquirishcanichu.

³⁵ Ñucamanta huillashcataca, ¿pitaj uyashun ninguichij? Ñucata p'iñaj runa ñucata llullasha nijpipish, Tucuita Rurai Tucuj Diosmari ñucamantaca huillanga. Paipimi ñuca shunguta churani.

³⁶ Chaitaca ñuca rigra jahuapimi aparishpa puriman, coronata shinami umapica churariman.

³⁷ Ñuca imalla rurashcacunataca tucuitami Diosman huillaiman. Mandaj shinami paipaj ñaupajpi shayariman.

³⁸ Ñuca llaquichishcata ñuca allpacuna huillajpica, yapushca pambacunapish huacajpica,

³⁹ imalla p'ucushcata mana randishpa micushca cajpica, mana cashpaca maijan granoyujcunapajta shuhuashca cajpica,

⁴⁰ trigo huiñanapaj randica, mapa q'uihuacunaraj huiñachunlla. Cebadapaj randica cashacunaraj huiñachunlla nircami. Job rimashca shimicunaca caillapimi tucurin.