JOB 3 - Dios Rimashca Shimicunami

Jobca pai huacharishca punllata mana alli nishcamanta

¹ Chai q'uipami Jobca, pai huacharishca punllataca mana alli nishpa rimarca.

² Jobca cashna nishpami, sinchita rimarirca:

³ “Ñuca huacharishca punllaca chingarishpachari, c'ari huahuatami huachanga nishpa huillashca tutaca mana tiyajpichari.

⁴ Chai punllaca amsayajpichari, Taita Diospish jahuamanta mana pacarichijpichari. Achijyachijpish mana achijyachijpichari.

⁵ Huañuna amsa tucushpa, mana alli punlla cajpichari. Llandulla punllapi shina yana p'uyu tapashpa, manchanana amsata rurajpichari.

⁶ Chai tutataca amsa charirayajpichari. Chai punllaca huatapaj punllacunapica, ña ama tiyashca canman. Quillacunapipish chai punllaca, ña ama tigrashca canman.

⁷ Chai tutapi mana chichushca cajpica, huahuayuj tucushcamanta cushicunapish mana tiyanmanchu carca.

⁸ Chai punllataca punllata p'iñajcuna, Leviatán nishca manchanana animalta jahualla rijchachijcuna, mana alli nijpichari.

⁹ Pacarij luzerocunapish amsayashca cachun, achijyachijta shuyacujpipish, amataj achijyashca cachun. Pacarishpa achijyachishcallapish amataj ricurishca cachun.

¹⁰ Chai punllapi mana huacharishca cashpaca, cai tucui llaquicunataca mana ricuimanchu carcani.

¹¹ Ñucaca ¿ima nishpataj mana huijsa ucullapitaj huañurcaniyari? ¿Ima nishpataj huacharihuan mana huañurcaniyari?

¹² ¿Ñucataca imapajtaj changa jahuapi marcarcacunari? ¿Imapajtaj chuchuchihuarcari?

¹³ Huañushca cashpaca, samaricuimanmi carcani. Dormishca cashpaca, manachari cai llaquitaca ricuiman carcani.

¹⁴ Cai pachata jatun mandajcunahuan, cunajcunahuanchari samaricuiman carcani. Paicunaca urmashca huasicunatami paicunapaj allichijcuna carca.

¹⁵ Mana cashpaca curita charij mandajcunahuan, cullquita huasipi jundachijcunahuanchari samaricuiman carcani.

¹⁶ ¿Ima nishpataj shullushca huahuata shina, achij punllata mana ricushpa huañuj huahuitocunata shina mana pacarcacunari?

¹⁷ Huañushpami Diosta mana manchajcunapish shujtajcunata llaquichinata saquirincuna. Chaipimari shaicuihuan huañucujcunapish samarincuna.

¹⁸ Chaipimari prezucunapish samarincuna. Chaipi cashpaca, p'iña mandaj caparishcatapish mana uyancunachu.

¹⁹ Uchillapish, jatunpish chaillapitajmi. Servijpish chaipica, amopaj maquimanta cacharishcami.

²⁰ Llaquihuan huañucujmanca ¿imapajtaj achij punllataca ricuchircari? Shungu p'aquirishcacunamanca ¿imapajtaj causaitaca curcari?

²¹ Paicunaca ima charinacunatapish yallica huañunallatami munan. Shina cajpipish, huañuica manataj japinchu.

²² Pambarina jutcuman rishpaca, jatuntami cushicuncuna.

²³ Taita Diosllataj corralashpa charicujpi maita rinata mana yachaj runamanca ¿imapajtaj causaitaca curcari?

²⁴ Micunata micunapaj randica, shungurajmi llujshini. Aij nishpa caparishca shimicunaca, yacu shinami callpacun.

²⁵ Imata manchacushpapish, chaitajmi tucuni. Ñuca manchashca llaquitajmi japin.

²⁶ Manamari sumaj causaita chari tucushcanichu, manamari alli cai tucushcanichu, manamari samari tucushcanichu. Musparina llaquicunami jahuanpi shamushca” nircami.