JOB 28 - Dios Rimashca Shimicunami

Alli yachaita mashcaj runamanta

¹ Cullquitaca allpa ucumantami llujshichin. Curita chuyayachingapaj rupachinapish tiyanmi.

² Fierrotaca allpa ucumantami llujshichin. Cobretaca rumimantami surcun.

³ Manchanana amsatapish mana manchancunachu, ashtahuanpish ucuta allashpami mashcancuna. Huañuna chai manchanana amsa ucupimi achij nicuj rumicunaca tiyan.

⁴ Paicuna causacunmantaca caruta rishpami mashcagrincuna. Shitashca pambacunapi, pipish mana purishcacunapimi mashcagrincuna. Shujtajcunamanta carupimi huarcushpalla huairapi caiman chaiman cuyurincuna.

⁵ Allpallamantatajmi micunapish llujshin. Chai allpa ucupica rupacuj ninami tiyacun.

⁶ Chaipica zafiro rumicunapish, curipish ñutu allpa shinami tiyan.

⁷ Chai ucucunataca, pajaropish mana rijsinchu. Condorcunapish mana ricunchu.

⁸ P'iña animalcunapish chaipica, mana chaquita churancunachu. Leonpish chaitaca mana purinchu.

⁹ Paipaj maquihuanmi yacu rumicunataca huajtarca. Urcucunatapish sapimanta callarishpami urmachirca.

¹⁰ C'acacunata callpacuj yacucunatapish chaquichircami. Tucui imalla tiyaj sumajcunatami paipaj ñahuicunaca ricurca.

¹¹ Maipi yacucuna llujshicujtapish chaquichircami. Pacallapi ima tiyacujtapish achijmanmi llujshichircani.

¹² Ashtahuanpish alli yachaitaca ¿maipishi japi tucunga? Alli yuyaipish ¿maipishi tiyan?

¹³ Pai mashna valishcatapish runaca mana yachanchu. Runacuna causacun cai pachapipish paica mana tiyanchu.

¹⁴ Jatun amsa jutcuca: Mana ñucapajpichu ninmi. Mama cuchapish: Ñucapajpipish mana canchu ninmi.

¹⁵ Curita cujpipish, paitaca mana cuipajchu. Pizashca cullquita cujpipish, paitaca mana c'atuipajchu.

¹⁶ Paitaca Ofir llajta curihuanpish, achij nicuj ónice rumihuanpish, zafiro rumihuanpish mana randi tucuipajchu.

¹⁷ Curipish, achij nicuj diamante rumipish, paihuanca mana ch'imbapuraipajchu. Paitaca curimanta ima charinacunahuanpish mana cambiaipajchu.

¹⁸ Paimantaca coraltapish, perlastapish mana cui tucuipajchu. Alli yachaica achij nicuj rumicunatapish yallimari.

¹⁹ Paihuanca Etiopía llajta topacio rumipish mana ch'imbapuraipajchu. Ashtahuan alli curihuanpish mana randi tucuipajchu.

²⁰ Shinashpaca ¿alli yachaica maimantashi shamun? ¿Alli yuyaica maipishi tiyacun?

²¹ Cai pachapi causaj runacunapaj ñahuipica mana ricurinchu. Huairata purij pajarocunapaj ñahuipipish mana ricuipajllachu.

²² Abadonpish, huañuipish: Pai yallitaj alli cashcataca ñucanchij quiquin rinrinhuantajmi uyarcanchij nircacunami.

²³ Alli yachai maita puricujtapish, maipi tiyacujtapish Taita Diosllami yachan.

²⁴ Paica cai pachatapish, maicama cashcata tucuitami ricucun. Imalla tiyajcunataca jahua pachamanta tucuitami ricucun.

²⁵ Paica huairata pizashpa churacushpa, yacucunatapish medishpa churacushpa,

²⁶ tamyatapish ima shina shamunata mandacushpa, relampacuna c'ulun nishpa purichun ñanta ricuchicushpaca,

²⁷ pairaj alli ricushpami tucuita allichishpa tucuicunaman ricuchirca.

²⁸ Chaimantaca runamanca: Alli yachaica Jatun Diosta manchanami. Alli yuyaica millaimanta anchurinami nishcami nircami.