JOB 27 - Dios Rimashca Shimicunami

Jobca millaicunataca llaquichingami nishcami

¹ Jobca ñaupaman huillashcata yuyachishpaca, cashnami nirca:

² Ñuca japina cashcata quichuj Diosca, ñucata llaquichij Tucuita Rurai Tucuj Diosca ricucunmi.

³ Ñuca causashca punllacunacamaca, ñuca singapi Taita Dios cushca samaita aisashcacamaca,

⁴ ñuca shimihuanca manataj millaita rimashachu. Ñuca c'allupish pandachij shimicunata manataj huillangachu.

⁵ Cancunataca allitami nicunguichij ninaca amataj chayashca cachun. Ashtahuanpish huañungacamami ñucaca ima pandata mana rimasha.

⁶ Cashcata ruranataca chariracunimi, manataj cacharishachu. Ñuca causashcacamaca ñuca shungumantaca manataj chaitaca llujshichishachu.

⁷ Ñucata p'iñajca Diosta mana manchaj runa shinallataj tucushca alli canman. Ñucata llaquichijca millai runa shinallataj tucushca alli canman.

⁸ Millai runaca Taita Dios causaita quichujpica, mashnata shuhuashca cashpapish ¿ima shuyanatataj charinga?

⁹ ¿Paita jatun llaqui japijpi capariricujpica, Taita Diosca uyangachu?

¹⁰ ¿Paica Tucuita Rurai Tucuj Diosmantaca cushicuita japingachu? ¿Paica punllanta Taita Diosta mañai tucungachu?

¹¹ Taita Diospaj maqui imallata rurashcataca ñucami cancunamanca yachachisha. Tucuita Rurai Tucuj Dios imata yuyacushcataca, mana pacashachu.

¹² Riquichij, cancunaca tucuicunallatajmi ricushcanguichij. ¿Ima nishpataj yallitaj yangacuna tucunguichij?

¹³ Diosta mana manchaj runaca, Diosmantaca llaquicunatami japinga. Utcashpa millaita rurajcunapish, japina cashcataca Tucuita Rurai Tucuj Diosllamantatajmi chasquingacuna.

¹⁴ Paicunapaj huahuacuna achcata mirarishpapish, espadapi huañungapajllami miraringacuna. Paicunapaj uchilla huahuacunaca, manataj huijsa jundata micungacunachu.

¹⁵ Paicunapuramanta maijancuna saquirijpipish, huañuillatajmi japinga. Viuda saquirij paicunapaj huarmicunapish paicunamantaca mana huacangacunachu.

¹⁶ Allpata shina cullquita montonangachari, lodota shina achca churanacunata rurangachari.

¹⁷ Paica tucuita allichishpallami saquinga, ashtahuanpish cashcata ruraj runamari chaicunataca churaringa. Alli shungu runami cullquitapish chaupinga.

¹⁸ Paipaj huasica, polilla huasichishca shinallami. Cuidaj runa rurashca chuglla shinallami.

¹⁹ Achcata charijca dormingapaj siririshpapish, rijcharishpa ñahuicunata pascashpaca imapish illajmi ricuringa.

²⁰ Manchanayaj yacu shamujpi shinami jatun manchai japinga. Jatun acapana tuta shamushpami urmachinga.

²¹ Jatun acapana jatarishpami apanga. Jatun huairami pai maipi tiyacushcamantaca anchuchinga.

²² Taita Diosca paitaca manataj perdonangachu, jatun llaquicunata cachangatajmi. Paica Diospaj maquimantaca miticurisha yuyangami.

²³ Paita ricushpaca, maquicunapi huajtaringacunami. Pai maipi tiyacushcapi mana ricurijpica silbangacunami.