JOB 26 - Dios Rimashca Shimicunami

Taita Dios jatun cashcata Job huillashcamanta

¹ Jobca cashna nishpami cutichirca:

² “¿Imata mana rurai tucucujtaca ima shina ayudarcanguichu? Rigra p'aquitapish ¿ima shina ayudarcanguichu?

³ ¿Maipitaj yachaita mana charijtapish yachachishpa, alli yuyaicunata cushpa rijsichircangui?

⁴ ¿Pimantaj cambaj shimicunataca huillarcangui? ¿Canmanta llujshicuj samaica pipajtaj?

⁵ Huañushcacunaca jutcu ucupica chujchucunmi. Mama cucha yacucunapish, chaipi imalla tiyajcunapish chujchucunmi.

⁶ Paipaj ñaupajpica Seolpish pascashcami, Abadonpish imahuan mana tapashcachu.

⁷ Paica jahua pachataca huairapimi churarca. Cai pachatapish imapi mana huarcurcachu.

⁸ Yacucunataca p'uyucunapimi quipirca. Chai tucui yacucunahuan cashpapish, p'uyucunaca mana lliquirinchu.

⁹ Paica paipaj jatun tiyarinataca, sumajtami tapachin. Chai jatun tiyarina ucutaca, paipaj p'uyutami churan.

¹⁰ Maicama yacucuna tiyanatapish, paimi lindeta churarca. Achijpish, amsapish tucuringacamami yacucunataca churarca.

¹¹ Pai rimashcata uyashpaca, jahua pachata charij pilarcunapish mancharishpa chujchunmi.

¹² Paipaj fuerzahuanmi mama cucha yacucunatapish cuyuchin. Paica alli yachaj cashpami, manchanayaj yacu jatarijpipish jarcan.

¹³ Diospaj Espirituhuanmi jahua pachataca, sumajta rurarca. Pi'ñarishpa singuricuj culebratapish, paipaj maquihuanmi rurarca.

¹⁴ Cai rurashcacunaca callaricunallami. Paimantaca asha ashallatami uyanchij. C'ulun nichij paipaj jatun podertaca ¿pitaj alli yachai tucungari?” nircami.