JOB 23 - Dios Rimashca Shimicunami

Jobca Diospaj ñaupajpi pai imalla rurashcata ricuchisha nishcamanta

¹ Jobca cashna nishpami cutichirca:

² Cunanpish huacashpami rimasha nini. Ñuca carachaca jatunta caparinatamari nanacun.

³ ¡Taita Dios maipi cashcata maijanpish huillajpica, ñucaca paipaj tiyana ñaupajmanchari riman!

⁴ Paipaj ñaupajpica, ñuca imalla huillasha nishcatami huillaiman. Ñuca shimihuanca imatapish nimanmi.

⁵ Pai imalla cutichishcatami yachaiman. Pai imalla nishcahuanmi yuyaita japiman.

⁶ ¿Ñucataca sinchita rimashpachu cutichinman imatajshiyari? Mana, ashtahuanpish paica ñucataca uyanmanllami.

⁷ Cashcata rurajca paihuan chaipimi paihuan yuyaita japinman. Ñucaca juezpaj ñahuipica, cutinca manataj ricurigrimanchu.

⁸ Chashna yuyashpapish inti llujshinman rishpapish, paitaca manataj japishachu, inti huashicunman rishpapish manataj tupashachu.

⁹ Pai poderta janajman ricuchijpipish, mana ricushachu. Uraman paca tucujpi mana ricushachu.

¹⁰ Ashtahuanpish paica ñuca causaitaca, tucuitami rijsin. Pai ñucata ima shinapish ricujpica, curi shinami llujshisha.

¹¹ Ñucaca pai sarushcapimi sarushpa catircani. Pai mandashcatapish huaquichircanimi. Paimantaca manataj caruyarcanichu.

¹² Paipaj shimihuan mandashcamantaca, shuj cutinllapish manataj caruyarcanichu. Paipaj shimicunataca, ñuca micunatapish yallimi chai yuyai causarcani.

¹³ Ashtahuanpish pai imata rurasha nishcataca ¿pitaj shujtajyachingari? Pai munashcatami rurarca.

¹⁴ Ñucata imallata rurasha nishcataca, tucuitami pajtachinga. Paica cai shina ruranacunataca, achcatami charin.

¹⁵ Chaimantami paipaj ñaupajpica, ñucaca mancharini. Pai ima shina cashcata yuyarishpaca chujchunimi.

¹⁶ Taita Diosmi ñuca shungutaca manchachirca. Tucuita Rurai Tucuj Diosmi ñucataca muspachirca.

¹⁷ ¿Ima nishpataj amsallapitaj mana huañurcaniyari? ¿Ima nishpataj ñuca ñahuitaca, amsahuan mana tapachircari?