JOB 22 - Dios Rimashca Shimicunami

Elifazca Jobtaca yallitaj millaitami rurashcangui nishcamanta

¹ Temanmanta Elifazca cashna nishpami cutichirca:

² “¿Runaca, yachaj cashpapish Taita Diospajca ima allita ruranchu? Mana, ashtahuanpish yachaisapa cashcahuanca paipajllatajmi allita ruran.

³ ¿Cashcata rurajmi cani nishcallamantachu, allita rurajmi cani nishcallamantachu, Tucuita Rurai Tucuj Diosca, canpica cushicuita japinga? ¿Chaimanta ima allita japingachu?

⁴ ¿Can paita manchaj cashcamantachu llaquichicunmi yuyangui?

⁵ Canca yallitaj jatun llaquicunatami rurashcangui. Can millaita rurashcacunaca mana tucuripajmi.

⁶ Cambaj huauquicunataca yangamantami prendata japircangui. Lluchulla churashcatapishmi quichurcangui.

⁷ Shaicushcamanca yacuta mana ubyachircanguichu. Yaricachicujmanpish micunata mana cararcanguichu.

⁸ Ashtahuanpish achcata charij runallami allpataca japirca. Chaipimi alli nishca tucushpa causarca.

⁹ Viuda huarmicunatapish chushaj maquitami tigrachishpa cacharcangui. Yaya mama illaj huahuacunatapish maquita p'aquircanguimi.

¹⁰ Chashna rurashcamantami cambaj muyundijpica, huascacuna tiyacun. Cungaimantamari jatun llaquicuna japishpa manchachishca.

¹¹ Amsa tucujpimi, mana ricui tucungui. Manchanayaj yacumi cantaca millpucun.

¹² ¿Taita Diosca manachu jahua pachapi jahuaman tiyacun? Luzerocunapish yallitaj jahuamanmari tiyacun, ricuyari.

¹³ Chaita ricushpaca: ¿Taita Diosca imatataj yachangari? Amsapica ¿ima shinataj cashcata rurashcata, mana cashcata rurashcataca ricungari?

¹⁴ P'uyucuna tapacujpimi, mana ricucun. Jahua pacha muyundijllatami puricun ninguimi.

¹⁵ ¿Millai runacuna sarushca ñaupa ñanllatatajchu catisha ningui?

¹⁶ Chaicunaca manaraj punlla pajtajpimi, p'itishca carca. Callari rumicunandijta jatun yacu apashca shinami tucurcacuna.

¹⁷ Paicunaca Taita Diostaca: Ñucanchijmanta anchuri nishpami rimarcacuna. ¿Tucuita Rurai Tucuj Diostaca, paicunata imata rurashca cajpitaj, chashna nishca canga?

¹⁸ Paicunapaj huasicunapimi achca charinacunata jundachirca. Ashtahuanpish ñucaca amalla paicuna shina yuyashca casha.

¹⁹ Cashcata rurajcuna ricushpaca cushicungami, alli shungu runaca chanzata rurashpami, cashna ninga:

²⁰ Ñucanchijta p'iñajcunaca chingarishcamari. Paicuna imalla charishcacunataca ninamari rupachishpa tucuchishca nishpami asingacuna.

²¹ Shina cajpica cunanca paihuan alli tucuiyari, chashnami sumaj causaita charingui. Chaillamantatajmi cambajca allicuna shamunga.

²² Cunanca paipaj shimihuan mandashcataca chasquiyari. Paipaj shimicunataca cambaj shungupi huaquichiyari.

²³ Tucuita Rurai Tucuj Diospajman tigrarishpaca, cutin shayachishcami cangui. Cambaj huasimantapish llaquicunata carcushpa cachanguimi.

²⁴ Canca curitaca, allpata yallimi charijyangui. Ofir llajta curitapish yacu huaicu rumicunata shinami charijyangui.

²⁵ Tucuita Rurai Tucuj Diosmi canmantaca shayaringa. Cullquitapish achcatami charingui.

²⁶ Chashna cashpaca, Tucuita Rurai Tucuj Diosmantami cushicungui. Cambaj ñahuihuanca Taita Diosta huichilla ricunguillami.

²⁷ Canca paita mañajpica, can mañashcata uyangallami. Canpish paiman imallata cushami nishcataca cunguimi.

²⁸ Can ima ruranata yuyashcapish, chaica chashnatajmi llujshinga. Cambaj purina ñancunapica, ninami achijyachinga.

²⁹ Maijan pingachishca cajpica: Jatunyachishcami canga ninguimi. Mana jatun tucujcunataca, Taita Diosmi quishpichinga.

³⁰ Alli shungu runataca paimi quishpichinga. Cambaj maquita mana mapayachijpimi, huajcha runaca ima llaquita apanga” nircami.