JOB 21 - Dios Rimashca Shimicunami

Jobca millaita rurajcunarajmi allita causancuna nishcamanta

¹ Chaimantami Jobca cashna nishpa cutichirca:

² “Ñuca rimashcata alli uyaichij. Cai rimashcacunata uyashpami, ñucataca cushichinguichij.

³ Ñuca rimashcata upajlla uyahuaichij. Ñuca rimashca q'uipaca chanzata rurashpa asinguichijllami.

⁴ Ñucaca manamari shujtaj runamanta rimanichu. ¿Ima nishpataj ñucaca mana llaquirishari?

⁵ Ñucata ricushpa mancharichigari, Maquihuan shimita tapashpa yuyarichigari.

⁶ Ñucallatajpish yuyarishpaca, achcatami mancharini. Ñuca aichapish chujchucunmari.

⁷ ¿Imamantataj Diosta mana manchajcunaca causanllacuna, yuyajyashpapish ashtahuan charij tucuncuna?

⁸ Paipaj huahua huahuacunaca, paipaj ricuipica sumajtami huiñancuna. Paipaj nietocunapish paipaj c'uchupimi cushicushpa causancuna.

⁹ Paipaj huasicunapi causajcunaca, ima manchaita mana charincunachu. Paicunataca Taita Diospish mana llaquichinchu.

¹⁰ Paipaj c'ari huagracuna puñushpaca, mana yangalla puñunchu, chichuchintajmi. Vacacunapish mana shullushpa, alli huahuacunallatami huachan.

¹¹ Paipaj uchilla huahuacunaca canlla ovejacuna shinami llujshirincuna. Paipaj churicunaca jahuata saltashpami purincuna.

¹² Paicunaca tamborpi, citarapi tocashcahuanmi tushuncuna. Flautapi tocashcahuanmi cushicuncuna.

¹³ Tucui causaipimi ima mana illaj causancuna. Sumajta huañushpami, Seolman rincuna.

¹⁴ Paicunaca Taita Diostaca, cashna nishpami rimancuna: Ñucanchijmanta anchuri, can imallata rurachun nishcataca mana yachashun ninchijchu.

¹⁵ Tucuita Rurai Tucuj Diosca ¿pi cajpitaj paitaca servishunri? ¿Paita mañashpaca imatataj japishunri? nincunami.

¹⁶ Riquichij, pai cushca allicunaca mana paicunapaj maquipichu. Ñucaca amalla Diosta mana manchajcuna shina yuyashca casha.

¹⁷ Mashna cutinpishchari Diosta mana manchajcunapaj lamparaca huañun. Paicunataca llaquicuna japinllami. Taita Dios p'iñarishpaca nanaicunata cachanllami.

¹⁸ Paicunaca huairapi rij ujsha shinami cangacuna. Jatun acapana t'amuta tsirapashca shinami tucungacuna.

¹⁹ Paicunapaj huahuacunapajca, Taita Diosmi llaquicunata huaquichishpa charicun. Yuyaita japichunmi, paicuna japina cashcataca cunga.

²⁰ Paipaj llaquitaca, paipaj quiquin ñahuihuanmi ricunga. Tucuita Rurai Tucuj Dios p'iñarishpa cachashcataca ubyangatajmi.

²¹ Paipaj causai quillacunata p'itishpa shitajpi, pai huañushca q'uipaca, paipaj huasipica ima cushicuitataj charingari.

²² ¿Taita Diostaca maijanpish alli yachanacunata yachachi tucungachu? Paimi jatun tucushcacuna imalla rurashcacunata ricucun.

²³ Maijanca chairaj cashparaj, sumajta causashpa, cushicushpa imata mana manchashpa huañunllami.

²⁴ Paipaj puñucunapish lechehuan jundami. Paipaj tullucunapish ñutcu talliricujmi.

²⁵ Ashtahuanpish caishujca manchanayaj llaquita apashpami huañunga. Pai munashcata shuj cutinllapish mana micushpami huañunga.

²⁶ Caishujpish chaishujpish allpapi pambaringallatajmi. Ishquindijllatatajmi c'urucuna jundashpa micunga.

²⁷ Riquichij, ñucaca cancuna imata yuyacushcataca yachanimi. Ñucata juchachicujtapish yachanimi.

²⁸ Cancunaca cashnamari ninguichij: ¿Mandajpaj huasica maipitagari? ¿Diosta mana manchajcuna causacushca huasicunaca maipitagari? ninguichijmari.

²⁹ ¿Cancunaca manachu ñanta purijcunataca tapurcanguichij? ¿Paicuna imata cutichishcataca manachu yuyaringuichij?

³⁰ Millai runaca llaquichicui punllaca pacashcami canga. Dios p'iñari punllapica huaquichishcami canga.

³¹ ¿Maijantaj pai mana allita rurashcataca ñahuipi ricuchingari? Pai imalla rurashcamantaca ¿pitaj japinata cungari?

³² Paitaca pambana jutcumanmi apashpa ringacuna. Chai allpa montón jahuapimi velangacuna.

³³ Paipajca pugru pamba allpapi sirinaca mishquimi canga, chai huañushcata apacun huashataca achcacunami catishpa ringacuna. Ñaupajtapish achcacunami ñaupashpa ringacuna.

³⁴ Ñucataca yangallamari cushichishun ninguichij. Cancunapaj cutichishcacunaca yangallamari” nircami.