JOB 19 - Dios Rimashca Shimicunami

Jobca Taita Dios alli chasquingami nishpa shunguta churashcamanta

¹ Chaimantami Jobca cashna nishpa cutichirca:

² “¿Maicamataj ñuca almataca llaquichinguichigari? ¿Maicamataj rimashpa nanachinguichigari?

³ Ñucataca ñamari chunga cutin c'aminguichij. P'iñachicunallataca ¿manachu pinganguichij?

⁴ Ñuca mana allicunata rurashca cajpica, ñuca jahuapimi llaquicunaca urmanman.

⁵ Cancuna jatun tucushpa ñucata rimashca cashpapish can mana allita rurashcamantami, llaqui tucushcangui nishpapish,

⁶ cunanca Taita Diosllataj ñucata llaquichishcatami yachanguichij. Paimari paipaj linchipi pilluchishpa churarca.

⁷ Llaquichicuncunaca nishpa ñuca caparijpipish, manataj uyahuanchu. Manchanayajta caparirijpipish, ñucapajca ima allitaca manataj rurangachu.

⁸ Ñuca purina ñanpi patata rurashpa jarcajpimari, mana pasai tucuni. Ñuca purina ñancunapica amsayachircamari.

⁹ Ñuca sumaj cashcataca quichurcamari. Ñuca umamantapish coronata anchuchircamari.

¹⁰ Ñucataca tucui laya llaquichijpimari, ña chingarigrini. Ñuca shuyacushcataca yurata shinamari p'itishpa shitarca.

¹¹ Pai p'iñarishpaca, ninahuan shinami llaquichirca. Paita p'iñajcunapurapimi ñucatapish churarca.

¹² Paipaj soldadocuna shamushpami, ñucataca muyundijta jarcarcacuna. Ñuca huasitapish muyundijtami chaparcacuna.

¹³ Ñuca huauquicunatapish ñucamanta caruyachircami. Ñuca rijsishcacunapish, mana rijsishcacuna shinami ñucamantaca caruyarcacuna.

¹⁴ Ñuca familiacunapish ña mana ricunaman shamurcacunachu. Ñuca rijsishcacunapish cungarircacunami.

¹⁵ Ñuca huasipi causajcunapish, ñucata servij huarmicunapish, caru llajta runata shinami charircacuna. Paicunapaj ñahuipica c'ullu runa shinami ricurircani.

¹⁶ Ñucata servij runata cayajpipish, mana cutichircachu. Ñuca quiquin shimihuanmi paitaca mañarcani.

¹⁷ Ñuca samaica ñuca huarmipajca, millananami ricurirca. Ñuca quiquin huahuacunata rogajpipish, mana c'uchuyarcachu.

¹⁸ Chairajcunapish ñucataca mana ricunachircacunachu. Ñuca jatarijpipish, c'amishpami rimarcacuna.

¹⁹ Ñucahuan alli apanacujcunapish tucuicunami ñucataca p'iñarcacuna. Ñuca c'uyashcacunapish llaquichircacunami.

²⁰ Ñuca aicha carapish, tullucunapimari tucui llutarishca. Quiru siquipi tiyaj aichallamari quishpirishcani.

²¹ ¡Ñuca rijsishcacunatajmari canguichij, llaquihuaichigari! ¡Ñucata llaquihuaichigari! Taita Diospaj maquimari ñucataca tuparishca.

²² ¿Ima nishpataj Dios shina catirashpa llaquichinguichigari? Cancuna micuchun aichallatapish mana charinichu.

²³ ¡Cunanca maijanpish ñuca rimashca shimicunata quillcajpichari, alli canman! ¡Chai shimicunataca libropi maijan quillcajpichari alli canman!

²⁴ ¡Fierro cincelhuan, plomohuan rumipi huiñaipaj tiyachun quillcashpa churajpichari alli canman!

²⁵ Ñucata Quishpichij causacushcataca yachanimi. Tucuripica, paimi cai pachapi shayaringa.

²⁶ Ñuca caracama ismushpa chingarishca q'uipami, Taita Diostaca ñuca aichahuan ricusha.

²⁷ Paitaca ñucallami ricusha. Ñuca shungupi llaquihuan huañucushpapish, ñuca ñahuihuantajmi ricusha, mana pi shujtajca ricungachu.

²⁸ Cancunaca: ¿Ima nishpataj paitaca llaquichingapaj catinchigari? ninami canguichij. Imamanta cashpapish, ñucallatajmi llaquita apacuni.

²⁹ Cancunaca espadapaj ñaupajpica manchaichigari. Manapish cashcata rurashcamantami, cancunata llaquichingapajca p'iñarishpa espadahuan shamucun. Llaqui tucuna cashcata yachachunmi chaica tucunga” nircami.