JOB 18 - Dios Rimashca Shimicunami

Bildadca millaicunapish allimi causan nishcami

¹ Suhamanta Bildad runaca cashna nishpami cutichirca:

² “¿Ima horastaj rimanataca tucuchinguichigari? Alli yuyaita japichijraj, chai q'uipa rimanacushunllami.

³ ¿Ñucanchijtaca animalcunata shinachu charishun ninguichij? Cancunapaj ñahuipica ñucanchijca ¿imapaj mana valijcunachu canchij?

⁴ ¿Can manchanayajta p'iñarishpa huañurijllapichu allpaca shitashca pamba tucunga? ¿Rumi urcucunapish tiyacushcamanta anchuringachu?

⁵ Diosta mana manchajcunata achijyachij ninataca, huañuchishcami canga. Unitaca mana achijyachingachu.

⁶ Paipaj huasita achijyachij ninaca amsayangami. Paipaj lamparaca huañungami.

⁷ Utca purij cashca cashpapish, cunanca allimantallami puringa. Paitaca pai yuyarishcallatajmi urmachinga.

⁸ Pai purinapica linchitami shitanga. Fierro casha jahuacunatami puringa.

⁹ Paipaj chaqui talonpica huascahuanmi huatanga. Paita japingapajca, alli trampatami churanga.

¹⁰ Paita urmachina huascaca pambapimi pacashca tiyacun. Paita japina trampaca, pai purina ñanpimi siricun.

¹¹ Tucui ladomantami llaquicuna shamushpa manchachinga. Manchachishpami callpachingacuna.

¹² Yaricaihuanmi fuerza illaj tucunga. Paipaj c'uchullapimi, llaquicunaca allichishca tiyacun.

¹³ Ungüimi paipaj carataca ismuchinga, huañuna ungüimi paipaj aichata micushpa tucuchinga.

¹⁴ Paipaj huasipi shunguta churanaca tucuringami. Jatun mancharinacunata jatun mandajpajmanmi pushashca canga.

¹⁵ Paipaj huasipi causacushpapish, mana paipaj huasipi causacushca shinami canga. Pai causana huasi jahuapica azufre rumita tsirapashcami canga.

¹⁶ Ucumanca sapicunami chaquiringa, jahuamanca ramacunami p'itishca canga.

¹⁷ Cai pachapica, paimanta ima yuyarinapish chingaringami. Paipaj shutitaca, ñancunapipish mana yuyaringacunachu.

¹⁸ Achijmantaca amsaman shitashcami canga. Cai pachamantaca anchuchishcami canga.

¹⁹ Paipaj familiapurapica churitapish, nietotapish mana charingachu. Paipaj huasicunapi causanapajpish, pi mana tiyangachu.

²⁰ Inti huashicun llajtacunapi causajcunaca, pai chingarishcata yachashpaca mancharingacunami. Inti llujshin llajtacunapi causajcunapajca, jatun mancharinami tucunga.

²¹ Diosta mana manchaj runapaj huasicunaca chashnami chingaringa. Taita Diosta mana rijsijpish, chashnallatajmi tucunga” nircami.