JOB 17 - Dios Rimashca Shimicunami

¹ Ñuca causaica ñami tucuricun. Ñuca causai punllacunaca ñami p'itiricun. Pambana jutcupish ñami allichishca shuyacun.

² Chanzata rurashpa asijcunallami ñucahuan tiyacuncuna. Chaimanta ñuca ñahuicunapish huacacunllami.

³ Taita Dioslla, ñucapaj randi shayariyari, ñuca miticunaca cambaj c'uchupi cashca cachun. ¿Pitaj ñucamantaca shayarisha ningari?

⁴ Canca caicunapaj shungumantami alli yuyaicunata anchuchircangui. Chaimanta ñucata mishachun ama saquingui.

⁵ Alli apanacujcunallataj llaquichishpa aichata shina rurashcamantaca, paipaj huahuacunami huañungacuna.

⁶ Paica ñucataca yuyachij shimicunahuan shujtajcuna rimachunmi saquishca. Paicunapaj ñaupajpica, ñucaca tambor shinami carcani.

⁷ Ñuca ñahuicuna amsayajtami nanarca. Ñuca yuyaicunapish tucuimi amsayarca.

⁸ Chaita ricushpami, allita rurajcunaca mancharircacuna. Alli shungu runaca, Diosta mana manchajta llaquichingapaj jataringami.

⁹ Chashna cajpipish cashcata rurajca, cashcata rurashpallataj catingami. Mapa illaj maquicunahuan cajpish, paipaj fuerzataca mirachingami.

¹⁰ Shina cashpapish cunanca tucui cancuna tigrashpa shamupaichij. Cancunapurapica yachaisapa runataca, mana japishachu.

¹¹ Ñuca causai punllacunaca ñami pasashca. Ñuca shungupi imata munacushcapish, ñuca yuyaicunapish ñami p'itirishca.

¹² Tutataca punllatami rurarcacuna. Achijca amsapica ashallatami achijyachin.

¹³ Ashtahuan shuyajpica, Seolmi ñuca huasi canga. Chai amsapimi mantashpa siririsha.

¹⁴ Ñucaca ismushpa tucurinatami: Ñuca yayami cangui nircani. C'urucunataca: Ñuca mama, ñuca panicunami canguichij nircanimi.

¹⁵ ¿Cunanca maipitaj ñuca shuyanaca cangari? Ñuca shuyacushcataca ¿pitaj ricungari?

¹⁶ Seol ucucamami ñucahuan uriyangacuna. Allpapica tandallami samarishun nircami.